සෞරග්‍රහ මණ්ඩලයට අයත් ග්‍රහලෝක 07ක් එක පෙළට දැක ගැනීමේ දුර්ලභ අහස් සංදර්ශනයක් මේ දිනවල පවති.
ඒ අනුව ග්‍රහ පෙළපාළිය දුරේක්ෂ තුළින් නැරඹීම සඳහා මෙරට මහජනතාවට ද සහභාගි විය හැකි රාත්‍රී අහස නිරීක්ෂණ කඳවුරක් අද(28) සවස 6.20 සිට රාත්‍රී 8.00 දක්වා කොළඹ විශ්ව විද්‍යාලයේ ක්‍රීඩාපිටියේ දී පැවැත්වෙන් බව කොළඹ විශ්ව විද්‍යාලයේ භෞතික විද්‍යා අංශයේ අංශාධිපති මහාචාර්ය චන්දන ජයරත්න මහතා පැවසීය.
ඒ මහතා කියා සිටියේ ජනතාවගෙන් ලත් විශාල ඉල්ලීම් ප්‍රමාණය හේතුකොට ගෙන, කොළඹ විශ්වවිද්‍යාලයේ තාරකා විද්‍යා සංගමයේ සිසුන් විසින් රාත්‍රී අහස නිරීක්ෂණ කඳවුරක් මේ අනුව අද කොළඹ විශ්ව විද්‍යාලයේ ක්‍රීඩාපිටියේ දී ( රීඩ් මාවතෙන් හෝ තර්ස්ටන් පාරෙන් ප්‍රවේශ විය හකිය) පැවැත්වීමට කටයුතු යොදා ඇති බවයි.
විශ්වවිද්‍යාල සිසුන්ට මෙන්ම මහජනතාවට ද විවෘත මෙම අහස නිරීක්ෂණ කඳවුර රාත්‍රී අටට අවසන් වන අතර, පැහැදිලි අහසක් නොමැති නම් පැමිණීමෙන් වැළකී සිටින ලෙස ද මහාචාර්යවරයා ඉල්ලා සිටියි.
එසේම ග්‍රහ පෙළපාළිය ඔබේ නිවසේ සිට ද දැකිය හැකිය.
ග්‍රහලෝක පෙළපාළිය ලෙසින් හැඳින්වෙන මෙම සංසිද්ධිය නැවත වරක් දැකගත හැකි වන්නේ 2040 වසරේදී බව නාසා ආයතනය සඳහන් කළේය.
අදාළ ග්‍රහලෝක අතරින් බුධ, සිකුරු, බ්‍රහස්පති සහ අඟහරු පියවි ඇසට පෙනෙනු ඇති අතර සෙනසුරු, යුරේනස් සහ නෙප්චූන් යන ග්‍රහලෝක හඳුනා ගැනීමට දුරේක්ෂයක් අවශ්‍ය වේ.
