උතුරු මැද පළාත් සභාවේ හිටපු මහ ඇමැති එස්.එම්. රංජිත් සමරකෝන්ට සහ පෞද්ගලික ලේකම්වරිය ලෙස කටයුතු කළ ඔහුගේ බිරිය වන ශාන්ති චන්ද්‍රසේනට එරෙහිව පවරා ඇති අල්ලස් නඩුවේ තීන්දුව ලබන අප්‍රේල් 2 වැනිදා ප්‍රකාශ කිරීමට කොළඹ මහාධිකරණය දින නියම කළේය.
එස්.එම්. රංජිත් සමරකෝන් උතුරු මැද මහ ඇමැතිවරයා ලෙස කටයුතු කළ 2012 වසරේ සැප්තැම්බර් මස 27 සහ 2014 වසරේ දෙසැම්බර් මස 31 අතර කාලය තුළදී ඉන්ධන දීමනාව වැටුප සමඟ ලබාගෙන තිබියදී නැවත ඉන්ධන දීමනාව ලෙස රුපියල් 26,80,528.10ක මුදලක් ලබා ගැනීමට රජයේ නිලධාරීන් පෙලඹවීම මඟින් අල්ලස් පනතේ දූෂණය නම් වරද සිදු කළේ යැයි අල්ලස් කොමිසම නඩුව ගොනු කර තිබේ.
මෙම නඩුව කොළඹ මහාධිකරණ විනිසුරු ආදිත්‍ය පටබැඳි මහතා ඉදිරියේ විභාගයට ගත් අතර පෙරේදා (04) විත්තියේ දේශන අවසන් කෙරිණි.
අල්ලස් කොමිසමේ සහකාර අධ්‍යක්ෂ ජනරාල් අසිත ඇන්තනි පැමිණිල්ල මෙහෙයවූ අතර විත්තිකරු වෙනුවෙන් චින්තක උඩදෙණිය, සහන් වීරසේකර, තරුෂි ගමගේ සමඟ දර්ශන කුරුප්පු යන නීතිඥ මහත්ම මහත්මීහු පෙනී සිටියහ.
