පිටකොටුව බංගසාල වීදියේ පස් මහල් ගොඩනැඟිල්ලක ඊයේ (05) රාත්‍රී කාලයේ ඇතිවූ ගින්න මැඩ පැවැත්වීමට කොළඹ මහ නගර සභාවේ ගිනි නිවන රථ 08ක් යොදා දැඩි පරීශ්‍රමයක් දරන්නට ගිනි භටයන්ට සිදු විය.
ගින්න මහල් 04ක් පුරාවට පැතිර ගොස් තිබුණු අතර ආරක්ෂා වී තිබුණේ බිම් මහල පමණි.
ගින්න එක් මහලක හට ගන්නා අවස්ථාවේදීම ගිනි නිවන සේවා දෙපාර්තමේන්තුවේ නිලධාරීන් එම ස්ථානයට ළඟා වූවත්, එම රථ හැසුරවමින් ගින්න මැඩ පැවැත්වීමට විදුලි රැහැන් බාධාවක් වී තිබුණි. ඒ නිසා බොහෝ වේලාවක් එම නිලධාරීන්ට සිය රථවල ඇති උපාංග ඉහළට ඔසවා ඉහළ මහල් වෙත ගමන් කිරීමට නොහැකි විය. ගිනි නිවන භටයන්ට සිදු වූයේ ඉණිමං තබා ඉහළ මහල් වෙත ගොස් ගින්න පාලනය කිරීමට කටයුතු කිරීමටයි.
පැය තුනකට අධික කාලයක් ගින්න නිවා දැමීමට ගිනි නිවන භටයින් දැඩි උත්සහයක නිරත වූවත් පත්‍රය මුද්‍රණයට යන අවස්ථාව වන තුරුම ගින්න මුළුමනින්ම මැඬ පවත්වා නොතිබුණි.
ගින්න හටගත් ගොඩනැඟිල්ලේ වැඩි වශයෙන් තිබී ඇත්තේ ප්ලාස්ටික් මල් සහ ප්ලාස්ටික් විසිතුරු උපාංගයන්ය.
ඡායාරූප – රංජිත් අසංක
