මුදල් අමාත්‍යාංශය නමින් මෝටර් රථ ප්‍රවාහන දෙපාර්තමේන්තුවේ ලියාපදිංචි කර ඇති නමුත් භෞතික පැවැත්ම තහවුරුව නැතැයි ජාතික විගණන කාර්යාලය නිකුත් කළ වාර්තාවක දැක්වුණු වාහන 176 එවකට පැවැති සැලසුම් ක්‍රියාත්මක කිරීමේ අමාත්‍යාංශය මඟින් ග්‍රාමීය සංවර්ධන ව්‍යාපෘතිවලට දිවයින පුරා යෙදවූ වාහන යැයි මුදල් අමාත්‍යාංශය පවසයි.
එම වාහන 176 සම්බන්ධයෙන් දිනමිණ පුවත්පතේ වාර්තා වී ඇති ප්‍රවෘත්තිය ගැන මුදල් අමාත්‍යාංශය සැකසූ වාර්තාවකින් පෙන්වා දෙන්නේ එවකට පැවති සැලසුම් ක්‍රියාත්මක කිරීමේ අමාත්‍යාංශය ඈවර කිරීමෙන් පසුව මෙම වාහන මුදල් අමාත්‍යාංශයට පැවරී ඇති බවයි. මෙම වාහන අතරින් 1994 සිට 2004 දක්වා වෙනත් රාජ්‍ය ආයතන වෙත පවරා දී ඇති වාහන සංඛ්‍යාව 102ක් වන අතර අපහරණය කර ඇති වාහන සංඛ්‍යාව 8කි.
අසාදු ලේඛනගත කර ඇති වාහන සංඛ්‍යාව 66 කි. අසාදුගත කර ඇති වාහන 66 සම්බන්ධව සොයා බැලීමේදී එම වාහනවල ආයු කාලය මේ වන විට අවුරුදු 50 ඉක්මවා ඇති බවත්, ඒ අතර පැරණි මෝටර් සයිකල්, ට්‍රැක්ටර්, ට්‍රැක්ටර් ටේලර් සහ අත් ට්‍රැක්ටර් ද වන බැවින් ඒවා පාවිච්චි කිරීමට සුදුසු නොවන තත්ත්වයේ පැවති බව නිරීක්ෂණය කර ඇති බවත් මුදල් අමාත්‍යාංශය පවසයි.
මෙම වාහන කුමන ප්‍රදේශයක පැවතියද ඒවා අබලන් වශයෙන් පවතින බවට ඒවායේ ආයු කාලයත් සමඟ නිරීක්ෂණය කළ හැකි බවත් මෙම වාහන දැනට ඇති ස්ථාන හඳුනා ගත්තද ධාවනයට සුදුසු තත්ත්වයේ පැවතිය නොහැකි බව ද අමාත්‍යාංශය සඳහන් කරයි.
මේ පිළිබඳ මෝටර් රථ දෙපාර්තමේන්තුව සමඟ සාකච්ඡා කර එම වාහන සම්බන්ධයෙන් දීර්ඝ කාලයක් තිස්සේ සොයා බැලීමට ලක් කර, ඊට අදාළ තොරතුරු වාර්තා නොවූ හෙයින් එම වාහන 66 අසාදු ලේඛනගත කිරීමට කටයුතු කර තිබේ.
ඒ අනුව මුදල් අමාත්‍යාංශය සතු උක්ත වාහනවලට අමතරව වෙනත් කිසිදු වාහනයක් අස්ථානගතව හෝ තහවුරු කර ගැනීමට නොහැකි වාහන හෝ නොමැති බවත් මුදල් අමාත්‍යාංශය සතු වාහන සියල්ලෙහිම අදාළ වාර්තා අමාත්‍යාංශය සතුව පවතින බවත් අමාත්‍යාංශය එවා ඇති ලිපියෙහි සඳහන් වේ.
රන්මලී සෝමසිරි
