පාසල් පොත්පත් සහ උපකරණ මිල දී ගැනීමට රජයෙන් ලබාදෙන රුපියල් 6000ක මුදල් වවුචරය ලබා ගැනීමට නම් 2025 වර්ෂයට නියමිත පාසල් සංවර්ධන ගාස්තු ගෙවා අවසන් කළ යුතුව ඇතැයි කියමින් ගාල්ලේ පාසලක විදුහල්පතිවරයෙක් මවුපියන්ට වට්ස්ඇප් පණිවිඩයකින් දැනුම් දී තිබේ.
අස්වැසුම ප්‍රතිලාභී පවුල්වල දරුවන්ට පාසල් උපකරණ සහ පොත්පත් මිල දී ගැනීමට අවශ්‍ය රුපියල් 6000ක මුදල අස්වැසුම මුදල් බැර කරන ගිණුමට රජයෙන් එකතු කරයි. ඊට අමතරව ළමයින් 300කට අඩු පාසල්වල අනෙකුත් සියලු සිසුන්ට මුදල වවුචරයක් ලෙස රජයෙන් ලබාදෙයි.
මේ කියන විද්‍යාලයේ ඉගෙනුම ලබන ළමයින් සංඛ්‍යාව 260ක් පමණ වන බැවින් පාසලේ සිසු දරු දැරියන්ට ද රජයේ දීමනාවට හිමිකම් ලැබී ඇත. ඒ අනුව පාසලේ සිසුන් අතරින් අස්වැසුම ප්‍රතිලාභී පවුල්වලට අදාළ නොවන සිසු සිසුවියන් 93ක් සඳහා රුපියල් 6000.00 බැගින් මුදල් වවුචර පසුගිය සතියේ පාසලට ලැබී ඇතැයි වාර්තා වෙයි.
මේ වවුචර ලැබුණු පසු පාසලේ විදුහල්පති මවුපියන්ගේ වට්ස්ඇප් සමූහයකට පණිවිඩයක් යොමු කරමින් පවසා ඇත්තේ, 2025 වර්ෂයට නියමිත පාසල් සංවර්ධන ගාස්තුව වන රුපියල් 1260ක මුදල ගෙවා අවසන් කරන තුරු වවුචර ලබා නොදෙන බවයි. එබැවින් වවුචර ලබාගැනීමට නම් පාසල් සංවර්ධන ගාස්තු ගෙවා අවසන් කර පැමිණෙන ලෙස විදුහල්පතිවරයා මවුපියන්ට දන්වා ඇත.
මවුපියන් පවසන්නේ පාසල් සංවර්ධන සමිති රැස්වීමක දී වාර්ෂික පාසල් සංවර්ධන ගාස්තුව වාරික තුනකින් ගෙවීමට හැකි වන පරිදි යෝජනාවක් පවා සම්මත කර තිබිය දී විදුහල්පතිවරයා අත්තනෝමතික ලෙස කටයුතු කරන බවයි. එමඟින් දරුවන් සහ මවුපියන් දැඩි පීඩාවකට පත්වන බව ද මවුපියෝ පෙන්වා දෙති.
මේ සම්බන්ධයෙන් විදුහල්පතිගෙන් මේ ගැන විමසා සිටියදී ඔහු මෙසේ කීවේය.
“ඔව්. මම කිව්වා දරුවන්ට දෙන රුපියල් 6000ක පොත් සහ උපකරණ වවුචර ගැනීමට එනවා නම් පාසල් සංවර්ධන සමිති ගාස්තු ගෙවා අවසන් කර එන්න කියලා. මේ අය පාසල් සංවර්ධන ගාස්තු ගෙවන්නේ නැත්තේ වුවමනාවක් නැතිකම නිසයි. අපි පාසල පවත්වාගෙන යන්නේ ඉතාමත් අමාරුවෙන්. මුදල් එකතු කරන්න එපා කියා අමාත්‍යාංශයෙන් චක්‍රලේඛ එවා තියෙනවා. රජයෙන් පාසල නඩත්තුවට සල්ලි දෙන්නෙත් නෑ. පාසල් සංවර්ධන ගාස්තුවලින් තමයි ඔක්කොම කරන්නේ. පාසල් සංවර්ධන සමිතියේ දී ගත් තීරණය නොවෙයි විදුහල්පති ලෙස මේ පාසල පවත්වාගෙන යෑමට මම මේ තීරණය ගත්තා”
දකුණු පළාත් අධ්‍යාපන අධ්‍යක්ෂ චන්න උපාලි වීරසේකර මහතාගෙන් විමසූ විට ඔහු මෙසේ කීවේය.
“දරුවන්ට පොත්පත් සහ උපකරණ මිල දී ගැනීමට රුපියල් 6000ක වවුචරයක් රජයෙන් දුන්නා. එය වෙනම දීමනාවක්. ඒ වවුචරය දෙන්න පාසල් සංවර්ධන ගාස්තු ගෙවා අවසන් කරන්න ඕනෑ කියා කොන්දේසියක් දානවා නම් ඒක වැරදියි. එය නොවිය යුතු දෙයක්. පාසල් සංවර්ධන ගාස්තු මවුපියන්ගෙන් අය කරගැනීම වෙන දෙයක්. රජයේ දීමනා දරුවන්ට කොන්දේසි නැතිව දෙන්න ඕනෑ. මම මේ ගැන වහාම සොයා බලනවා”යිද පැවැසීය.
කරාපිටිය සමූහ එස්. ලොකුකරවිට
