මාධ්‍යවේදිනි ශ්‍රියානි විජේසිංහ මහත්මියගේ සැමියාගේ අබිරහස් මරණය සම්බන්ධයෙන් වැඩිදුර විමර්ශන සිදු කිරීමට අපරාධ පරීක්ෂණ දෙපාර්තමේන්තුවට භාර දීමට ගල්කිස්ස අතිරේක මහේස්ත්‍රාත් හේමාලි හාල්පන්දෙණිය මහත්මිය නියෝග කර තිබේ.
ඒ අනුව ලබන18 වැනිදා අධිකරණය හමුවේ පෙනී සිටින ලෙස මහේස්ත්‍රාත්වරිය අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට නොතිසි නිකුත් කර ඇත. ශ්‍රියානි විජේසිංහ නැමැති මාධ්‍යවේදිනියගේ සැමියා දෙහිවල වෛද්‍ය පාරේ පදිංචිව සිටි 60 හැවිරිදි අයෙකි.
ඔහුගේ මරණය සම්බන්ධයෙන් වූ නඩුව විවෘත අධිකරණය හමුවේ පෙරේදා (04) කැඳවූ අවස්ථාවේදී මහේස්ත්‍රාත්වරිය මේ නියෝගය කර ඇත.
මියගිය පුද්ගලයා ජනවාරි මස පළමු වැනි දා රැකියාවට පිටත්ව ගොස් නැවත නිවෙස කරා නොපැමිණිම හේතුවෙන් ඒ පිළිබඳව සොයා බැලීමේදී ඊට පසුදින එනම් ජනවාරි 2 වැනි දින දකුණු කොළඹ ශික්ෂණ රෝහලේ තැළුම් පහරවල් සහිතව ඉතා අසාධ්‍ය තත්ත්වයෙන් සිටියදී සොයා ගෙන තිබූ අතර අසාධ්‍ය තත්ත්වයේ සිටි තුවාලකරු ජනවාරි මස 03 වැනි දින උදෑසන මියගොස් ඇති බව අධිකරණයට වාර්තා කර ඇත.
මියගිය පුද්ගලයා දෙහිවල හිල් වීදියේ නීතිඥවරියකට අයත් නිවෙසෙහි මිදුලෙහි වැටී සිටින බවට නීතිඥවරියගේ සැමියා වන හිටපු ගුවන් හමුදා නිලධාරිවරයා 119 පොලිස් හදිසි ඇමතුම් අංශයට දැනුම් දී ඇති බවත් එම දුරකතන ඇමතුමට අනුව රාත්‍රී 11ට පමණ දෙහිවල පොලීසියේ නිලධාරීන් එම ස්ථානයට ගොස් පරීක්ෂා කර තුවාල සහිත පුද්ගලයා රෝහල්ගත කිරීමට කටයුතු නොකර, තුවාලකරු සෝදා ඔහුට වෙනත් ඇඳුම් ඇන්දවීමට කටයුතු කර තිබීම සැකයට තුඩු දෙන බව අගතියට පත් පාර්ශ්වය වෙනුවෙන් කරුණු දක්වමින් නීතිඥ ගීත්ම ප්‍රනාන්දු මහතා අධිකරණය හමුවේ සඳහන් කළේය.
මරණය සම්බන්ධයෙන් දෙහිවල පොලීසිය නිසි විමර්ශනයක් සිදුකර නොමැති බවඳ එම නීතිඥවරයා තවදුරටත් කරුණු දක්වමින් කියා සිටියේය.
නිවෙසේ හිමිකරු ඇතුළු නිවැසියන්ගෙන් මේ වනවිට ප්‍රකාශ ලබාගෙන ඇති බව දෙහිවල පොලීසිය අධිකරණය හමුවේ කරුණු දක්වා සිටියේය.
ඉදිරිපත්වූ කරුණු සළකා බැලූ අතිරේක මහේස්ත්‍රාත්වරිය මරණයට හේතුව මොට ආයුධයකින් පහරදීමක් ලෙසට මරණ පරීක්ෂණ වාර්තාවේ සඳහන් වී තිබීම සහ මරණය සම්බන්ධයෙන් දෙහිවල පොලීසියෙන් සාධාරණ විමර්ශනයක් සිදු කිරීම බලාපොරොත්තු විය නොහැකි වීම යන කරුණු මත මරණය සම්බන්ධයෙන් වැඩිදුර විමර්ශන කටයුතු සිදුකිරීමට අපරාධ පරීක්ෂණ දෙපාර්තමේන්තුවට භාර දී තිබේ.
අදාළ නඩුව නැවත මාර්තු මස 18 වැනි දින කැඳවීමට නියමිතය.
