අයහපත් කාලගුණික තත්ත්වය හමුවේ ගංවතුරෙන් පීඩාවට පත් ජනතාවට සහන සැලසීමට අම්පාර දිස්ත්‍රික්කයේ හැඩඔය ප්‍රදේශයට නාවික හමුදා ආපදා සහන කණ්ඩායමක් අනුයුක්ත කිරීමට පෙරේදා (04) කටයුතු කෙරිණි.
අධික වර්ෂාපතනය හේතුවෙන් අම්පාර හැඩඔය ප්‍රදේශයේ ලාහුගල නීලගිරි රාජමහා විහාරස්ථානයේ පිවිසුම් මාර්ගය ජලයෙන් යටවීම නිසා නාවික හමුදා ආපදා සහන කණ්ඩායමක් මෙලෙස අනුයුක්ත කර ඇත. ප්‍රදේශයේ ආපදා සහන මෙහෙයුම් කටයුතු සඳහා ශ්‍රී ලංකා යුද්ධ හමුදාව, ශ්‍රී ලංකා ගුවන් හමුදාව, ශ්‍රී ලංකා පොලීසිය සහ ආපදා කළමනාකරණ මධ්‍යස්ථානය ඇතුළු පාර්ශ්වවල ද දායකත්වය ලැබී තිබේ.
ලාහුගල නීලගිරි රාජමහා විහාරස්ථානයේ පැවැත්වෙන සර්වඥ ධාතූන් තැන්පත් කිරීමේ පුණ්‍ය මහෝත්සවයට පැමිණෙන බැතිමතුන්ට ප්‍රවාහන පහසුකම් සැලසීම, ගංවතුර හමුවේ විහාරස්ථානයට පැමිණෙන බැතිමතුන්ට ආරක්‍ෂිතව ගමන් කිරීමට පහසුකම් සැලසීම, ප්‍රදේශයේ ජනතාවගේ දෛනික කටයුතු සිදු කර ගැනීමට අවශ්‍ය ප්‍රවාහන පහසුකම් සැලසීම ඇතුළු ආපදා සහන මෙහෙයුම් සඳහා නාවික හමුදාව අනෙකුත් ආපදා සහන කණ්ඩායම් හා එක්ව දායකත්වය ලබාදේ.
