ණය ප්‍රතිව්‍යුහගතකරණය යටතේ ජපාන රජය සහ ජපාන අන්තර්ජාතික සහයෝගිතා ඒජන්සිය (JICA) සමඟ ශ්‍රී ලංකා රජය සංශෝධිත ගිවිසුම් සහ හුවමාරු පත්‍ර සඳහා අද (7) අත්සන් තැබේ.
ශ්‍රී ලංකාවේ ජපන් තානාපති Akio Isomata මහතාගේ සහ මුදල් අමාත්‍යාංශ ලේකම් කේ.එම්. මහින්ද සිරිවර්ධන මහතාගේ ප්‍රධානත්වයෙන් ඒ සම්බන්ධයෙන් වූ උත්සවය අද (7) පස්වරු 12.30ට මුදල් අමාත්‍යාංශයේ රන්දොර ශ්‍රවණාගාරයේ දී පැවැත්වේ. ශ්‍රී ලංකාවේ ණය තිරසරභාවය යථා තත්ත්වයට පත් කිරීම සඳහා ණය ප්‍රතිව්‍යුහගත කිරීම ඉදිරියට ගෙන යාමේ ප්‍රගතිය කැපීපෙනෙන බව ජාත්‍යන්තර මූල්‍ය අරමුදල මෑතකදී පෙන්වා දුනි. දැනටමත් ශ්‍රී ලංකා රජය දේශීය වශයෙන් ණය පහසුකම් ලබාගත්තවුන්ට ගෙවීමට තිබෙන මුදල් සම්බන්ධයෙන් ණය ප්‍රශස්තිකරණයකට එකඟවී ඇත.
ඊට අමතරව විදේශීය වශයෙන් ලබා ගත් ණය ප්‍රතිව්‍යුහගතකරණයට පියවර ගෙන තිබේ. දැනට ඉතිරිව තිබෙනුයේ ද්විපාර්ශ්වීය ණය හිමියන් සමඟ ගිවිසුම්වලට එළඹෙමින් කටයුතු කිරීමටය.
එවැනි වාතාවරණයක් යටතේ ඉතා සුළු ණය හිමියන් පිරිසක් සමඟ ඉදිරියේදී ඉක්මනින් ණය ප්‍රශස්තිකරණ ගිවිසුම්වලට එළඹීමට අද (7) අත්සන් තැබෙන එකඟතාවත් සමඟ තවත් කටයුතු වේගවත් වන බව මුදල් අමාත්‍යාංශය ප්‍රකාශ කරයි.
