ශ්‍රී ලංකා-කාම්බෝජ ද්වීපාර්ශ්වික සබඳතා සහ කලාපීය සහයෝඟීතාව තවදුරටත් ශක්තිමත් කිරීම සම්බන්ධයෙන් දෙරටේ අවධානය යොමුකර තිබේ.
කාම්බෝජයේ ශ්‍රී ලංකා තානාපතිනී විජයන්ති එදිරිසිංහ මහත්මිය සහ එරට අගමැති සම්ඩෙච් මෝහා බෝවෝ තිපාදෙයි හන් මියුනට් මහතා අතර පැවැති සාකච්ඡාවකදී මේ සම්බන්ධයෙන් අවධානය යොමුකර තිබෙන අතර ෆොනම් පෙන් හි සාම මන්දිරයේ දී මෙම හමුව පැවැති බව විදේශ කටයුතු අමාත්‍යාංශය පවසයි.
කාම්බෝජයේ ප්‍රෙහ් බැට් සම්ඩෙච් බොරොම්නීත් සිහමොනි රජු වෙත අක්ත පත්‍ර පිළිගැන්වීමෙන් අනතුරුව මෙම හමුව පවත්වා තිබෙන අතර එම හමුවේ දී ශ්‍රී ලංකාවේ විදේශ කටයුතු, විදේශ රැකියා සහ සංචාරක අමාත්‍යාංශය හරහා ශ්‍රී ලංකාව විසින් ගනු ලැබූ ප්‍රධාන මුලපිරීම් කිහිපයක් පෙන්වාදී ඇත. ඊට අමතරව පන්සලෙන් පන්සලට රාජ්‍ය තාන්ත්‍රිකභාවය සහ බෞද්ධ සබඳතා වර්ධනය කිරීම, ශක්තිමත් කිරීම අරමුණු කරගත් මුලපිරීම් ඇතුළුව දෙරට අතර අනාගත සහයෝගීතාවන් ඒ මහත්මිය විස්තර කර තිබේ.
සංස්කෘතිකමය වශයෙන් වැදගත් ව්‍යාපෘති සාර්ථක කර ගැනීම සඳහා කාම්බෝජයේ සහාය ඉල්ලා තිබෙන තානාපතිවරිය වෙළඳාම, ආයෝජන සහ සංචාරක ක්ෂේත්‍රයන්හි වැඩිදියුණු කළ සහයෝගීතාවය තුළින් අන්‍යෝන්‍ය ප්‍රතිලාභ ලබාගැනීම සඳහා පවතින ආර්ථික සබඳතා ගැඹුරු කිරීමට ශ්‍රී ලංකාව දක්වන දැඩි උනන්දුව ප්‍රකාශකර ඇත.
ශ්‍රී ලංකාව විසින් ජාතික පරිමාණයෙන් Clean Sri Lanka ව්‍යාපෘතිය දියත් කර ඇති බව ද එය වැඩිදියුණු කළ සදාචාරාත්මක මූලධර්ම සඳහා සදාචාරාත්මක කැපවීමක් සමඟ පිරිසිදු භෞතික පරිසරයක් පෝෂණය කිරීම සඳහා නිර්මාණය කර ඇති මුලපිරීමක් බව ද සඳහන්කර තිබෙන ශ්‍රී ලංකා තානාපතිනිය, ජනාධිපති අනුර කුමාර දිසානායක මහතාගේ මඟ පෙන්වීම යටතේ ක්‍රියාත්මක මෙම ව්‍යාපෘතිය, තිරසාර සංවර්ධනය සහ ප්‍රජා යහපැවැත්ම සඳහා ශ්‍රී ලංකාව දක්වන කැපවීම පිළිබිඹු කරන බව ද සඳහන්කර තිබේ.
ASEAN සහ අග්නිදිග ආසියානු රටවල සාමාජිකයකු වන කාම්බෝජය සමඟ ශක්තිමත් සබඳතාවල වැදගත්කම පිළිබඳ ශ්‍රී ලංකාවේ විශ්වාසය නැවත තහවුරු කරමින්, ගෝලීය ආර්ථික සංවර්ධනය හා වර්ධනය සඳහා තීරණාත්මක ක්ෂේත්‍රවල සමීප සහයෝගීතාවය අත්‍යවශ්‍ය බව ද තානාපතිවරිය අවධාරණය කර ඇත. බහුවිධ අංශ හරහා ශ්‍රී ලංකාව සමඟ ද්විපාර්ශ්වික සම්බන්ධතාවය ශක්තිමත් කිරීම සඳහා කාම්බෝජයේ කැපවීම අගමැති හන් මියුනට් මහතා නැවත අවධාරණය කර තිබෙන අතර මෙම සහයෝගීතාවය ආර්ථික හා සංස්කෘතික හුවමාරුව ඉහළ නැංවීමට පමණක් නොව, කලාපීය ස්ථාවරත්වයට සහ රටවල් දෙකෙහි සමෘද්ධියට ද දායක වන බව පෙන්වා දී තිබේ.
අනාගත මුලපිරීම් සම්බන්ධයෙන් දෙපාර්ශ්වයම ශුභවාදී අදහස් පළකර තිබෙන අතර, පොදු අභියෝගවලට මුහුණ දීම සඳහා සහයෝගීව කටයුතු කිරීමට සහ අන්‍යෝන්‍ය ප්‍රතිලාභ සඳහා නැ‍ඟී එන අවස්ථාවන්ගෙන් ප්‍රයෝජන ගැනීමට එකඟ වී ඇත. මෙම ඉහළ මට්ටමේ සම්බන්ධතාවය දෙරට අතර දිගුකාලීන සම්බන්ධතාවය ශක්තිමත් කිරීමේ වැදගත් පියවරක් සනිටුහන් කර තිබේ.
