ලෝකයේ දියුණු වන සහ වෙනස් වන තත්ත්වයන් හඳුනා ගනිමින් සන්නිවේදනය කළ හැකි ආකාරයට සිංහල භාෂාව පොහොසත් විය යුතු බව අධිකරණ සහ ජාතික ඒකාබද්ධතා ඇමැති, නීතිඥ හර්ෂණ නානායක්කාර මහතා පැවැසීය.
ඇමැතිවරයා මේ අදහස් පළ කළේ මාර්තු මස 02 වැනි දිනට යෙදෙන සිංහල භාෂා දින සැමරුම් උත්සවය වෙනුවෙන් රාජගිරිය, රාජ්‍ය භාෂා දෙපාර්තමේන්තුවේ පෙරේදා (04) පැවැති උත්සවය අමතමිනි.
මුනිදාස කුමාරතුංග සූරීන් අභාවප්‍රාප්ත වූ දිනය වන මාර්තු මස 02 වැනිදා පදනම් කර ගනිමින් සෑම වසරකම මෙදින සිංහල භාෂා දිනය සමරනු ලබයි. සිංහල භාෂාවේ ප්‍රගමනයට සහ උන්නතියට දායකත්වය දී මෙලොවින් සමුගත් මහා පඬිවර කුමාරතුංග මුනිදාස මැතිඳුන් ඇතුළු සියලු දෙනා අනුස්මරණය කිරීමෙන් අනතුරුව උත්සවය ආරම්භ විය.
සැමරුම් උත්සවය අමතමින් වැඩිදුරටත් අදහස් පළ කළ ඇමැතිවරයා මෙසේ ද සඳහන් කළේය.
“සිංහල භාෂාවේ උන්නතියට විශාල වැඩ කොටසක් ඉටු කළ මුනිදාස කුමාරතුංග සූරීන්ගේ ගුණානුස්මරණ දිනය මූලික කර ගනිමින් සිංහල භාෂා දිනය ප්‍රකාශයට පත් කර තිබෙනවා. එතුමාගේ ගැඹුරු චින්තනය, පර්යේෂණ දායකත්වය, පොතපත සිංහල භාෂාවේ අභිවෘද්ධියට කොතරම් දායකත්වයක් ලබා දුන්නාද යන්න මෙහි සිටින සියලු දෙනා දන්නවා. භාෂා ශාස්ත්‍රීය අංශයෙන් මෙන්ම සාහිත්‍යමය වශයෙනුත් ඒ මැදිහත්වීම ඉතා වටිනවා. සිංහල භාෂා දිනය සමරන අද වැනි දවසක සිංහල භාෂාව මුහුණ දෙන අභියෝග සහ ප්‍රශ්න පිළිබඳවත් අවධානය යොමු විය යුතුයි. ලෝකය ශීඝ්‍රයෙන් දියුණු වෙනවා. වෙනස් වෙනවා. ඒ අලුත් තත්ත්වයන් හඳුනා ගනිමින් සන්නිවේදනය කළ හැකි ආකාරයට සිංහල භාෂාව පොහොසත් විය යුතුයි. සිංහල භාෂාවට පවතින කැමැත්ත සමාජයෙන් දුරස්වන තත්ත්වයක් දකින්න පුළුවන්. සිංහල භාෂාව යනු සුන්දර අර්ථ පූර්ණ භාෂාවක්. අපේ චින්තනය, සංස්කෘතිය සහ සමාජය සමඟ සිංහල භාෂාව තදින් බැඳී තිබෙනවා. මේ සභාවේ සිටින මහාචාර්යතුමන්ලා, විද්වතුන් සමඟ එක්ව සිංහල භාෂාවේ ඒ අනන්‍යතාව ආරක්ෂා කිරීම රාජ්‍ය භාෂා දෙපාර්තමේන්තුව සතු වගකීමක් වෙනවා.
සමාජයෙන් ගිලීහී තිබෙන සංස්කෘතික වටිනාකම, අපේකම රැක ගැනීම වර්තමාන රජයේ අරමුණයි. මෙතෙක් කාලයක් සිංහල, දමිළ, මුස්ලිම් ජනතාව වෙන් වෙන් වශයෙන් සමරනු ලැබූ සියලු උත්සව එක්කරමින් මේ වසරේ ඔක්තෝබර් මාසයේදී එක් දිනයක උත්සවයක් පැවැත්වීම කෙරෙහි රජයේ අවධානය යොමුවී තිබෙනවා. විශේෂයෙන් රාජ්‍ය පරිපාලන කටයුතු, අධ්‍යාපන කටයුතු සිංහල භාෂාවෙන් ඉටු කිරීමේදී ගැළපෙන පරිදි සිංහල භාෂාවට අවශ්‍ය වචන සම්පාදනයට මෙන්ම ලෝකයේ බිහිවන නව විෂය අනුව සිංහල භාෂාව පොහොසත් කිරීමට අවශ්‍ය පද මාලා සම්පාදනයට රාජ්‍ය භාෂා දෙපාර්තමේන්තුව මැදහත්ව කටයුතු කරනවා. මේ වසරේ සිංහල භාෂා දිනය සමරන අවස්ථාවේ සම්මානිත මහාචාර්ය ජේ. බී. දිසානායක මැතිතුමාට උපහාර පිදීම ඉතා වැදගත් වෙනවා. එතුමා සිංහල භාෂාවේ මෙන්ම රාජ්‍ය භාෂා දෙපාර්තමේන්තුවේ දියුණුවට විශාල දායකත්වයක් දී තිබෙනවා.”
සිංහල භාෂාවේ මෙන්ම රාජ්‍ය භාෂා දෙපාර්තමේන්තුවේ දියුණුවට විශාල දායකත්වයක් දීම වෙනුවෙන් සම්මානිත මහාචාර්ය ජේ. බී. දිසානායක මහතාට උපහාර පුද කිරීම මෙහිදී සිදු වූ අතර, උත්සවයේ ප්‍රධාන දේශනය මහාචාර්ය සඳගෝමී කෝපරහේවා මහතා විසින් පවත්වන ලදි.
