රහස් ගබඩාවක සඟවා වැඩි මිලට කීරි සම්බා විකිණූ කඩහිමියා අත්අඩංගුවට

සහල් වැඩි මිලට විකිණීම සඳහා සිය වෙළෙඳසලෙහි රහස් ගබඩාවක සඟවා ගෙන සිටි කීරි සම්බා සහල් තොගයක් ගාල්ල පාරිභෝගික කටයුතු පිළිබඳ අධිකාරියේ ගාල්ල ඒකකය විසින් පෙරේදා (5) සවස අත්අඩංගුවට ගනු ලැබීය.

එම ඒකකයට ලද තොරතුරක් මත ගාල්ල දංගෙදර වීදියේ මෙම වෙළෙඳසල වටලා රුපියල් 72500ක් වටිනා කිලෝ 5 බෑග් 55ක් මෙසේ අත්අඩංගුවට ගනු ලැබීය.

මෙම සහල් තෙගය සමඟ එහි අයිතිකරුද අත්අඩංගුවට ගත් අධිකාරිය පසුව ඇප පිට මුදහරිනු ලැබූ අතර ඊයේ (6) අධිකරණය හමුවට ඉදිරිපත් කිරීමට නියමිතව තිබුණි.

මෙම වැටලීම ගාල්ල දිසා ලේකම් ඩබ්ලිව්.ඒ. ධර්මසිරි මහතාගේ උපදෙස් මත ඒකකයේ ප්‍රධානි බී. ගොඩගම, විමර්ශන නිලධාරි ඉඳුනිල්, එච්.පී. චන්දන, සී. ජයවික්‍රම, තනුජ වීරකෝන්, මංජුල පත්මකුමාර යන පිරිස විසින් මෙම වැටලීම සිදුකරනු ලැබීය.