Home » පුත්තලමේ තරුණියක් අබිරහස් ලෙස මියගිහින්

පුත්තලමේ තරුණියක් අබිරහස් ලෙස මියගිහින්

by sachintha
February 27, 2025 3:57 am 0 comment

පුත්තලම කල්අඩිය ප්‍රදේශයේ පදිංචි 19 හැවිරිදි සුරූපී තරුණියක ඇගේ නි‍ෙවස තුළ අබිරහස් ලෙස මියගොස් ඇත. ඇය සිහිසුන්ව සිටින බව සිතා ඇගේ මවුපියන් ඊයේ (26) පුත්තලම මූලික රෝහලට ඇතුළත් කර ඇතත් ඒ වන විටත් ඇය මරණයට පත්ව සිට ඇති බව පුත්තලම මූලස්ථාන පොලීසිය කියයි.

මෙලෙස මරණයට පත්ව ඇත්තේ පුත්තලම, කල්අඩිය ප්‍රදේශයේ පදිංචි 19 හැවිරිදි ඩී. එච්. චමුදි විදර්ශනාය. මව, පියා හා සොහොයුරීයක සමඟ ඇය ජීවත්ව ඇති බවත් ඇය පවුලේ වැඩිමහල් දියණීය බවත් මෙම මරණය සම්බන්ධයෙන් විමර්ශන පවත්වන පුත්තලම පොලීසිය සඳහන් කරයි. ඇය අ.පො.ස. උසස් පෙළ පුත්තලම ආනන්ද ජාතික පාසලින් හදාරා ඇති අතර, මේ වන විට කුරුණෑගල උසස් අධ්‍යාපන ආයතනයක ඩිප්ලෝමාවක් හදාරමින් සිටි තරුණියක බවද පොලීසිය සඳහන් කරයි.

ඇය සතියේ දින පහම කුරුණෑගල නගරයේ පැවති උසස් අධ්‍යාපන ආයතනයට යන බවත් ඉකුත් (25) වැනිදා සවස නිවෙසට පැමිණීමෙන් පසු පියා රැගෙන විත් තිබූ එළවළු රොටියක් පමණක් ආහාරයට ගෙන රාත්‍රී ආහාර ගැනීමට නොහැකි බව පවසමින් නින්දට ගොස් ඇත.

කෙසේ වෙතත් මෙම තරුණිය ඇගේ කාමරයේ සිට මධ්‍යම රාත්‍රී 12.44 වනතුරු ජංගම දුරකතනය හරහා කෙටි පණිවිඩ හුවමාරු කර ගෙන ඇති බව පොලිස් පරීක්ෂණවලදී හෙළිව තිබේ.

අලුයම අවදි වූ මවුපියන්, දියණිය නිදා සිටි කාමරයට ගොස් ඇති බවත් එහිදී ඇය සිහිසුන්ව සිටීම නිසා මහත් කලබලයට පත්ව පුත්තලම මූලික රෝහලට ප්‍රතිකාර සඳහා ඇතුළත් කර ඇත. ඒ වන විටත් ඇය මරණය පත්ව සිටි බව කියයි. අදාළ තරුණියගේ මරණය සම්බන්ධව පුත්තලම මූලික රෝහලේ සහකාර අධිකරණ වෛද්‍ය නිලධාරී ගෙවිදු කස්තුරිආරච්චි මහතා විසින් පශ්චාත් මරණ පරික්ෂණ පැවැත්වීමෙන් පසු සිරුරේ කොටස් රජයේ රස පරීක්ෂකවරයා වෙත යැවීමට කටයුතු කර තිබිණි. එසේම ඇයගේ මරණය සම්බන්ධයෙන් විවෘත තීන්දුවක් ලබා දී ඇත‍. පුත්තලම හදිසි මරණ පරීක්ෂක බී.එම්. නිසාම් මහතා විසින් පැවැත්වීමෙන් පසු එය වැඩි දුර පරීක්ෂණ සඳහා පුත්තලම මූලික රෝහලේ අධිකරණ වෛද්‍ය නිලධාරීවරයා වෙත යොමු කර තිබුණි.

මරණය සම්බන්ධව සාක්ෂි මෙහෙය වීම පුත්තලම මූලික රෝහලේ රෝහල් පොලීසියේ පොලිස් කොස්තාපල් වනසිංහ මහතා මෙහෙයවිය.

වනාතවිල්ලුව සමූහ – කේ. ප්‍රියංකරකළුපහන

පුත්තලම අතිරේක – හිරාන් ප්‍රියංකර ජයසිංහ

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT