සිය මංගල පළමු පෙළ ද්විත්ව ශතකය රැස් කරමින් රොන් චන්ද්‍රගුප්ත ක්‍රියාත්මක කළ විශිෂ්ට පිතිහරඹය හේතුවෙන් අන්තර් සමාජ තුන්දින ක්‍රිකට් තරගාවලියේ අවසන් මහ තරගයේදී එන්සීසී පිලට එරෙහිව සිය පළමු ඉනිම වෙනුවෙන් ලකුණු 508ක දැවැන්ත ලකුණු පුවරුවක් නිර්මාණය කිරීමට බ්ලූම්ෆීල්ඩ් කණ්ඩායම සමත් විය.
සිය හොඳම පළමු පෙළ ඉනිම ක්‍රීඩා කළ 30 හැවිරිදි රොන් චන්ද්‍රගුප්ත ලකුණු 237ක් රැස් කළ අතර, පන්දු 493කින් ගොඩනැඟුණු ඔහුගේ ඉනිම හතරේ පහර 20කින් සහ හයේ පහරකින් වර්ණවත් විය. එය මෙවර තරගාවලියේ වාර්තා වූ 5 වැනි ද්විත්ව ශතකයක් විය.
පළමු දිනය නිමා වන විට අසිත වන්නිනායක (62) සමඟ ලකුණු 141ක නොබිඳුණු සබඳතාවක් ගොඩනඟා සිටි රොන් සිය සබඳතාව ද්විත්ව ශතකයක් කරා රැගෙන ගියේය. සිය හොඳම පළමු පෙළ ඉනිම ක්‍රීඩා කළ අසිත (96) ශතකයට ලකුණු 4ක් පසුපසින් සිටියදී දැවී ගිය අතර, ළහිරු මදුශංක සමඟ එක්ව 5 වැනි කඩුල්ලට ලකුණු 169ක සබඳතාවක් ගොඩනැඟීමට ද රොන්ට හැකි විය. මදුශංක ලකුණු 55ක් රැස් කළ අතර, රොන් 6 වැනි කඩුල්ල ලෙස දැවී යන විට මුළු ලකුණු සංඛ්‍යාව 496ක් විය.
කෙසේ වෙතත් බ්ලූම්ෆීල්ඩ් අවසන් කඩුලු 6 ලකුණු 16ක් තුළ බිඳ දැමීමට එන්සීසී පන්දු යවන්නෝ සමත් වූහ. ඉන් අවසන් කඩුලු 5ම දවා ගැනීමට සමත් වූ ළහිරු කුමාර ඉනිම පුරා ලකුණු 87කට කඩුලු 6ක් දවා ගත්තේය. එය ඔහුගේ පළමු පෙළ තරග දිවියේ ඉනිමක හොඳම පන්දු යැවීම ලෙස ද සටහන් විය. බ්ලූම්ෆීල්ඩ් ඉනිම නිමා වීමත් සමඟ තරගය දෙවැනි දිනයට නතර කළ අතර, සිවුදිනක් ක්‍රියාත්මක වන තරගයේ තෙවැනි දිනය අදයි.
බ්ලූම්ෆීල්ඩ් පළමු ඉනිම – 508 (ඕවර 174) රොන් චන්ද්‍රගුප්ත 237, අසිත වන්නිනායක 96, ළහිරු මදුශංක 55, හසිත බෝයගොඩ 52 (ළහිරු කුමාර 87/6, අෂේන් ඩැනියෙල් 93/2)
ළහිරු කුමාර සහ රොන් චන්ද්‍රගුප්ත
