නොවැම්බර් මාසයේ ඇතිවූ ගංවතුර තත්ත්වයෙන් ගොවීන්ට සිදුවූ වගා හානි වෙනුවෙන් කෘෂිකාර්මික හා ගොවිජන රක්ෂණ මණ්ඩලය විසින් රුපියල් කෝටි 74කට ආසන්න වන්දි මුදලක් ගොවී ගිණුම්වලට බැර කළ බව කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා පවසයි.
ගංවතුරෙන් වී වගාවට වූ වගා හානි පරික්ෂා කිරීම මේ වන විට අවසන් වී ඇති අතර ඒ අනුව පොලොන්නරුව, වවුනියා, මුලතිව්, මඩකළපුව, ත්‍රිකුණාමලය, අම්පාර සහ මන්නාරම දිස්ත්‍රික්කයන්හි වගා හානිවූ ගොවීන් 38,020කට මෙම වන්දි මුදල් දී තිබේ. වගා හානිවූ බවට තක්සේරු කමිටු මගින් නිර්දේශවූ කුඹුරු අක්කර ප්‍රමාණය 47,115කි.
මෙම වන්දි දීම් යටතේ මන්නාරම දිස්ත්‍රික්කයේ ගොවීන් 4,285 දෙනකුගේ වගා හානි වූ කුඹුරු අක්කර 9,228කට වන්දි වශයෙන් රුපියල් කෝටි 12.6ක මුදලක් අද (26) දින ගොවි ගිණුම්වලට බැර කළ බව ද සභාපතිවරයා අවධාරණය කරයි.
මහව ප්‍රදේශයේත්, කොළඹ, ගාල්ල සහ මාතර දිස්ත්‍රික්කයන්හි ප්‍රදේශ කිහිපයකත් තවත් ගොවීන් සුළු පිරිසකට මෙම වගාහානි වන්දි දීමට සැලසුම් කර ඇතැයිද පේමසිරි ජාසිංආරච්චි මහතා අවධාරණය කරයි.
බුද්ධිකා ඉඹුලාන
