වසර 58කට පසු පළමු වතාවට ආසියානු ශූරතාවලියක් පැවැත්වීමේ ඓතිහාසික අවස්ථාවක් ශ්‍රී ලංකාවට උදාවී තිබේ. ලබන මැයි මස 10 වැනිදා සිට 24 දක්වා සුගතදාස ගෘහස්ථ ක්‍රීඩා සංකීර්ණයේදී පැවැත්වීමට කටයුතු යොදා ඇති ආසියානු බොක්සිං සම්මේලනයේ අවුරුදු 22න් පහළ සහ යොවුන් බොක්සිං ශූරතාවලිය ඉතිහාසයට එක්වනු ඇත්තේ 1967 වසරේ කොළඹ පැවැති තුන්වැනි ආසියානු බොක්සිං ශූරතාවලියෙන් පසු ශ්‍රී ලංකාවේ පැවැත්වෙන පළමු ආසියානු බොක්සිං ශූරතාවලිය ලෙසය. එමෙන්ම අවුරුදු 22න් පහළ සහ යොවුන් බොක්සිං ශූරතාවලියක් ශ්‍රී ලංකාවේ පැවැත්වෙන පළමු අවස්ථාව ලෙසත් එය ඉතිහාසගත වනු ඇත.
ශ්‍රී ලංකා බොක්සිං ආයතනය සහ ආසියානු බොක්සිං සම්මේලනය එක්ව පවත්වනු ලබන අවුරුදු 22න් පහළ සහ යොවුන් බොක්සිං ශූරතාවලිය සඳහා එම සම්මේලනයේ ලියාපදිංචි රටවල් 43ක් අතුරින් ක්‍රීඩක ක්‍රීඩිකාවන් 400-600ක් අතර ප්‍රමාණයක් සහභාගි වනු ඇතැයි අපේක්ෂා කරන බව ශ්‍රී ලංකා බොක්සිං ආයතනයේ සභාපති අනුරුද්ධ ශානක බණ්ඩාර මහතා ‘දිනමිණ’ට පැවසීය. ශ්‍රී ලංකා බොක්සිං ආයතනයේ සභාපති ධුරයට පත්ව මාස අටක් වැනි කෙටි කාලයකදී ආසියානු ශූරතාවලියක් මෙරට පැවැත්වීමට හැකියාව ලැබීම සතුටට කරුණක් බවත්, එම අවස්ථාව උදා වූයේ එළිමහන් බොක්සිං තරග පැවැත්වීමේ සිය සංකල්පය පිළිබඳ ආසියානු සම්මේලනයේ ඇගැයීමට ලක්වීම බවත් ඔහු කීවේය.
කොළඹ සහ මහනුවර කේන්ද්‍ර කරමින් බොක්සිං ආයතනය පසුගියදා පැවැත්වූ එළිමහන් බොක්සිං තරගාවලිය නැරඹීම සඳහා ආසියානු සම්මේලනයේ නියෝජිතයන් ද පැමිණ සිටි බව සභාපතිවරයා සඳහන් කළේය.
