ආයුධ පෙන්වීමට ගොස් පොලීසිය සමඟ ගැටී මෝදර කාක දූපතේදී පෙරේදා (22) අලුයම් කාලයේදී වෙඩි වැදී මරුමුවට පත්වූ පාතාලයේ සැකකරුවන් දෙදෙනා කොටහේනේ පිහිටි EVER SHINE නමැති ජංගම දුරකතන අලෙවිසලේ හිමිකරුට ටී 56 අවියකින් වෙඩි තබා ඝාතනය කර ඇත්තේ ඩුබායි හි රැඳී සිටින ප්‍රබල මත්කුඩු ජාවාරම්කරුවකු වන නිපුන විසින් ලබාදුන් කොන්ත්‍රාත්තුවකට අනුව බව විමර්ශනවලින් හෙළිවී තිබේ.
පාතාලයේ මත්කුඩු ජාවාරම්කරුවන් අතර හටගෙන ඇති ගැටුමක ප්‍රතිඵලයක් ලෙස ප්‍රබල මත්කුඩු ජාවාරම්කරුවකු වන ප්‍රංශ රූබන්ගේ ඥාතියකුට වෙඩි තැබීමට පැමිණ ව්‍යාපාරික සථානය මාරුවී EVER SHINE නමැති ජංගම දුරකතන වෙ‍ෙළඳසලේ හිමිකරු වන සිවලිංගම් ශෂිකුමාර් (36) ඝාතනය කර ඇති බවත් විමර්ශනවලින් පෙනී ගොස් ඇත.
ඩුබායි නිපුන විසින් පසුගිය වසරේ පෙබරවාරි 13 වෙනිදා ප්‍රංශ රූබන්ගේ සමීපතමයෙකු වන අවන්හල් හිමිකරුවකුට මෝදර දී සිය ගෝලයන් යොදවා වෙඩි තබා තිබුණි. ප්‍රංශ රූබන්, වැල්ලේ සාරංග, කංජිපානි ඉම්රාන් ඇතුළු පාතාලයේ ප්‍රබල මත්කුඩු ජාවාරම්කරුවන් පිරිසක් එක කණ්ඩායමක් ලෙසද ඩුබායි නිපුන ඇතුළු පිරිසක් වෙනම කණ්ඩායමක් ලෙසද මේ වන විට මත්කුඩු ජාවාරමේ කොටස බෙදා ගැනීමට සටනක නිරතව සිටින බව බුද්ධි තොරතුරු සඳහන් කරයි. මෝදර, මට්ටක්කුලිය, ග්‍රෑන්ඩ්පාස් සහ කොටහේන ප්‍රදේශ ආශ්‍රිතව මත්කුඩු ජාවාරමේ කොටස වෙනුවෙන් මෙම කල්ලි දෙක පසුගිය වසර දෙකක කාලයක් තිස්සේ මරාගන්නා බවත් ඒ හේතුවෙන් වෙඩි තැබීම් සහ ඝාතන විස්සකට ආසන්න ප්‍රමාණයක් සිදුව ඇති බවත් බුද්ධි අංශ විසින් කර ඇති තොරතුරු ගවේෂණයකදී අනාවරණය වී තිබේ.
මෙම දෙපාර්ශ්වයේ ගැටුම්වලට අහිංසක පිරිස් ද හසුවන බවත් EVER SHINE ජංගම අලෙවිසලේ සිදුවූ වෙඩි තැබීමෙන්ද මියගොස් ඇත්තේ එවැනි පුද්ගලයෙක් බවද එම තොරතුරු සඳහන් කළේය.
පසුගිය 21 වෙනිදා රාත්‍රී 8.35ට පමණ යතුරුපැදියකින් පැමිණි දෙදෙනෙකු විසින් කොටහේනේ අංක 15 දරන ස්ථානයේ පිහිටි EVER SHINE ජංගම දුරකතන අලෙවි ස්ථානයට පැමිණ සිවලිංගම් ශිවකුමාර්ට වෙඩි තබා ඇත්තේ ටී 56 අවියකිනි. ඔවුන් දෙදෙනා පලායමින් සිටියදී මහජනතාව විසින් ලබාදුන් තොරතුරු ඔස්සේ වෙරළබඩ පොලිස් ස්ථානයේ රථවාහන අංශයේ යතුරුපැදි බළකායේ රාත්‍රී සංචාරක අංශයේ නිලධාරීන් වන පොලිස් කොස්තාපල් බණ්ඩාර (11906) සහ විනද්‍යාන් (104254) වෙඩික්කරුවන් ගමන් කරමින් සිටි යතුරුපැදිය ලුහුබැඳ ඇත. ඔරුගොඩවත්ත කලර් ලයිට් එක අසලදී මෙම නිලධාරීන් විසින් සැකකරුවන් අත්අඩංගුවට ගෙන ඇත්තේ වෙඩි තැබූ ටී 56 අවිය ද සමඟය. එහිදී ඔවුන් දෙදෙනා අත්අඩංගුවට ගැනීමට දැඩි පරිශ්‍රමයක් පවා දැරීමට පොලීසියට සිදුව ඇත. මෙම සැකකරුවන් දෙදෙනා කොටහේන පොලිස් ස්ථානයට භාරදීමෙන් අනතුරුව පොලිස් ස්ථානාධිපති ප්‍රධාන පොලිස් පරීක්ෂක කෝසල මහතා ඇතුළු නිලධාරීන් සැකකරුගෙන් ප්‍රශ්න කිරීමේදී ගිනි අවි සඟවා ඇති ස්ථානයක් ගැන තොරතුරු හෙළිකර ඇති බව පොලිස් නිල තොරතුරු සඳහන් කරයි.
ඒ අනුව සැකකරුවන් සමඟ පොලිස් කණ්ඩායමක් මට්ටක්කුලිය කාක දූපතට ගිනි අවි සොයා ගිය අවස්ථාවේදී පොලිස් ස්ථානාධිපතිවරයාගේ පිස්තෝලය උදුරා ගැනීමට සැකකරුවන් පොරබදන විට එහි සිටි පොලිස් කොස්තාපල් මධුසංක (27771) නිලධාරියාගේ දකුණු පාදයට වෙඩි වැදී ඇති බව පොලිසිය කියයි. එම අවස්ථාවේදී එම ස්ථානයේ සිටි පොලිස් කොස්තාපල්වරයෙකු ආරක්ෂාව සඳහා ඔහු භාරයේ තිබුණු ටී 56 අවියෙන් සැකකරුවන් දෙසට වෙඩි තබා ඇති බව පොලිසිය සඳහන් කරයි. මෙහිදී තුවාල ලැබූ කොස්තාපල්වරයාත් සැකකරුවන් දෙදෙනා කොළඹ ජාතික රෝහලට ඇතුළත් කළ බවත් සැකකරුවන් දෙදෙනා එහිදී මියගිය බවත් පොලිසිය පවසයි. මෙම සිදුවීමෙන් අනතුරුව පොලිස් විශේෂ කාර්ය බළකාය ඇතුළු පොලිස් නිලධාරීන් කාක දූපතේ මෙම සිදුවීම වූ ස්ථානයේ පරීක්ෂාවක් සිදුකර ඇති අතර එහිදී දේශීය වශයෙන් නිෂ්පාදනය කළ අත්බෝම්බයක් හමුවී තිබේ.
මෙසේ පොලිස් වෙඩි පහරින් මරුමුවට පත්ව ඇත්තේ යුද හමුදාවේ හිටපු සෙබළෙක් වන පිළියන්දල මඩපාත පදිංචිව සිටි අරුණික ලක්මාල් ජයවර්ධන නමැති 32 හැවිරිදි පුද්ගලයෙකි. ඔහු වෘත්තියෙන් පින්තාරුකරුවකු ලෙස කටයුතු කරමින් සිට ඇත. වෙඩික්කරු ලෙස හඳුනාගෙන ඇත්තේ ඔහුවය. දෙවැන්නා කොළඹ 15 මෝදර මාදම්පිටිය මාවතේ පදිංචිකරුවෙක් වන විජය කුමාර ප්‍රනාත් නිර්මානන්ද (35)ය. පැදිකරු ලෙස කටයුතු කර ඇත්තේ ඔහුය.
වෙඩි තැබීමට ඔවුන් දෙදෙනා ගමන් කළ යතුරුපැදිය සම්බන්ධයෙන් ද පොලිසිය විමර්ශන ආරම්භ කර ඇත. මේ සම්බන්ධයෙන් විමර්ශන ක්‍රියාත්මක බව පොලීසිය කියයි.
ගයාන් කුමාර වීරසිංහ
