ශ්‍රීපාද රක්ෂිතය තුළ අනවසරයෙන් නීති විරෝධී ලෙස ගස් කපමින් සිටි පුද්ගලයන් දෙදෙනකු නල්ලතන්නිය වනජීවී කාර්යාලයේ නිලධාරින් විසින් අත්අඩංගුවට ගෙන ඇත.
මේ පිළිබඳව කරන ලද විමසීමකදී අදහස් දැක්වූ නල්ලතන්නිය වනජීවී කාර්යාලයේ නිලධාරියකු පවසන ලද්දේ ශ්‍රීපාද රක්ෂිතයට ඇතුළු වී කිසිදු අවසරයකින් තොරව නීති විරෝධී ආකාරයෙන් ගස් කපමින් සිටි පුද්ගලයන් දෙදෙනකු පෙරේදා (04) අත්අඩංගුවට ගත් බවයි. වයස අවුරුදු 35-38ත් අතර වයස්වල පසුවන මෙම දෙදෙනා නල්ලතන්නිය වතුයායේ පදිංචිකරුවන් බවත් නල්ලතන්නියට ශ්‍රීපාද මාර්ගයේ තාවකාලික වෙළෙඳසලක් ඉදි කිරීම සඳහා මෙම ගස් කැපීම සිදු කරන්නට ඇතැයි සැක සිතන බවද එම නිලධාරියා පැවසීය.
මෙම දෙදෙනා අත්අඩංගුවට ගන්නා විට ඔවුන් ශ්‍රීපාද රක්ෂිතයේ ගස් දෙකක් කපා ඇති බවත් අත්අඩංගුවට ගත් එම දෙදෙනා හැටන් දිසා මහේස්ත්‍රාත් අධිකරණයට ඉදිරිපත් කිරීමට පියවර ගන්නා බවද එම නිලධාරියා වැඩිදුරටත් පැවසීය.
