104
ගම්පහ යාගොඩමුල්ල මහහේන සුසාන භූමියේ සඟවා තිබු ටී 56 අවියක් සහ පතොරම් 22ක් මහජනතාවගෙන් ලද තොරතුරකට අනුව බස්නාහිර පළාත් උතුරු දිසා අපරාධ කොට්ඨාසය පෙරේදා (26) රාත්‍රී කාලයේදී සොයාගෙන ඇත.
මෙම ගිනි අවිය සුසාන භූමියේ ඇතැයි බස්නාහිර පළාත් උතුරු දිසා අපරාධ කොට්ඨාසයේ සේවයේ නිරතව සිටින පොලිස් නිලධාරියෙකුට පුද්ගලයකු ලබාදුන් තොරතුරකට අනුව ගිනි අවිය සොයාගත් බව උසස් පොලිස් නිලධාරියෙක් කීය.
මෙම ගිනි අවිය සුසාන භූමියට ගෙනවිත් දැමුවේ කවුරුන්දැයි සොයා විමර්ශන පැවැත්වෙන බව පොලීසිය සඳහන් කළේය.
ටී 56 ගිනි අවියක් සොයා ගැනීමට තොරතුරු ලබාදෙන පුද්ගලයන්ට රුපියල් ලක්ෂ 10ක මුදලක් පොලිස් තෑගි අරමුදලින් ලබාදෙන බව වැඩ බලන පොලිස්පති නීතිඥ ප්‍රියන්ත වීරසූරිය මහතා පැවසීය. වැඩ බලන පොලිස්පතිවරයා එම ප්‍රකාශය කිරීමෙන් පසු මහජන තොරතුරකින් සොයාගත් පළමු ටී 56 ගිනි අවිය වන්නේ මෙයයි.
