අව්වැසිවලට නිරාවරණය වීම හේතුවෙන් භෞතික හා රසායනික ජීර්ණයට ලක්වූ බුදුරුවයාය සැතපෙන පිළිම වහන්සේගේ ආරක්ෂාවට දින 150කින් ඉදිකරන්නැයි කියූ පියස්ස වසර පහක් තිස්සේ ඉදිකර නැතැයි ජාතික විගණන කාර්යාලය නිකුත් කළ වාර්තාවක දැක්වෙයි.
දුර්ලභ පාෂාණයකින් නිමවා ඇති මෙම සැතපෙන පිළිම වහන්සේ සඳහා පියස්සක් ඉදිකිරීමට ප්‍රමුඛ අවධානය යොමු කරන ලෙස මධ්‍යම සංස්කෘතික අරමුදලට දැනුම් දී ඇත්තේ සංස්කෘතික අමාත්‍යාංශයයි.
මධ්‍යම සංස්කෘතික අරමුදල වෙත දුන් උපදෙස් අනුව පුරාවිද්‍යා දෙපාර්තමේන්තුවෙන් ලබාගත් අනුමැතියෙන් පසුව 2019 නොවැම්බර් 4 වැනි දින බුදුරුවයාය සැතපෙන පිළිම වහන්සේ සඳහා පියස්සක් ඉදිකිරීමේ කොන්ත්‍රාත්තුව සඳහා ප්‍රසම්පාදන ක්‍රියාවලිය ආරම්භ කර තිබේ. පසුව ලිඛිත ගිවිසුමකින් තොරව රුපියල් 1,941,433ක වටිනාකමකට දින 150ක් තුළ පියස්සේ ඉදිකිරීම් සම්පූර්ණ කිරීමට ඉදිකිරීම් ආයතනයට භාර දී තිබේ.
නමුත් විගණිත දිනය වූ 2024 ඔක්තෝබර් 06 වැනිදා වනවිටත් රුපියල් 874,019ක වටිනාකමක බිල්පත් ඉදිරිපත් වී තිබුණ ද කොන්ත්‍රාත්තුව සඳහා ගිවිසුමක් ඉදිරිපත් නොවීම හේතුවෙන් ගෙවීම් කටයුතු සිදු කිරීමට නොහැකි වීම මත ඉදිකිරීම් කටයුතු අතරමඟ ඇනහිට වසර පහක් ගතව තිබේ.
වැඩ සැලැස්මට අනුව පාලක මණ්ඩලයේ අනුමැතිය ඇතිව කොන්ත්‍රාත්කරු විසින් මෙම කාර්යය ආරම්භ කර තිබුණ ද එවකට සිටි අධ්‍යක්ෂ ජනරාල්වරයා මෙයට අදාළ ලිඛිත ගිවිසුමකට අත්සන් තබා නොතිබුණු බව මේ සම්බන්ධයෙන් අදහස් දක්වමින් කළමනාකාරීත්වය සඳහන් කර තිබේ.
ඒ අනුව, අදාළ ගෙවීම් සිදුකිරීමට නොහැකි වී තිබිණි. ගිවිසුම අත්සන් නොකිරීම හා කොරෝනා ව්‍යසනය නිසා මධ්‍යම සංස්කෘතික අරමුදලේ ඇති වූ මූල්‍ය අර්බුදය හේතුවෙන් මෙම කොන්ත්‍රාත්තුවේ වැඩ කිරීම නැවතී ගොස් තිබුණු බව ද පෙන්වා දෙන කළමනාකාරීත්වය ඉදිරියේදී එම කොන්ත්‍රාත්කරු සමඟ සාකච්ඡාවක් පැවැත්වීමට නියමිත අතර, මෙම දුර්ලභ පාෂාණයකින් නිමවා තිබූ පිළිම වහන්සේගේ ආරක්ෂාව සඳහා පියස්ස ඉදිකිරීම 2025 වැඩසැලැස්මට ඇතුළත් කරන බව ද සඳහන් කර තිබේ.
