මොනරාගල දිස්ත්‍රික්කයේ අලි මිනිස් ගැටුම පාලනය කර ගැනීමට කෙටිකාලීන සහ ස්ථීරසාර විසඳුම් ලබා ගැනීම සම්බන්ධයෙන් වන සාකච්ඡාවක් ඊයේ (26) පරිසර නියෝජ්‍ය අමාත්‍ය ඇන්ටන් ජයකොඩි මහතා සහ වෙළඳ, වානිජ, ආහාර සුරක්ෂිතතා නියෝජ්‍ය අමාත්‍ය ආර්.එම් ජයවර්ධන මහතාගේ ප්‍රධානත්වයෙන් පැවැත්විණි.
ඒ වැල්ලවාය ප්‍රාදේශීය ලේකම් කාර්යාලයේදී ය.
මෙම සාකච්ඡාව සඳහා රජයේ නිලධාරීන්, ගම්වාසීන් ඇතුළු පිරිසක් සහභාගී වූහ. අලි මිනිස් ගැටුම පාලනය කිරීම සඳහා නව රජය මගින් විශේෂිත වැඩපිළිවෙලක් ක්‍රියාත්මක කරන අතර 2025 නව අයවැය යෝජනාවලියේ දී මේ සඳහා විශාල මුදලක් වෙන් කර තිබේ. මෑතක දී නව තාක්ෂණික ක්‍රමෝපායන් භාවිතයෙන් නව එල්ලෙන අලිවැටක් ද වීරවිල ප්‍රදේශයේ දී ඉදිකෙරුණි.
වනඅලි සහ මිනිස් ගැටුම පාලනය කිරීම සඳහා කඩිනම් ප්‍රායෝගික සහ විද්‍යාත්මක විසඳුම් ලබා ගැනීමේ අදහසින් මෙම සාකච්ඡාව සංවිධානය කර තිබුණි.
වනඅලි ගම්වැදීම හේතුවෙන් සහ වගා හානි සිදු කිරීම සම්බන්ධයෙන් වන ගැටලු පිළිබඳ මෙහි දී
අවධානය යොමු වූ අතර මෙම ගැටලුව පාලනය කිරීමට නව රජයේ වැඩපිළිවෙල පිළිබඳ සාකච්ඡා කිරීම සිදු විය.
