යුක්රේනයට ලබාදෙන යුද ආධාර අත්හිටුවීමට අමෙරිකාව තීරණය කර ඇතැයි විදෙස් මාධ්‍ය වාර්තා කරයි. පසුගියදා ධවල මන්දිරයේ ඕවල් කාර්යාලයේදී යුක්රේන ජනාධිපති වොලොදිමිර් සෙලෙන්ස්කි සමඟ ඇතිකරගත් උණුසුම් වචන හුවමාරුවෙන් පසු අමෙරිකානු ජනාධිපති ඩොනලඩ් ට්‍රම්ප් එම විධායක නියෝගය නිකුත් කළ බව ධවල මන්දිරය ප්‍රකාශ කර ඇතැයි ද වාර්තා වේ. ජනාධිපති ට්‍රම්ප් එම නියෝගය නිකුත් කර ඇත්තේ ජාතික ආරක්ෂාව පිළිබඳ ධවල මන්දිරයේ ආරක්ෂක ප්‍රධානීන් සමඟ සාකච්ඡා වාර ගණනාවක් පැවැත්වීමෙන් පසුව බව ද විදෙස් මාධ්‍ය සඳහන් කරයි.
ජනාධිපතිවරයාගේ තීරණය පැහැදිලි බවත්, ඔහුගේ ඉලක්කය සාමය බවත් ධවල මන්දිරයේ නිලධාරියකු ප්‍රකාශ කළ බව සීඑන්එන් පුවත් සේවය වාර්තා කළේය. යුද්ධයට සම්බන්ධ සෙසු පාර්ශ්ව එම ඉලක්කය කරා යොමු කරවීම ඩොනල්ඩ් ට්‍රම්ප්ගේ උත්සාහය බවත් ධවල මන්දිරය වැඩිදුරටත් ප්‍රකාශ කර තිබේ. යුක්රේන ජනාධිපතිවරයා සාම සාකච්ඡාවට කැමැති වන්නේ නම් ඔහුට ධවල මන්දිරය විවෘත බව අමෙරිකාවේ උප ජනාධිපති ජේඩී වැන්ස් ප්‍රකාශ කර ඇතැයි ද විදෙස් මාධ්‍ය සඳහන් කරයි.
