Sunday, April 6, 2025
Home » පියා ඇටවූ විදුලි උගුලකට හසුවී අම්මයි-පුතයි මරුට

පියා ඇටවූ විදුලි උගුලකට හසුවී අම්මයි-පුතයි මරුට

by mahesh
March 7, 2025 4:00 pm 0 comment

සූරියවැව විශේෂ - නුවන් ජයසේකර
මියගිය පුතු හා මව

සූරියවැව 10 කණුව, රන්දියගම ප්‍රදේශයේදී නි‍ෙවස පිටුපස ඇද තිබූ අනාරක්ෂිත විදුලි උගුලකට හසුවූ මවක හා පුතකු පෙරේදා (05) දහවල් මියගොස් ඇතැයි සූරියවැව පොලීසිය පවසයි.

මෙලෙස මියගොස් ඇත්තේ සූරියවැව, රන්දියගම, දහය කණුව පදිංචි 38 හැවිරිදි විජය මුනිගේ එනෝෂා හර්ෂණි නමැති සිව්දරු මවක හා ඇයගේ සිව් හැවිරිදි වීරසිංහගේ ගඟන ඉඳුවර නමැති දරුවායි. මියගිය කාන්තාවගේ සැමියා වන 42 හැවිරිදි නිහාල් සිරිවර්ධන යන අය විසින් නි‍ෙවස පිටුපස ඇති මඩුවක නවතා තිබූ ලොරි රථයක් වටකර අනාරක්ෂිත ලෙස ඇද තිබූ කම්බියකට යොදා තිබූ විදුලිය වැදීම හේතුවෙන් මෙම මව හා පුතු මියගොස් ඇතැයි වාර්තා වෙයි. මව හා පුතු විදුලිසර වැදී බිම වැටී සිටිනු අසල්වැසියන් දැක කඩිනමින් සූරියවැව රෝහලට ඇතුළත් කළ ද ඒ වන විටත් ඔවුන් දෙදෙනා මියගොස් සිට තිබේ. සිද්ධිය සම්බන්ධයෙන් පරීක්‍ෂණ පැවැත්වූ සූරියවැව පොලීසිය සිද්ධියට සැකපිට මියගිය කාන්තාවගේ සැමියා පොලිස් අත්අඩංගුවට ගෙන තිබේ. අත්අඩංගුවට ගත් සැමියාගෙන් කළ මූලික ප්‍රශ්න කිරීමේදී ඔහු පොලීසියට පවසා ඇත්තේ මීට දින කිහිපයකට පෙරද මේ ස්ථානයේ නවතා තිබූ තමන්ගේ වාහනයක බැටරියක් කිසියම් අයකු විසින් සොරකම් කරගෙන යෑම නිසා වාහනය සොරුන්ගෙන් ආරක්‍ෂා කර ගැනීමට මෙලෙස විදුලිය යෙදූ කම්බියක් වාහනය නවතා තිබූ මඩුව වටා ඇද තිබූ බවය. සැකකාර පියා පොල්කටු එකතු කිරීමේ ව්‍යාපාරයක නිරත වන්නකු වන අතර සිද්ධිය වන දින ද ඔහු සිය වැඩිමහල් පුතුන් දෙදෙනා සමඟ සෙවණගල ප්‍රදේශයට පොල්කටු එකතු කිරීමට ගොස් තිබේ. සිද්ධියට සැකපිට අත්අඩංගුවට ගත් සැකකාර පියා ඇඹිලිපිටිය මහේස්ත්‍රාත් අධිකරණයට ඉදිරිපත් කිරීමට නියමිතය. සිද්ධිය සම්බන්ධයෙන් සූරියවැව පොලීසිය වැඩිදුර විමර්ශන පවත්වයි.

 

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT