ඉංගිරිය ප්‍රදේශයේ ප්‍රසිද්ධ පාසලක උසස් පෙළ පන්තියේ ඉගෙනුම ලබන සිසුවියක සාපරාධී බලහත්කාරයකට යටත් කිරීමේ චෝදනාව මත එම පාසලේම ආදි ශිෂ්‍යයන් දෙදෙනකු ඉංගිරිය පොලිසිය විසින් අත්අඩංගුවට ගැනිණි.
මෙලෙස අත්අඩංගුවට ගෙන ඇත්තේ ඉංගිරිය නව ගම්මානය සහ ඌරුගල ප්‍රදේශවල පදිංචි 18 හැවිරිදි සහ 21 හැවිරිදි තරුණයෝ දෙදෙනෙකි. සිද්ධියට අනුව මෙම පාසල් සිසුවිය පාසලින් පසු පැවැත්වුණු අතිරේක පන්තිවලට සහභාගී වී නැවත නිවෙසට පා ගමනින් පැමිණෙමින් සිටියදී ත්‍රිරෝද රථයකින් පැමිණි තරුණයන් දෙදෙනා ඇයගේ අතින් ඇද බලහත්කාරයෙන් ත්‍රිරෝද රියට නංවා ගැනීමට තැත්කර ඇති බවත්, බියට පත් ඇය ඔවුන්ගෙන් මිදී පොලීසිය දක්වා දිවගොස් ඒ සම්බන්ධයෙන් පැමිණිලි කර ඇති බවත්, වහා ක්‍රියාත්මක වූ ඉංගිරිය පොලීසියේ ස්ථානාධිපති කේ.ඒ.එන්.ඩී. කොල්ලුරේ මහතා ඇතුළු නිලධාරීන් අදාළ තරුණයන් දෙදෙනා අත්අඩංගුවට ගෙන ඇති බවත් වාර්තා වේ.
ඉංගිරිය පොලීසිය වැඩිදුර විමර්ශන සිදු කරයි.
