නීති විරෝධීව මෙරටට ආනයනය කර තිබූ රුපියල් කෝටි 120ක් පමණ වටිනා විදේශීය දුම්වැටි තොගයක් කොළඹ 15, ශ්‍රීමත් රාමනාදන් මාවතේ ලංකා දුම්කොළ සමාගමේ ප්‍රධාන කාර්යාලයේදී රේගු අධ්යක්ෂ ජනරාල් සරත් නෝනිස් මහතාගේ අධීක්ෂණය යටතේ පෙරේදා (04) පෙරවරුවේ විනාශ කෙරිණි.
රජයට අයවිය යුතු රුපියල් කෝටි 109ක් අහිමි කරමින් 2024 දී මෙම දුම්වැටි තොගය ඩුබායි, පාකිස්තානය හා චීනය යන රටවල්වලින් වරින් වර මෙරටට ගෙන්වා තිබේ. සෞඛ්‍ය අවවාද මුද්‍රණය නොකළ, විකිණීම තහනම් කර ඇති මෙම දුම්වැටි තොගය වෙළෙඳ පොළට පැමිණියේ නම් රජයට හිමි වීමට ගිය තීරු බදු මුදල් රුපියල් කෝටි 109ක් අහිමි වන බව රේගු මාධ්‍ය ප්‍රකාශක අතිරේක රේගු අධ්යක්ෂ සීවලී අරුක්ගොඩ මහතා පැවැසීය.
මෙවැනි ජාවාරම්කරුවන් කොටු කර ගැනීමට කෘත්‍රිම බුද්ධිය යොදවා බහලුම් පරීක්ෂා කිරිමේ තාක්ෂණය රේගුවට හදුන්වා දීමට කටයුතු කරමින් සිටින බවත් භාණ්ඩ හඳුනාගැනීමේ තාක්ෂණය ලබා ගැනීමට දැනටමත් අදාළ ස්කෑන් යන්ත්‍ර නිෂ්පාදනය කරන සමාගම් සමඟ සාකච්ඡා පවත්වා ඇති බවත් හෙතෙම කියා සිටියේය.
බහලුම් තුනක් තුළ විදේශීය දුම්වැටි අසූහත් ලක්ෂ අසූදාහක් පවතින බවත් පසුගිය කාලයේදී නීති විරෝධීව මෙරටට රැගෙන ඒමට තැත් කිරීමේදී ශ්‍රී ලංකා රේගු නිලධාරීන් මේ තොගය අත්අඩංගුවට ගත් බවත් කීවේය.
රේගුව අත්අඩංගුවට ගත් මෙම දුම්වැටි තොගය රේගු විමර්ශනවලින් අනතුරුව රාජසන්තක කිරීමෙන් පසු මෙලෙස විනාශ කිරීමට පියවර ගනු ලැබිණ.
මෙම අවස්ථාවට රේගු අධ්යක්ෂ ජනරාල් පී.බී.එස්.සී. නෝනිස් ඇතුළු රේගු නිලධාරීන් හා ලංකා දුම්කොළ සමාගමේ ජ්‍යෙෂ්ඨ කළමනාකාරීත්වය එක්ව සිටියහ.
ඡායාරූප – සුලෝචන ගමගේ
