පුද්ගලයකු පැහැරගෙන ගොස් ගිනි අවියක් පෙන්වා මුදල් හා දේපළ කොල්ලකෑමේ චෝදනාව මත සැකපිට අත්අඩංගුවට ගෙන පසුගිය වසරේ නොවැම්බර් මස 6 වැනි දින සිට අධිකරණ නියෝගයකින් රිමාන්ඩ් භාරයේ සිටි වැලිවේරිය පොලීසියේ උප පොලිස් පරීක්ෂකවරයා හා කොස්තාපල්වරයා ඇතුළු තවත් අයකු ගම්පහ මහාධිකරණ විනිසුරු රශ්මි සිංගප්පුලි මහතා විසින් රුපියල් ලක්ෂය බැඟින් වූ මුදල් හා ලක්ෂ දහය බැඟින් වූ ශරීර ඇප දෙකක් මත මුදා හැරියේය.
මෙහිදී සාක්ෂිකරුවන්ට බලපෑම් නොකරන ලෙසට හා විදේශ ගමන් තහනමකට යටත් කිරීමට ද විනිසුරුවරයා ඔවුන්ට ඇප කොන්දේසියක් පැනවීය. උප පොලිස් පරීක්ෂක චතුරංග දිසානායක, කොස්තාපල් තරංග චමිල කුමාර හා නිශාන්ත දමින්ද මාල් යන තිදෙනා මෙසේ ඇප මත මුදාහැරිණි. ජනාධිපති නීතිඥ සුමිත් සේනානායක මහතා සමඟ නීතිඥ නිසැලී බාලචන්ද්‍ර මෙනෙවිය විත්ති පාර්ශ්වය වෙනුවෙන් පෙනී සිටියහ. රජයේ අධි නීතිඥ ප්‍රභාත් දිසානායක මහතා, නීතිපතිවරයා වෙනුවෙන් පෙනී සිටියේය. අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය පැමිණිල්ල ගොනුකොට තිබිණි.
