අද බොහෝ දෙනෙකු ජීවිතයේ වඩාත් සුබදායී කටයුතු උදෙසා සුදුසු නැකතක් බලා ඒ අනුව කටයුතු කිරීමට අමතක නොකරති. විවාහයකට විසි පොරොන්දම් ගළපන්නා සේම නිවෙසක් ඉදිකිරීමේදී ඒකදශා හෙවත් එකොළොස් පොරොන්දම පිළිබඳ සලකා බැලිය යුතුය.
මෙම පොරොන්දම් එකොළහෙන් හයක්වත් ගැළපුණේ නම් එම දිග, පළල නිවෙස ඉදිකිරීමට සුදුසු වේ. පළමුව අඩිවලින් ලබාගන්නා දිග, පළල, අඟල් බවට පත්කර ගත යුතුවේ. ඉන් අනතුරුව ශේෂ වඩුරියන් බවට පත්කරගත යුතුය. ඊළඟ අවස්ථාවේදී වර්ග වඩුරියන් බවට වඩුරියන් ශේෂය පත්කර ගනී. වඩුරියන් දිග, පළල එකිනෙකට ගුණකර වර්ග වඩුරියන් ශේෂය ලබාගත හැකිය. වර්ග වඩුරියන් ශේෂය වාස්තු විද්‍යානුකූල ගණිත ක්‍රමයකට භාජනය කර පොරොන්දම් සුබ ද අසුබ ද යන්න සොයාගත හැකිය.
එකොළොස් පොරොන්දම
1.අය 2. වැය 3. යෝනි 4. නැකත් 5. දින 6. අංශක 7.රාශි 8.තිථි 9.වංශ 10.දේවතා 11.ආයුෂ යනුවෙනි.
අය පොරොන්දම
නිවෙසේ ක්ෂේත්‍රඵලය 8න් ගුණකර 12න් බෙදන්න. ශේෂය වශයෙන් ලැබෙන්නේ අය ප්‍රමාණයයි. ශේෂය වැඩිනම් අය වැඩියි. ශේෂය අඩුනම් අය අඩුවේ. ශේෂය 6ට වැඩි නම් නිවැසියන්ට ධනය උතුරා යයි. ඉතිරි නැතිව බෙදුණහොත් පොරොන්දම් ඉතා සුබ වේ.
වැය පොරොන්දම
නිවෙසේ ක්ෂේත්‍රඵලය 9න් වැඩිකර 10න් බෙදීමෙන් ලැබෙන ශේෂය වැය වශයෙන් සැලකේ. එහිදී ශේෂය 5 නම් මධ්‍යස්ථයි. 5ට අඩුනම් සුබදායකයි. 5ට වැඩි නම් සුබයි. වැය වැඩිවේ.
යෝනි පොරොන්දම
නිවෙසේ ක්ෂේත්‍රඵලය 3න් වැඩිකොට 8න් බෙදීමෙන් ලැබෙන ශේෂය අනුව යෝනි පොරොන්දම තීරණය වේ.
ශේෂය 1 ද්වජ හෙවත් අශ්ව යෝනියයි
ශේෂය 2 කොටළු යෝනියයි
ශේෂය 3 සිංහ යෝනියයි
ශේෂය 4 සුනඛ යෝනියයි
ශේෂය 5 වෘෂභ යෝනියයි
ශේෂය 6 ධූම යෝනියයි
ශේෂය 7 ගජ යෝනියයි
ශේෂය 8 කාක යෝනියයි
මෙහිදී අශ්ව, සිංහ, ගජ, වෘෂභ යෝනි සුබදායක වේ. කොටළු, සුනඛ, ධූමා, කාක යෝනි අසුබදායක වේ.
නැකත් පොරොන්දම
නිවෙසේ වර්ගඵලය 8න් ගුණකර 27න් බෙදීමෙන් ලැබෙන ශේෂය නිවෙසට අයත් නැකත නම් කෙරෙයි.
එය මෙසේය.
ශේෂය 1 පුෂ නැකත
ශේෂය 2 විසා නැකත
ශේෂය 3 සියාවස නැකත
ශේෂය 4 මුවසිරස නැකත
ශේෂය 5 හත නැකත
ශේෂය 6 උත්‍රසල නැකත
ශේෂය 7 බෙරණ නැකත
ශේෂය 8 මා නැකත
ශේෂය 9 දෙට නැකත
ශේෂය 10 උත්‍රපුටුප නැකත
ශේෂය 11 පුනාවස නැකත
ශේෂය 12 සා නැකත
ශේෂය 13 දෙනට නැකත
ශේෂය 14 රෙහෙණ නැකත
ශේෂය 15 උත්‍රපල් නැකත
ශේෂය 16 පුවසල නැකත
ශේෂය 17 අස්විද නැකත
ශේෂය 18 අස්ලිය නැකත
ශේෂය 19 අනුර නැකත
ශේෂය 20 පුවසල නැකත
ශේෂය 21 අද නැකත
ශේෂය 22 සිත නැකත
ශේෂය 23 සුවන නැකත
ශේෂය 24 කැති නැකත
ශේෂය 25 පුවසල නැකත
ශේෂය 26 මුල නැකත
ශේෂය 27 රේවතී නැකත. ඉහත නැකත් අතරින් සුබ නැකත් ලෙස ගැනෙනුයේ 2,5,7,9,11,14,16,18,20,23,25,27 යන නැකත්ය. මෙම නැකත් පොරොන්දමෙන් ලැබෙන නැකත සුබ වුවද යෝනි පොරොන්දමේ යෝනිය සමඟ සතුරු නම් එම දිග, පළල සුදුසු නොවේ.
නැකත සමඟ සතුරු යෝනි
දෙනට, පුවපුටුප, උත්‍රපුටුප, සියාවස – සිංහ යෝනියට සතුරුයි
අනුර,දෙට, මුල, පුවසල – අශ්ව යෝනියට ද මා, පුවපල්, උත්‍රපල්, හත – ගජ යෝනිය සමඟ ද කැති රෙහෙණ මුවසිරස, අද, වෘෂභ යෝනිය සමඟ ද සතුරු වේ. ඉතිරි නැකත් 11 කිසිදු යෝනියක් සමඟ සතුරු නොවෙයි.
දින පොරොන්දම
නිවෙසේ ක්ෂේත්‍රඵලය 9න් ගුණ කර 7න් බෙදීමෙන් ලැබෙන ශේෂය අනුව දින පොරොන්දමේ සුබ අසුබ යෙදේ.
ශේෂය 1 නම් සඳු
ශේෂය 2 නම් බුධ
ශේෂය 3 නම් සිකුරු
ශේෂය 4 නම් රවි
ශේෂය 5 නම් කුජ
ශේෂය 6 නම් ගුරු
ශේෂය 7 නම් සෙනසුරුද වේ.
මේ අතරින් සඳු, බුධ, ගුරු, සිකුරු, සුබ ඵල ද රවි, කුජ,ශනි, අසුබ ඵල ද ගෙන දේ.
මෙම දිනවලට සතුරු යෝනි
බුධ සමඟ සිංහ යෝනිය සතුරු වේ. රවිට වෘෂභ ද, කුජට ගජ යෝනිය ද, ශනි සමඟ අශ්ව යෝනිය ද සතුරු වේ.
අංශක පොරොන්දම
නිවෙසේ වර්ගඵලය 4න් ගුණකර 9න් බෙදීමෙන් ලැබෙන ශේෂය අනුව අංශක පොරොන්දමේ සුබ අසුබ ලැබේ.
අර්ථ, බල, භූත, ධාන්‍ය, නෘපති, සුබ වන අතර අර්ථහීන, දුර්වල, නස්කර, ප්‍රේත අසුබ වේ. එහෙයින් මෙහිදී 1ක් ඉතිරි නම් අර්ථ ද, 2ක් නම් අර්ථ හීන ද, 3ක් නම් බල, 4ක් නම් දුර්වල, 5ක් නම් භූත, 6ක් නම් ධාන්‍ය, 7ක් නම් නස්කර, 8ක් නම් නෘපති ද,9ක් නම් ප්‍රේත ද වේ.
රාශි පොරොන්දම
නිවෙසේ වර්ගඵලය 5න් ගුණකර 12න් බෙදීමෙන් ලැබෙන ශේෂය අනුව රාශි පොරොන්දමේ සුබ අසුබ ලැබේ.
මෙහිදී ද ශේෂය 1 නම් මේෂ ද, 2 නම් වෘෂභ, 3 නම් මිථුන, 4 නම් කටක, 5 නම් සිංහ, 6 නම් කන්‍යා, 7 තුලා, 8 වෘශ්චික, 9 ධනු, 10 මකර, 11 කුම්භ, 12 මීන වන අතර මෙයින් වෘෂභ, මිථුන, සිංහ, ධනු, කුම්භ රාශි සුබ වන අතර මේෂ, කටක, කන්‍යා, තුලා, වෘශ්චික, මකර, මීන අසුබ රාශි වේ. එහෙත් කුම්භ, මීන, සිංහ යෝනියට සතුරු වේ. වෘශ්චික, ධනු අශ්ව යෝනියට සතුරු වේ. සිංහ, කන්‍යා ගජ යෝනියට සතුරු වේ
වෘෂභ, මිථුන වෘෂභ යෝනියට සතුරු වේ.
තිථි පොරොන්දම
නිවෙසක ක්ෂේත්‍රඵලය 9න් වැඩිකර 30න් බෙදීමෙන් ලැබෙන ශේෂය අනුව තිථි පොරොන්දම ලැබේ.
සිංහ යෝනිය සමඟ – 4,9,14,19,24,29 තිථි සතුරුයි
අශ්ව යෝනිය සමඟ – 3,8,13,18,23,28 තිථි සතුරුයි
ගජ යෝනිය සමඟ – 2,7, 12, 17,22, 27 තිථි සතුරුයි
වෘෂභ යෝනිය සමඟ – 1,6,11,16,21,26 තිථි සතුරු වේ
5,10,15,20,25 සහ 30 තිථි කිසිදු යෝනියක් සමඟ සතුරු නැත.
වංශ පොරොන්දුව
නිවෙසේ වර්ගඵලය 3න් වැඩිකොට 4න් බෙදීමෙන් ලැබෙන ශේෂය අනුව මෙම පොරොන්දම ලැබේ. ශේෂය 1නම් බ්‍රාහ්මණ ද, 2 නම් ක්‍ෂත්‍රිය ද, 3 නම් වෛශ්‍ය ද, 4 නම් ශුද්‍ර ද වේ. මෙහිදී ශුද්‍ර වංශය පමණක් අසුබ යැයි පැවසේ.
දේවතා පොරොන්දම
නිවෙසේ වර්ගඵලය 5න් ගුණකර 3න් බෙදීමෙන් ලැබෙන ශේෂය අනුව දේවතා පොරොන්දම ලැබේ. එය බ්‍රහ්ම, විෂ්ණු, ශිව යන දේවතාවන් තුන් දෙනාට හිමිය. ශේෂය 1 නම් බ්‍රහ්ම ද 2 නම් විෂ්ණු ද 3 නම් ශිවටද අයත් වේ. මෙයින් බ්‍රහ්ම, විෂ්ණු යන දෙකම සුබ වන අතර ශිව අසුබ වේ.
ආයුෂ පොරොන්දම
අය වැය පොරොන්දම් දෙක තරමටම මෙම ආයුෂ පොරොන්දම ද වාස්තු විද්‍යාවේදී වැදගත් වේ. නිවෙසේ ක්ෂේත්‍රඵලය 27න් ගුණකර 100න් බෙදීමෙන් ලැබෙන ශේෂය අනුව ආයුෂ පොරොන්දම තීරණය වේ. එවිට ලැබෙන ශේෂය 50ට වැඩිනම් සුබදායක වන අතර, 50ට අඩුනම් සුබදායක නොවනු ඇත.
නිවෙසක් ඉදිකිරීමේදී ඉහත සඳහන් කළ පොරොන්දම් 6කට වැඩි ගණනක් සුබ විය යුතු අතර අය වැය සහ ආයුෂ පොරොන්දම අනිවාර්යයෙන්ම සුබවිය යුතුය.
වාස්තු විද්‍යා උපදේශක
වාස්තු විද්‍යා ප්‍රදීප
සම්මානලාභී
කේ. සුනිල් කුමාර වත්තගේ
