වර්තමානය වන විට ලෝකයේ අති විශාල කාබනික වෙළෙඳපොළක් නිර්මාණය වී ඇති බවත්, එහි කොටසක් අත්පත් කර ගැනීමට අපේ රට අවධානය යොමු කළ යුතු බවත් කර්මාන්ත සහ ව්‍යවසායකත්ව සංවර්ධන ඇමැති සුනිල් හඳුන්නෙත්ති මහතා පැවැසීය.
ඇමැතිවරයා මේ බව පැවැසුවේ මෙරට ජාතික කාබනික කෘෂිකර්මාන්තය සඳහා නීතිමය තත්ත්වය සහ එහි යෝජිත වෙනස්කම් පිළිබඳව ජාතික උපදේශන වැඩමුළුවක් පෙරේදා (04) කොළඹ රේණුකා හෝටලයේදී පැවැති අවස්ථාවේදීය.
අපනයන සංවර්ධන මණ්ඩලය (EDB) යටතේ ක්‍රියාත්මක වන ජාතික කාබනික පාලන ඒකකය (NOCU) සහ ජාත්‍යන්තර වෙළෙඳ මධ්‍යස්ථානයේ එක්සත් රාජධානියේ වෙළෙඳ හවුල් වැඩසටහන (UKTP) එක්ව මෙය සංවිධාන කර තිබිණි.
රාජ්‍ය සහ පෞද්ගලික පාර්ශ්වකරුවන් සඳහා ජාතික කාබනික කෘෂිකාර්මික ක්‍රමවේදයේ නෛතික රාමුව තුළ යෝජිත වෙනස්කම් හඳුන්වාදීම මේ එක්දින පුහුණු වැඩමුළුවේ අරමුණයි.
මෙරට ජාතික කාබනික ප්‍රමිතිය, එක්සත් රාජධානියේ (GB) කාබනික නියමයන් සමඟ ඒකාබද්ධ කිරීම, නියාමන හිඩැස් හඳුනා ගැනීම සහ ජාත්‍යන්තර ප්‍රමිතීන්ට අනුකූල වීම සහතික කිරීම වැනි ප්‍රධාන ක්ෂේත්‍ර පිළිබඳව මෙහිදී අවධානය යොමු කළ අතර, මේ සඳහා තාක්ෂණික සහාය UKTP වැඩසටහන යටතේ දෙන ලදි.
මෙරට කාබනික නිෂ්පාදනවල විශ්වසනීයත්වය සහතික කිරීමට ජාතික කාබනික පාලන ඒකකය (NOCU) ක්‍රියාත්මක වෙයි. මේ වන විට මෙරට සහතික ලත් කාබනික අපනයනකරුවන් සහ සැකසුම්කරුවන් 400ක් පමණ සිටින අතර, කාබනික නිෂ්පාදන නිෂ්පාදකයන් 12,000කට අධික සංඛ්‍යාවක් හඳුනාගෙන ඇත. වර්තමානය වන විට වාර්ෂිකව ඩොලර් බිලියන 0.5කට අධික අපනයන ආදායමක් මේ ක්ෂේත්‍රයෙන් ලබා ගනී.
2000දී යුරෝ බිලියන 15.1ක් වූ ගෝලීය කාබනික වෙළෙඳපොළ 2023 වන විට යුරෝ බිලියන 136.4 දක්වා වර්ධනය වී ඇති අතර, අමෙරිකා එක්සත් ජනපදය, ජර්මනිය සහ චීනය ලොව විශාලතම කාබනික වෙළෙඳපොළ ලෙස හඳුනාගෙන ඇත. එමෙන්ම රටවල් 188කට වැඩි ප්‍රමාණයක් 2023 වන විට හෙක්ටයාර මිලියන 98.9ක භූමි ප්‍රදේශයක කාබනික කෘෂි ක්‍රියාකාරකම් ආරම්භ කර ඇති අතර, රටවල් 75ක පූර්ණ කාබනික නියමයන් ක්‍රියාවට නැංවීම සාර්ථක කරගෙන තිබේ.
ශ්‍රී ලංකා අපනයන සංවර්ධන මණ්ඩලයේ සභාපති මංගල විජේසිංහ, එක්සත් රාජධානියේ UKTP වැඩසටහනේ උපදේශකයන්, අපනයන සංවර්ධන මණ්ඩලයේ නිලධාරීන් ඇතුළු අනෙකුත් රාජ්‍ය සහ පෞද්ගලික අංශ නියෝජිතයෝ මේ වැඩමුළුවට සහභාගි වූහ.
