රාජ්‍ය සේවයේ නියුතු හෙද හෙදියන් වයස අවුරුදු 60 දී විශ්‍රාම ගැන්වීමට ඉකුත් රජය සමයේදී කැබිනට් මණ්ඩලය විසින් ගනු ලැබූ තීරණයක් ක්‍රියාත්මක කිරීම වළක්වාලමින් අභියාචනාධිකරණය විසින් මීට පෙර නිකුත්කර තිබූ නියෝගය ක්‍රියාත්මක වීම අත්හිටුවන අතුරු තහනම් නියෝගයක් ශ්‍රේෂ්ඨාධිකරණය විසින් ඊයේ (06) නිකුත් කරන ලදි.
එම අභියාචනාධිකරණය නියෝගය අභියෝගයට ලක් කරමින් නීතිපතිවරයා විසින් ගොනු කළ අභියාචනා පෙත්සමක් කැඳවූ අවස්ථාවේදී මෙම නියෝගය කරන ලදි.
ප්‍රීති පද්මන් සූරසේන, ජනක් ද සිල්වා, සම්පත් අබේකෝන් යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවන ලදි.
එහිදී නීතිපතිවරයා වෙනුවෙන් පෙනීසිටි අතිරේක සොලිසිටර් ජනරාල් විකුම් ද ආබෲ මහතා සහ වගඋත්තරකාර පාර්ශ්වය වෙනුවෙන් පෙනීසිටි නීතිඥ රුවන්ත කුරේ මහතා ඉදිරිපත් කළ කරුණු සලකා බැලීමෙන් අනතුරුව මෙම අතුරු තහනම් නියෝගය නිකුත් කෙරිණි.
රාජ්‍ය සේවකයන් වයස අවුරුදු 60දී අනිවාර්යය විශ්‍රාම ගැන්වීමට පසුගිය රජය සමයේ දී කැබිනට් මණ්ඩල තීරණයක් ගෙන තිබුණි.
එම තීරණය අනුව ශ්‍රී ලංකා හෙද සේවයට අයත් විශේෂ ශ්‍රේණිය, ශ්‍රේණිය-01, සහ විධායක ශ්‍රේණියට අයත් හෙද හෙදියන් වයස අවුරුදු 60 දී අනිවාර්ය විශ්‍රාම ගැන්වීමට ද තීරණය කෙරුණි.
එම කැබිනට් මණ්ඩල තීරණය බල රහිත කරන ලෙස ඉල්ලා රාජ්‍ය සේවා එක්සත් හෙද සංගමය ඇතුළු පිරිසක් විසින් අභියාචනාධිකරණයට රිට් පෙත්සමක් ගොනුකර තිබුණි.
ඒ සම්බන්ධයෙන් ඉදිරිපත් කරන ලද කරුණු සලකා බැලීමෙන් අනතුරුව අදාළ කැබිනට් තීරණය හෙදියන් සම්බන්ධයෙන් ක්‍රියාත්මක වීම අත්හිටුවමින් ඉකුත් වසරේ අප්‍රේල් මස 04 වැනිදා අභියාචනාධිකරණය අතුරු තහනම් නියෝගයක් නිකුත් කළේය.
එම අතුරු තහනම් නියෝගය නිකුත් කිරීම නීති විරෝධී සහ අසාධාරණ වන බැවින් එය ඉවත් කරන ලෙස ඉල්ලා නීතිපතිවරයා ශ්‍රේෂ්ඨාධිකරණයට මෙම අභියාචන පෙත්සම ඉදිරිපත් කළේ ඉන් අනතුරුවය.
අභියාචනාධිකරණයට රිට් පෙත්සම ඉදිරිපත් කළ රාජ්‍ය සේවා එක්සත් හෙද සංගමය ඇතුළු පිරිසක් මෙහි වගඋත්තරකරුවෝ වෙති.
