පළාත් පාලන මැතිවරණය කඩිනමින් පවත්වන්න කියා අධිකරණයට ප්‍රථමයෙන්ම ගියේ සමඟි ජන බලවේගය බව සමඟි ජන බලවේගයේ මහලේකම්, පාර්ලිමේන්තු මන්ත්‍රී රංජිත් මද්දුම බණ්ඩාර මහතා ප්‍රකාශ කළේය.
සමඟි ජන බලවේගය ප්‍රධාන කාර්යාලයේ ඊයේ (4) පැවැති මාධ්‍ය හමුවට සහභාගී වෙමින් සමඟි ජන බලවේගයේ මහලේකම්, පාර්ලිමේන්තු මන්ත්‍රී රංජිත් මද්දුම බණ්ඩාර මහතා මේ බව කියා සිටියේය.
එහිදී වැඩිදුරටත් අදහස් දැක්වූ සමඟි ජන බලවේගයේ මහලේකම්, පාර්ලිමේන්තු මන්ත්‍රී රංජිත් මද්දුම බණ්ඩාර මහතා …
‘පළාත් පාලන මැතිවරණය සඳහා නාමයෝජනා කැඳවන්න මැතිවරණ කොමිෂන් සභාව දින නියම කරලා තිබෙනවා. මේ මාසයේ 17ත් 20ත් අතර පළාත් පාලන ආයතන 337කට නාමයෝජනා කැඳවලා තිබෙනවා.
පළාත් පාලන මැතිවරණය කඩිනමින් පවත්වන්න කියා අධිකරණයට ප්‍රථමයෙන්ම ගියේ සමඟි ජන බලවේගයයි. පසුගිය රජය දිගින් දිගටම පළාත් පාලන මැතිවරණය කල්දැමීම හේතුවෙන් සමඟි ජන බලවේගය අධිකරණයට ගොස් වහාම මැතිවරණය පවත්වන්න කටයුතු කරන්න කියලා ඉල්ලා සිටියා. ඒ අනුව පළාත් පාලන මැතිවරණය පවත්වන ලෙස අධිකරණය නියෝගයක් ලබා දුන්නා. ඒ වගේම පළාත් පාලන මැතිවරණය සම බිමක සාධාරණව පවත්වන්න අය-වැය විවාදයෙන් පසුව නාමයෝජනා භාර ගන්න කියලා සමඟි ජන බලවේගය සහ විරුද්ධ පක්ෂයේ සියලුම කණ්ඩායම් ඉල්ලීමක් කළා. නමුත් රජය ඔවුන්ගේ අඩු-පාඩු වසා ගැනීමට පළාත් පාලන මැතිවරණය අය-වැය විවාදය අතර තුර කාලයේ පවත්වන්න කටයුතු කළා. නමුත් මැතිවරණ කොමිෂන් සභාව විසින් පළාත් පාලන මැතිවරණය කල් නොදමා අය-වැය විවාදය මඟහැරලා මැතිවරණය පැවැත්වීමට කටයුතු සූදානම් කිරීම ගැන මැතිවරණ කොමිෂන් සභාවට අපි ස්තූතිවන්ත වෙනවා. ඒ වගේම රටේ සාමාන්‍ය පෙළ හෝ උසස් පෙළ විභාගයන් පවතින කාල සීමාවක් තුළ මැතිවරණ පවත්වා නැහැ. නමුත් මෙවර සාමාන්‍ය පෙළ විභාගයත් මේ මැතිවරණ කාලසීමාව තුළ පැවැත්වෙනවා.
ඒ වගේම පළාත් පාලන මැතිවරණයට සමඟි ජන බලවේගය සූදානම් වෙලා සිටින්නේ දීර්ඝ කාලයක සිටයි. ඒ අනුව සමඟි ජන බලවේගය පළාත් පාලන මැතිවරණය සඳහා නාමයෝජනා කැඳවීමට කටයුතු කළා. ඒ අනුව දහස් ගණනක් නාමයෝජනා සමඟි ජන බලවේගයට ලැබී තිබුණා. පසුගිය දිනවල සෑම දිස්ත්‍රික්කයකම නාමයෝජනා මණ්ඩල වෙන වෙනම රැස් කරලා පළාත් පාලන මැතිවරණයට ඉදිරිපත් වන අපේක්ෂකයන් සම්මුඛ පරීක්ෂණයට ලක් කරන්න කටයුතු කළා. ඒ වගේම මෙවර පළාත් පාලන මැතිවරණයේදී සියයට විසි පහක තරුණ නියෝජනයක් නීතිගත කරලා තිබෙනවා.
මේ යෝජනාව ගෙන ආවෙත් සමඟි ජන බලවේගයේ ඉමිතියාස් මහතායි. අද වනවිට ඒ යෝජනාව පාර්ලිමේන්තුව තුළ සම්මත වෙලා තිබෙනවා. සමඟි ජන බලවේගයෙන් පළාත් පාලන මැතිවරණය සඳහා තරග කරන්න තරුණ තරුණියන් විශාල පිරිසක් මේ වන විට අයදුම්පත් යොමු කර තිබෙනවා. ඔවුන්ව සම්මුඛ පරික්ෂණවලට භාජනය කරලත් තිබෙනවා. ඒ වගේම වෙනත් පක්ෂවල පිරිස් ද, තරග කරන්න ඉල්ලීම් කරලා තිබෙනවා. විශේෂයෙන් මේ සියලු දෙනාටම ආරාධනා කරනවා සමඟි ජන බලවේගය සමඟ දේශපාලනය කරන්න එකතු වෙන්න කියලා.
