දවසේ සෑම මොහොතකම පාහේ තිලකපුර – අම්බලන්ගොඩ පාර දෙපස සුද්ද පවිත්‍ර කරමින් මල් සිටුවා, පාරේ ටොෆි කොළයක්වත් රැඳී තිබෙන්නට ඉඩ නොදී එම කාර්යය දේව කාර්යයක් මෙන් ඉටු කරන අපූරු මිනිසකු අම්බලන්ගොඩ තිලකපුර පාරේ සිටින බව මාධ්‍ය මඟින් මීට පෙර කළ දැනුම්වත් කිරීම මත ඔහුට විවිධ ආධාර උපකාර ලැබුණු බව දැනගන්නට ලැබිණි.
ඔහු විශ්‍රාමික ගුවන් හමුදා නිලධාරියකු වන නන්ද විජේරත්න මහතාය. මෙම සත්ක්‍රියාවෙන් මාර්ගයේ ගමන් කරන සිත් පිත් ඇති රටට ආදරය කරන මිනිසුන්ගේ, පරිසරවේදීන්ගේ ආදරය, කරුණාව, දයාව හැර කිසිවක් ඔහුට නොලැබේ. පසුගියදා රාජ්‍ය ආයතන හා ප්‍රදේශවාසීන් එක්ව ඔහුගේ උපන් දිනය සමරමින් පොල්වත්ත විහාරාධිපති ස්වාමීන් වහන්සේ ඇතුළු මහ සඟරුවන එම ස්ථානයට කැඳවා සෙත් පිරිත් සජ්ඣායනය කොට කේක් කපා ආශීර්වාද කළ අතර, එදින ඔහුට මල් පොහොර, විල්බැරෝ, උදලු වැනි දේ උපන්දින තිළිණ වශයෙන් ප්‍රදානය කිරීමට ද ජනතාව අමතක කළේ නැත. ඔහු සෑම දිනකම පනිට්ටු දෙකක් දෑතින් රැගෙන උදේ සවස දහඩිය වගුරුවමින් මල් පැළවලට වතුර දැම්මේය. එය දුටු රටට ආදරය කරන මිනිසුන්ගේ සහයෝගයෙන් වතුර ටැංකියක් සවිකර පාර දෙපස බට යොදා මල් පැළවලට ගලා යාමට පහසු වන පරිදි සකස් කර දී තිබේ. එය හෙට (1) පෙ.ව. 7.30ට රාජ්‍ය නිලධාරින් හා ජනතාවගේ සහභාගිත්වයෙන් මහ සඟරුවනගේ සෙත් පිරිත් සජ්ඣායනා මැද විවෘත කිරීමට නියමිතය.
