මාතර දිස්ත්‍රික්කය තුළ ලිංගාශ්‍රිතව බෝවන රෝග ව්‍යාප්තිය පාලනය කිරීමේ අරමුණින් රාජ්‍ය නිලධාරින් දැනුම්වත් කිරීමේ වැඩසටහනක් මාතර දිස්ත්‍රික් ලේකම් චන්දන තිලකරත්න මහතාගේ ප්‍රධානත්වයෙන් මාතර දිස්ත්‍රික් ලේකම් කාර්යාලයීය ගාමිණී ජයසේකර ශ්‍රවණාගාරයේදී පැවැත්විණි. දිස්ත්‍රික්කය පුරා (HIV) ආසාදිතයන්ගේ වර්ධනයක් දක්නට ලැබෙන බැවින් මෙම වැඩසටහනේ අත්‍යවශ්‍යතාව හා දැනුම්වත් වීමේ වගකීම සමස්ත රාජ්‍ය නිලධාරින් මෙන්ම පොදු මහජනතාව සතු වගකීමක් වන බව මෙම වැඩසටහනට සම්බන්ධ වෙමින් දිසාපතිවරයා ප්‍රකාශ කළේය. මේ සඳහා සම්පත් දායකත්වය දක්වමින් මාතර මහ රෝහලේ විශේෂඥ වෛද්‍ය ප්‍රගීත් ප්‍රේමදාස මහතා ප්‍රකාශ කර සිටියේ, ලිංගාශ්‍රිත රෝග සම්බන්ධව පවතින සමාජයේ සැඟවුණු ස්වභාවය හා රෝගීන් යම් කොන් වීමක් සිදුවේ යැයි යන බිය නිසා මෙම රෝග ව්‍යාප්තිය වර්ධනය සිදුව ඇති බවයි. මීට පෙර වසරවල විදේශීය සංක්‍රමණිකයන් බහුලව සැරිසරන වෙරළ ආශ්‍රිත ප්‍රදේශවල HIV ආසාදිතයන් දක්නට ලැබුණත් මේ වන විට මාතර දිස්ත්‍රික්කයේ ඇතුළට වන්නට රෝගීන් වාර්තා වීම වර්ධනය වී ඇති බවත්, තවදුරටත් අදහස් දක්වමින් ඒ මහතා පැවසීය.
මෙහිදී මාතර දිස්ත්‍රික්කයේ සියලුම ප්‍රාදේශීය ලේකම් කොට්ඨාසවල රාජ්‍ය නිලධාරින්, සාමාන්‍ය ජනතාව, වෘත්තීය පුහුණු ආයතන, පාසල් ශිෂ්‍ය ශිෂ්‍යාවන් ඇතුළු තරුණ ප්‍රජාව දැනුම්වත් කිරීමේ අවශ්‍යතාව ද අවධාරණය කෙරිණි.
