මනුෂ්‍ය පරිභෝජනයට නුසුදුසු ආනයනික තිරිඟු පිටි ටොන් 750 ට අධික ප්‍රමාණයක් ඊයේ(05) වත්තල, ඇලකන්ද පාර, උස්වැටකෙයියාව ප්‍රදේශයේ සොයා ගෙන තිබේ. පාරිභෝගික කටයුතු පිළිබඳ අධිකාරියට ලැබුණු තොරතුරක් අනුව පිටකොටුව ප්‍රදේශයේ සිදුකරන ලද වැටලීමකදී අනාවරනය කරගත් තොරතුරු මත උස්වැටකෙයියාව ප්‍රදේශයේ ගබඩාකර වෙළෙඳ පොළට නිකුත් කිරීමට සුදානම් කර තිබු මෙම තිරිඟු පිටි අඩංගු ඇසුරුම් 30,000ක් සොයා ගෙන ඇත.
අදාළ තිරිඟු පිටිවල නිෂ්පාදිත දිනය පසුගිය වසරේ මාර්තු- මැයි මාසය ලෙසත් කල් ඉකුත්වන දිනය මෙම වසරේ මාර්තු- මැයි ලෙසත් සදහන් කර තිබු අතර එම තොගය දැඩි ලෙස කෘමි ආසාදනයට ලක්ව තිබු බැවින් තවදුරටත් ඉදිරියේදී මෙම තොග වෙළෙඳපොළට නිකුත්වීම වැලැක්වීම සඳහා අදාළ භාණ්ඩ තොගය නිලධාරීන් භාරයට ගෙන වැඩිදුර විමර්ශන කටයුතු මේ වන විට සිදු කරමින් පවතී. පසුගිය කාල සීමාව තුළ ස්ථාන ගණනාවකින්ම මෙවැනි මනුෂ්‍ය පරිභෝජනයට නුසුදුසු තිරිඟු පිටි තොග සම්බන්ධව වැටලීම් සිදුකරන ලද අතර ඒ සම්බන්ධව නීතිමය පියවර ගනිමින් පවතී . එමෙන්ම මෙවැනි භාණ්ඩ තවදුරටත් නැවත සකස් කර මනුෂ්‍ය පරිභෝජනයට නිකුත් කිරීමට ඉඩ ඇති බැවින් එවැනි ක්‍රියාවන් වැලැක්වීමට පාරිභෝගික කටයුතු පිළිබඳ අධිකාරිය නිරන්තරව කටයුතු කරන අතර එවැනි වංචනික වෙළෙදුන් සම්බන්ධව තොරතුරු වෙතොත් අධිකාරිය දැනුවත් කරන ලෙසත් මහජනතාවගෙන් ඉල්ලා සිටී.
එමෙන්ම මෙම ගැටලුව අඛණ්ඩව වෙළෙඳපොළ තුළ වාර්තා වන බැවින් තිරිඟු පිටි මිලදී ගැනීමේදී සැපයුම් කරුවන් සහ අදාළ භාණ්ඩවල තත්ත්වය සම්බන්ධව දැඩි සැලකිල්ලක් දක්වන ලෙසත් අතරමැදි පුද්ගලයින් වෙළෙපොළට භාණ්ඩ සැපයීමේදී ඔවුන් සම්බන්ධව විමසිලිමත් වෙමින් මිලදී ගැනීම් සිදුකරන ලෙසත් ව්‍යපාරිකයින්ගෙන් ඉල්ලා සිටී.
