රජයේ වෛද්‍ය නිලධාරීන්ගේ සංගමය විසින් අද දිනයේදී ක්‍රියාත්මක කිරීමට නියමිතව තිබූ වැඩ වර්ජනය කල් දමා තිබේ.
ඒ එම සංගමය සෞඛ්‍ය ඇමැතිවරයා සමඟ පවත්වන ලද සාකච්ඡාවකින් අනතුරුවය. රජයේ වෛද්‍ය නිලධාරීන්ගේ සංගමයේ වැඩ වර්ජන තීන්දුව තාවකාලිකව හකුලා ගත්තත් එමඟින් ජන සමාජයට ඇති වූ බලපෑම අඩුවී ඇතැයි අපි නොසිතමු.
කවර තත්වයක් යටතේ වුවද අපි වර්ජනය කරනවා යන තර්ජනය කරන ගර්ජන ස්වරය ජන සමාජයට ප්‍රබල බලපෑමක් ඇති කරනු ඇත. එම නිසා එම වර්ජන තීන්දුවේ සමාජ බලපෑම පිළිබඳව විමසීමක් සිදු කිරීම අපගේ අපේක්ෂාවයි.
රජයේ වෛද්‍ය නිලධාරීන්ගේ සංගමය වර්ජන සූදානමට බලපෑ ප්‍රධානතම හේතුව රාජකාරි හා නිවාඩු දීමනා කප්පාදු කිරීම බව සඳහන් කොට තිබිණි. මෙය සමස්ත ශ්‍රී ලාංකික වෛද්‍යවරුන්ගේ වුවමනාව සහ කැමැත්ත දැයි නොදන්නා නමුත්, වෛද්‍යවරුන්ගෙන් යම් ප්‍රතිශතයක් එකී වෘත්තීය සමිතිය නියෝජනය කරන බව අපි දනිමු.
රාජ්‍ය පාලනයේ ඇති වූ නව වෙනසත් සමඟ ඉකුත් මාස හතරක පමණ කාල සීමාව වැඩ වර්ජනවලින් තොරව ගෙවී ගිය බව අප හොඳින් දන්නා කාරණයකි. ඉදිරිපත් වූ අය-වැය ලේඛනයත් සමඟ මෙකී වැඩවර්ජන කැඳවීම සිදු වී ඇති අතර, එහි යුක්තියුක්තභාවය විමසා බැලිය යුත්තකි.
වෛද්‍යවරුන් ඇතුළු සියලු රජයේ සේවකයන්ට සාධාරණ වැටුප් ලබා දීමක් අය-වැය මඟින් සිදු කර තිබෙන මොහොතක රජයේ වෛද්‍ය නිලධාරීන්ගේ සංගමයේ මෙකී වර්ජන තීරණය අසාධාරණ බව සෞඛ්‍ය හා ජනමාධ්‍ය ඇමැති නලින්ද ජයතිස්ස මහතා පාර්ලිමේන්තුව හමුවේ විශේෂ ප්‍රකාශයක් කරමින් සඳහන් කළේය. වෛද්‍යවරුන්ගේ මූලික වැටුප ඉහළ දැමීමක් මෙන් ම අමතර දීමනා හා වාර්ෂික වැටුප් වැඩි වීම ද සමස්ත වැටුපට බදු සහනයක් ද ඊට අන්තර්ගත වන බව ඔහු පෙන්වා දුන්නේ ය.
සාමාන්‍යයෙන් සෞඛ්‍ය ක්ෂේත්‍රයේ පැනනඟින වෘත්තීය ක්‍රියාකාරකම්වල අවසාන පලය ලෙස සිදු කරනු ලබන වර්ජන පිළිබඳ මෙරට ජනතාව තුළ ඇත්තේ අකැමැත්තක් බව අප අමුතුවෙන් සඳහන් කළ යුතු නොවේ.
රජයේ වෛද්‍ය නිලධාරීන්ගේ සංගමය ස්වකීය වර්ජන තීරණය පිළිබඳ ජනතාවට සහ රජයට දැනුම් දීමට පෙර විපක්ෂ නායකවරයා, නාමල් රාජපක්ෂ මන්ත්‍රීවරයා, දිලිත් ජයවීර මන්ත්‍රීවරයා මුණගැසුණු බවට ජනමාධ්‍ය තුළ ප්‍රවෘත්ති පළ විය. වෛද්‍ය වැඩ වර්ජනවලින් රෝගී ජනතාව පීඩාවට පත් කරවීමට අවශ්‍ය උපදෙස් හා ආශීර්වාදය එකී විපක්ෂ මන්ත්‍රීවරුන්ගෙන් ලැබුණේ දැයි අපි නොදනිමු.
සෞඛ්‍ය ක්ෂේත්‍රය යනු බරපතළ විෂමතා ඇති ක්ෂේත්‍රයකි; එමෙන් ම පන්ති භේදය මත වෘත්තීය සමිති අටවාගත් ක්ෂේත්‍රයක් ද වන්නේ ය. එනිසා එක් ක්ෂේත්‍රයක වැටුප් වැඩි වීම සිදු කරන විට අනෙක් ක්ෂේත්‍රයට විෂමතා ඇති වීම නිරන්තරයෙන් සිදු වේ. මේ හේතු කොට ගෙන විටින් විට කරනු ලබන සෞඛ්‍ය වැඩ වර්ජන අතීතය පුරා ජනතාවට ඉමහත් පීඩාවක් බවට පත් වූයේ ය.
රජයේ රෝහල්වලින් ප්‍රතිකාර ලබන්නේ ඉහළ සමාජ පන්තියේ පිරිස් නො වේ. මේ නිසා හදිසියේ කරන වැඩ වර්ජනවලින් පීඩාවට පත් වන්නේ මෙරට පීඩිත පන්තියේ අහිංසක ජනතාව ය. පැය ගණන් ගෙවා ගෙන බස් රථවල පැමිණ රජයේ රෝහල්වලට ගිය සාමාන්‍ය ජනතාව වෛද්‍යවරුන්ගේ වර්ජන හේතුවෙන් අසරණභාවයට පත් වූ ආකාරය අප අනන්තවත් අත්විඳ ඇත.
රජයේ වෛද්‍ය නිලධාරීන්ගේ සංගමය යනු මෙරට වෛද්‍යවරුන් නියෝජනය කරන තවත් එක් වෘත්තීය සමිතියක් පමණකි. ඔවුන්ට වෘත්තීය අරගල කිරීමට අයිතියක් පවතී. ඒ සම්බන්ධයෙන් අපට තර්කයක් නැත.
වෛද්‍යවරුන් යනු ජනතාවගේ නාඩි බලා නිල අල්ලා ප්‍රතිකාර කරන පිරිසකි. ඔවුන්ට රටේ සමාජ දේහයේ තත්ත්වය නිල ඇල්ලීමකින් තොරව, නාඩි බැලීමකින් තොරව හඳුනා ගැනීමේ සාමාන්‍ය සමාජ බුද්ධිය පවතිනු ඇතැයි අපි අපේක්ෂා කරමු. රජයේ වෛද්‍ය නිලධාරීන්ගේ සංගමයේ ඉහළ නිලතල හෙබවූ පිරිස් අතර මීට පෙර ආණ්ඩුවලින් විවිධ වරප්‍රසාද ලබාගත් මෙන්ම නිලතල හෙබවූ අය ද සිටි බව අපේ මතකයේ වෙයි. එවිට රජයේ වෛද්‍ය නිලධාරීන්ගේ සංගමයට තිබූ සමාජ සවිඥානිකත්වය සහ හැසිරීම මේ අවස්ථාවේ නැත්තේ ඇයි දැයි ප්‍රශ්න කළ යුතුව ඇත.
වැඩ කරන ජනතාවගේ ඉල්ලීම් දිනා ගැනීමට ඇති ප්‍රබලතම ආයුධය වන්නේ වැඩ වර්ජනය බව පිළිගත් සත්‍යයකි. එහෙත් වර්ජනයක් කැඳවීමට තරම් විෂයමූල හා මනෝමූල තත්ත්වයක් නිර්මාණය නොවී, වෘත්තීය සමිති හිතුමතේට වර්ජනවල නිරත වීම ජනතා ජයග්‍රහණයක් යැයි විග්‍රහ කළ නොහැකි ය. පොදු සමාජයේ ජනතාව පීඩාවට පත් කොට ඉල්ලීම් දිනා ගත්ත ද, එය ජනතා ජයග්‍රහණයක් යැයි සැලකිය නොහැකි ය.
රජයේ වෛද්‍ය නිලධාරීන්ගේ සංගමය දේශපාලනික වුවමනාවන් මත කටයුතු කරන්නේ යැයි චෝදනා කරමින් පසුගිය කාලයේ ඔවුන්ට එරෙහිව තවත් වෛද්‍ය සංගම් බිහි වූ බවක් ද හඳුනා ගැනීමට ලැබිණි. රජයේ වෛද්‍ය නිලධාරීන්ගේ සංගමයට එකී චෝදනාව එල්ල වූයේ තවත් වැඩ කරන වෛද්‍යවරුන් කෙරෙන් ම ය. මේ නිසා මෙකී වර්ජන ක්‍රියාමාර්ගවලට රටේ සියලු වෛද්‍ය සංගම් සහ වෛද්‍යවරුන් එකඟ යැයි අපි කල්පනා නොකරමු. ෂයිලොක්ගේ මස් රාත්තල ම ඉල්ලීම වැනි ක්‍රියාමාර්ග වෙනුවට, රජය විසින් පිරිනමා ඇති වැටුප් වර්ධකය සාධනීය මට්ටමින් භාර ගැනීමට කැමැති වෛද්‍යවරුන් ඕනෑ තරම් සිටින බව අපි දනිමු.
නව රජය බලයට පත් වී ගත වූ කෙටි කාල සීමාව තුළ සියලු ආර්ථික අර්බුදවලට විසඳුම් සොයා ගැනීමට හැකි නොවූ බව ඕනෑ ම අයකුට අවබෝධ වන කාරණයකි. ඒ අතර, රජයේ වෛද්‍ය නිලධාරීන්ගේ සංගමයේ මේ තීරණය සමස්ත වෛද්‍යවරුන්ගේ තීරණයක් නොවන අතර, එය රටේ සුවහසක් පොදු ජනතා අභිමතාර්ථ සමඟ සමපාත වන්නක් නොවන බව ද ලියා තබමු.
විරුද්ධ පක්ෂ නායකයන් දැනුම්වත් කොට වර්ජන ක්‍රියාමාර්ගවලට අවතීර්ණ වීමට උත්සාහ කරන රජයේ වෛද්‍ය නිලධාරීන්ගේ සංගමයට දී ඇති වැටුප් වර්ධක ප්‍රමාණවත් නොවන්නේ නම්, ඒ සඳහා ජනතාව පීඩාවට පත් නොකරන විධිමත් ක්‍රියාමාර්ග අනුගමනය කරන ලෙස අපි ඉල්ලා සිටිමු.
වෛද්‍යවරු යනු මානව හිතවාදී, සංවේදී පිරිසකි. ඔවුන් රෝගී ජීවිත බිල්ලට තබා, තම පෞද්ගලික අභිමතාර්ථ ඉටු කර ගැනීමට කටයුතු කරන්නන් යැයි අපට සිතිය නොහැකි ය. එබැවින් මේ මොහොතේ වර්ජන සූදානමකට ගියේ නම් ඊට පෙර, තමන් ළඟ ඇති වෙද නළාවෙන් තමන්ගේ හෘදයවස්තුවේ හඬ අසා දැනගන්නා ලෙස අපි ඉල්ලා සිටිමු; තමන්ගේ හෘදසාක්ෂියේ හඬ තමන්ට ප්‍රශ්නකාරි නොවන්නේ නම්, වර්ජන ක්‍රියාමාර්ගවලට එළඹෙන ලෙස රජයේ වෛද්‍ය නිලධාරීන්ගේ සංගමයෙන් ඉල්ලා සිටිමු.
