එක්සත් ජාතික පක්ෂය සහ සමගි ජන බලවේගය අතර එකඟතාවක් ඇති කර ගැනීමේදී සමගි ජන බලවේග නියෝජිත කමිටුවෙන් ඉවත් වීමට ගත් තීරණය ගැනීමට හේතුව කුමක්ද? වර්තමාන දේශපාලන තත්ත්වය, නව ආණ්ඩුවේ අය-වැය සහ තවත් දේශපාලන කරුණු පිළිබඳව සමගි ජන බලවේගයේ ජාතික සංවිධායක තිස්ස අත්තනායක මහතා සමඟ කළ සාකච්ඡාවකි මේ.
සමගි ජන බලවේගය සහ එක්සත් ජාතික පක්ෂය අතර සාකච්ඡා අඩාළ වීමට බලපෑ හේතු මොනවාද ?
එහෙම සාකච්ඡා බිඳ වැටීමක් නොවෙයි, යම් කිසි මන්දගාමී බවක් තිබෙනවා. ඒත්, නිල වශයෙන් සාකච්ඡාවල බිඳ වැටීමක් නැහැ. එක්සත් ජාතික පක්ෂය සහ සමගි ජන බලවේගය අතර යම් එකඟතාවක් ඇති වෙන්න ඕනෑ කියලා මම විශ්වාස කරනවා. ඒ පිළිබඳව තමයි අප දෙපාර්ශ්වයම පසුගිය කාලය තුළ සාකච්ඡා ක්‍රියාමාර්ගයකට එකඟ වුණේ. විපක්ෂයක් විදිහට ශක්තිමත් වීමට නම් සියලු විපක්ෂ බලවේග එකතු විය යුතුයි. එයිනුත් එකම මූලයකින් බෙදී ගිය එජාපය සහ සජබ එකඟතාවක් ඇතිව කටයුතු කළ හැකි නම් ආණ්ඩුවට ශක්තිමත් අභියෝගයක් එල්ල කරන්න පුළුවන්කම තිබෙනවා. ඒක සියලු පාර්ශ්ව තේරුම් ගත යුතුයි.
ඔබ එජාප, සජබ සමගිය වෙනුවෙන් පිහිටුවා ඇති කමිටුවෙන් ඉවත් වෙනවා. ඒ ඉවත් වීමට හේතුව කුමක්ද ?
දෙපාර්ශ්වයම සමඟ සාකච්ඡා කළ යුතුයි කියලා අප පක්ෂයක් විදිහට තීරණය කළා. ඒක මගේ පෞද්ගලික තීරණයක් නොවෙයි, පක්ෂයේ තීරණයක් විදිහටයි ක්‍රියාත්මක වන්නේ. ඒ තීරණය කාලෝචිත දෙයක් විදිහටයි හඳුන්වා දීමට හැකියාව තිබෙන්නේ. කළ යුතුව තිබෙන්නේ මේ තීරණය ක්‍රියාත්මක කිරීම සඳහා කටයුතු කිරීමයි.
අප අවංකවම තමයි සාකච්ඡා ක්‍රියාමාර්ගය වෙත ප්‍රවේශ වුණේ. එසේ තිබියදී පක්ෂය ගත් තීරණයට අකුල් හෙළන පිරිසක් පොදු එකඟතාවට විරුද්ධව කටයුතු කරන ආකාරයක් පැහැදිලිව අපට පෙනෙනවා. ඒ තත්ත්වය හොඳ දෙයක් විදිහට සලකන්න බැහැ. පක්ෂ දෙකේ සමගිය වෙනුවෙන් සාකච්ඡා කරද්දී ඒවා කඩාකප්පල් වන ආකාරයේ ප්‍රකාශ කිරීම නුසුදුසු දෙයක් විදිහටයි මම දකින්නේ. ඒ තත්ත්වය තුළ මේ විදිහේ සාකච්ඡා වටයක් පවත්වා ගෙන යාම දුෂ්කරයි. ඒ නිසා මම තීරණය කළා එම සාකච්ඡා කරනු ලබන සාකච්ඡා කණ්ඩායමෙන් ඉවත් වීමට.
දේශපාලන වශයෙන් ඔබ කණ්ඩායම් දෙකට ස්ථාවර සහ ජයග්‍රාහී වටපිටාවක් නිර්මාණය කර ගැනීමට හැකියාව ලැබෙතැයි ඔබ විශ්වාස කරනවාද?
අප එකම මූලයකින් පැවැත එන දේශපාලන කණ්ඩායමක්. අපි එකතු වීමේ එකඟතාව තුළ වර්තමාන ආණ්ඩුවට සාර්ථක දේශපාලන අභියෝගයක් එල්ල කිරීමට හැකියාව ලැබෙතැයි මම විශ්වාස කළා. එහිදි පක්ෂයේ කෘත්‍යාධිකාරි මණ්ඩලය තමයි තීරණය කළේ එක්සත් ජාතික පක්ෂය සමඟ සාකච්ඡා කළ යුතුයි කියලා. ඒකට කළමනාකරණ කමිටුවද එකඟතාව පළ කළා. එහිදී අපට අවශ්‍ය වුණේ පක්ෂය ජයග්‍රහණය වෙනුවෙන් වූ ක්‍රියාමාර්ගයක් වෙත පිවිසීමයි. මේ ආකාරයේ සද්භාවයෙන් යුතු අරමුණකින් කටයුතු කරද්දී චෝදනා එල්ල වීම ගැන කනගාටුයි. ඒ වගේම මේ චෝදනා පිළිබඳව පක්ෂය පැත්තෙනුත් මෙතෙක් ප්‍රතිචාර පළවෙලා නැහැ. ඒ සියලු කරුණු නිසා තමයි මම තීරණය කළේ මෙම සාකච්ඡා කණ්ඩායමෙන් ඉල්ලා අස්වීමට.
ඔබ කියන්නේ පක්ෂ ක්‍රියාකාරකම්වලිනුත් ඉල්ලා අස්වන බවක්ද ?
නැහැ. මම දිගටම සමගි ජන බලවේගයේ ජාතික සංවිධායකවරයා විදිහට කටයුතු කරනු ලබනවා. ජාතික සංවිධායකවරයා විදිහට මගේ අරමුණ වෙන්නේ සමගි ජන බලවේගය ඉදිරි වසර කිහිපය තුළ ජයග්‍රහණය සඳහා අවශ්‍ය සංවිධාන කටයුතු කිරීමයි. ඒ සඳහා අප දැනුත් අවශ්‍ය සංවිධාන කටයුතු කරමින් සිටින්නේ. එක් පරාජයක් නිසා අප කඩා වැටෙන්නේ නැහැ. නැවතත් ජයග්‍රහණය සඳහා අවශ්‍ය ප්‍රතිසංස්කරණ ප්‍රතිසංවිධාන කටයුතු අප සිදු කරමින් සිටින්නේ. අපේ අරමුණ වෙලා තිබෙන්නේ සමගි ජන බලවේගය ඉදිරි කාලය තුළ රටේ ශක්තිමත්ම බලවේගයක් බවට පත් කර ගැනීමයි.
ඔබ නියෝජනය කරනු ලබන පක්ෂය පසුගිය මාස කිහිපය තුළ පිට පිට ජාතික මැතිවරණ දෙකක් පරාජය වුණා. ඒ තත්ත්වය තුළ පක්ෂය නැවත ජයග්‍රාහී මාවත වෙත අරන් යන එක ලෙහෙසි දෙයක්ද ?
මැතිවරණයක් පරාජය වීම කියන්නේ සදාකාලිකවම පරාජය වීම නොවෙයි. වර්තමාන ආණ්ඩුව නියෝජනය කරනු ලබන පිරිස පවා නිසි විදිහට සංවිධානය වීම නිසා අවුරුදු කිහිපයක් තුළ සියයට තුනේ ඡන්ද ප්‍රතිශතය ජයග්‍රාහී ඡන්ද ප්‍රතිශතයක් දක්වා අරන් ආවා. අපට පසුගිය පරාජය වූ ජනාධිපතිවරණයේදි පවා රට පුරා සියයට තිස් ගණනක ඡන්ද ප්‍රතිශතයක් තිබුණා. මහමැතිවරණයේදී විපක්ෂයේ ප්‍රධානම දේශපලන පක්ෂය විදිහට ඉදිරියට ආවේ සමගි ජන බලවේගයේ අපි. ඒ නිසා අප විශ්වාස කරනවා අපේ පක්ෂයට ඉදිරි අවුරුදු කිහිපය තුළ නැවතත් ජයග්‍රාහී විදිහට නැඟී සිටින්න පුළුවන්කම ලැබෙයි කියලා.
සෙසු දේශපාලන කණ්ඩායම් සමඟ සිදු කරනු ලබන සාකච්ඡා අත්හැර දැමීම ඒ ජයග්‍රහණයට බාධාවක් නොවේ ද ?
ඔව්. අපට ඉදිරි මැතිවරණ ජයගන්න ඕනෑ නම් අපට එකතු කර ගන්න පුළුවන් සියලු බලවේග අප එකතු කරගන්න ඕනෑ. එහෙම කළොත් අපට ඉදිරියේදි පවත්වනු ලබන පළාත් පාලන මැතිවරණයේදීම නැවත ජයග්‍රහණය වෙත යන ගමන ආරම්භ කිරීමට හැකියාව ලැබේවි.
ඉදිරි මැතිවරණයට සජබ සූදානම්ද ?
ඔව්. අප ඉදිරියේදි පවත්වනු ලබන පළාත් පාලන මැතිවරණය සඳහා ප්‍රාදේශීය වශයෙන් ජනප්‍රසාදය ඇති හොඳම කණ්ඩායම් ඉදිරිපත් කිරීමට බලාපොරොත්තු වෙනවා. වගේම ඔවුන් කිසිවකුත් දූෂණ චෝදනා එල්ල වූ පිරිස් නොවීමටත් අප වගබලා ගන්නවා. අපේ අරමුණවී තිබෙන්නේ ගම් මට්ටමෙන් නැවත සමගි ජන බලවේගය ජයග්‍රහණය සඳහා යනු ලබන ගමන ආරම්භ කිරීමටයි.
ඒත් පසුගිය සතිවලදී සමගි ජන බලවේගය කළ ලොකුම ඉල්ලීමක් වූයේ පළාත් පාලන මැතිවරණය යම් කාලයකට පසුපසට ගන්න කියලයි, මේ ඉල්ලීම කළේ ජනතාව ඉදිරියට යන්න තිබෙන බිය නිසාද ?
පැහැදිලිව කියන්න ඕනෑ අපි මැතිවරණය කල් දමන්න කියලා නොවෙයි ඉල්ලීමක් කළේ, ඉදිරියේදී පවත්වනු ලබන විභාගවලට සහ අලුත් අවුරුද්දට බාධාවක් නොවන ලෙස මැතිවරණය පවත්වන්න කියන ඉල්ලීමයි. මෙවර පළාත් පාලන මැතිවරණය පවත්වන්නේ අප කියූ ආකාරයට බවට දැන් අපට තහවුරු වෙලා තිබෙනවා. අපේ පක්ෂයේ ඉල්ලීම පිළිගත් බවට එයින් තහවුරු වෙනවා.
නව ආණ්ඩුව බලයට පැමිණ මාස කිහිපයක් තුළ ලොකු වැඩ ප්‍රමාණයක් කළ යුතු බවට ඔබද නියෝජනය කරනු ලබන විපක්ෂය විසින් සඳහන් කළා. ඒ ඉල්ලීම බැලූ බැල්මටම සාධාරණ නැහැ නේද?
ඔව් මම පිළිගන්නවා, බලයට පැමිණියාම යම් කාර්ය ප්‍රමාණයක් ඉෂ්ට කිරීමට සාධාරණ කාලයක් අවශ්‍ය බව. මේ කෙටි කාලය තුළ වැඩ කරනවා නම්, ඒ වැඩ කටයුතු යම් ප්‍රමාණයක් හෝ ආරම්භ කර තිබිය යුතුයි. ඒත්, අපට එහෙම වැඩක් ආරම්භ කරන බවක් හෝ පෙනෙන්නට නැහැ. මේ පිරිස පසුගිය කාලයේදී සිදු කරමින් තිබූ වැඩපිළිවෙළම ඉදිරියට රැගෙන යන බව තමයි පැහැදිලිව දක්නට තිබෙන්නේ. ඒත් මේ ආණ්ඩුව බලයට පැමිණෙන විට සඳහන් කළේ තමන් වෙනස් වැඩපිළිවෙළක් ඉදිරියට අරන් යනවා කියලා. එහෙත් අද වෙනකම් ඒ අලුත් වැඩපිළිවෙළ අපට දක්නට නැහැ. ඒ නිසා තමයි අප කියන්නේ මේ ආණ්ඩුව ගමන් කරන්නේ පැරණි මාර්ගයේම කියලා.
අලුත් ආණ්ඩුවට පටන් ගැන්මේ සිටම බාධා සිදු කරන බවටයි ඇතැමුන් කියන්නේ?
අපි කවදාවත් හොඳ දෙයක් කරනවා නම් බාධා කරන්නේ නැහැ. අපි නිල්, කොළ, රතු විදිහට දේශපාලන වශයෙන් බෙදී සිටින්නට පුළුවන්. ඒත්, අපි රටට හොඳක් වෙනවා නම් එයට බාධා එල්ල කරන්නේ නැහැ. අප නිතරම උත්සාහ කරන්නේ රටේ පාර්ශ්වය වෙනුවෙන් පෙනී සිටීමට මිස පටු පක්ෂ අරමුණු කරේ තබා ගෙන යාමට නොවෙයි.
නාස්තිය, දූෂණය නැති කරන වැඩපිළිවෙළක් ආවොත් අපි ඒ වැඩපිළිවෙළට පූර්ණ ලෙස සහාය ලබා දෙනවා. කවුරුන් වුවත් හොඳ වැඩක් කරනවා නම් අපේ සහාය ඒ සඳහා ලබා දීම ජාතික කර්තව්‍යක් විදිහටයි අප දකින්නේ.
අපිත් පක්ෂයක් විදිහට වගේම පෞද්ගලිකවත් දූෂණය නාස්තිය පිටුදකින කණ්ඩායමක්. මම කලින් සඳහන් කළ විදිහට අපේ මැතිවරණවලට තරග කරනු ලබන අපේක්ෂකයන්ද දූෂණය, නාස්තිය පිටුදකින පිරිසක්.
සමගි ජන බලවේගයේ මන්ත්‍රී කණ්ඩායම අය-වැය පළමුවර කියැවීමේදී එයට විරුද්ධ වුණා. මෙවර අය-වැය පිළිබඳව ඔබේ අදහස කුමක්ද ?
මේ අය-වැය පිළිබඳව අලුතින් දෙයක්, අලුත් සංකල්පයක් දකින්නට නැහැ. පැරැණි මාර්ගයේම ගිය අය-වැයක් විදිහටයි මම මෙවර අය-වැය දකින්නේ. මෙවර අය-වැය තුළ අලුත් ලක්ෂණ නැහැ. පැරැණි ක්‍රමයම ඉදිරියට රැගෙන යාමක් තමයි දක්නට තිබෙන්නේ.
උදිත ගුණවර්ධන
