නුවරක සෙනෙහස
යොවුන් ප්‍රේමය තුළ ජීවමාන වන සම්පූර්ණයෙන්ම කළු හෝ සුදු නොවන අළු චරිත හිමි මිනිසුන්ගේ සියලු කතා එක්කොට ලියැවුණු අපූරු නිර්මාණයකි. විටෙක සුන්දර විටෙක ඛේදවාචකයක් වන යොවුන් නවකතාවකි. තරුණ තරුණියන්ට කියවීමට රසවිඳීමට ප්‍රිය කරනු ලබන ආකාරයෙන් කෘතිය නිර්මාණය කර ඇත.
කර්තෘ – දිගැසි පබසරා අමරසිංහ
ප්‍රකාශනය – දිගැසි ප්‍රකාශනය
මිල – රු. 950කි.
සංගීතවේදී වීරසිංහ පීරිස්ට සාහිත්‍ය අබිමන්
ප්‍රවීණ සංගීතවේදී වීරසිංහ පීරිස් මහතා කැස්බෑව සාහිත්‍ය අබිමන් සම්මාන උලෙළේදී ඇගැයීමකට ලක් විය. කැස්බෑව නගර සභා රංග ශාලාවේදී සම්මාන උලෙළ පැවැත්විණි. එහිදී කලා ශිල්පීහු රැසක් ඇගැයීමට ලක් වූහ. වීරසිංහ පීරිස් මහතා ළමා ගීත 16ක් ඇතුළත් සංයුක්ත තැටියක් මීට වසර දොළහකට පමණ පෙර එළිදක්වා තිබේ. එය නම් කර තිබුණේ පුංචි පුංචි තරු යනුවෙනි. සිංහල, දමිළ, ඉංග්‍රීසි සහ වැදි භාෂාවලින් එම ගීත සමන්විත විය. ගී පද රචනය, තනු නිර්මාණය, සංගීතය සහ නිෂ්පාදනය කරනු ලැබුවේ වීරසිංහ මහතා විසිනි. සංගීත සංයෝජනය සහ නාද ශික්‍ෂණය කරනු ලැබුවේ ආචාර්ය ප්‍රභාත් පීරිස් මහතා විසිනි. පුංචි පුංචි තරු ළමා ගීත සංයුක්ත තැටියේ අඩංගු වූ තොප්පි වෙළෙන්දා ගීතය අන්තර්ජාලයේ මිලියන 38කට වඩා නරඹා ඇත. අපි පුංචි පුංචි තරු වගේ, මගේ නංගි බෝනික්කෙක්, යකඩ යකා වැනි ගීත ඉතා ජනප්‍රිය විය.
එම ගීත ජනප්‍රිය වීමත් සමඟ වීරසිංහ මහතාගේ යූ ටියුබ් නාලිකාවේ ග්‍රාහකයන් සංඛ්‍යාව ශීඝ්‍රයෙන් ඉහළ යාම නිසා ඔහුට සිල්වර් බට්න් සම්මානයද හිමි විය. මධ්‍යම අප්‍රිකාවේ ටැන්සානියා, සැම්බියා හා මොසැම්බික් යන රටවලට මැදි වී පිහිටි මලාවී රාජ්‍යයේ වීරසිංහ මහතා සහ පවුලේ සාමාජිකයන් පදිංචි වී සිටියදී එම රටේ ජාතික භාෂාව වන චිචේවා භාෂාවෙන් අප්‍රිකානු සංගීත ආරයේ ගීත ගායනා කර ඇත. එම ගීතවල පද රචනය හා තනු නිර්මාණය කරනු ලැබ ඇත්තේ ඔහු විසිනි.
‘සිදුණු වරපට’ බ්‍රිස්බේන් නුවරදී දොරට වඩී
ඔස්ට්‍රේලියාවේ බ්‍රිස්බෙන් නුවර පදිංචි ආචාර්ය නිමල් සේදර මහතාගේ නවතම නවකතා ග්‍රන්ථය “සිදුණු වරපට” පෙබරවාරි මස 15 වැනි දින,
ඇකේෂියාරිජ්, ප්‍රජා මධ්‍යස්ථානයේදී දොරට වඩින ලදි. ඔස්ට්‍රේලියාව සංක්‍රමණිකයන්ගේ පාරාදිසය නමින් හැඳින්වෙයි. ලෝකයේ සියලු රටවල මිනිසුන් එහි වාසය කරන අතර නිමල් සේදර මහතාගේ නවකතාව ද එවැනි සංක්‍රමණික චීන පවුලක් වටා ගෙතී ඇත. උත්සවයේ ප්‍රධාන ආරාධිතයා වශයෙන් චීන ජාතික ප්‍රජා නායකයෙකු වන කොක් මින් තෝ මහතා සහ එස්තර් මැතිනිය සහභාගි විය. ඕස්ට්‍රේලියාවට සංක්‍රමණය වී සිටින පේරාදෙණිය සරසවියේ සිංහල අංශයේ ආචාර්යවරයෙකු වූ ආචාර්ය කුමාර දිසානායක, ආචාර්ය නිමල් සේදර, චින්තන ජාතික කොක් මින් තෝ මහතාද ශ්‍රී ලංකා සමිති ඒකාබද්ධ සංවිධානයේ සභාපති ආචාර්ය ජයසිරි වීර වර්ධන ඇතුළු කිහිප දෙනෙක් දේශන පැවැත්වූහ.
නිසංසලා කොට්ටගස්වත්ත
