සිය දරුවන් දෙදෙනා සමඟ වෙඩි ප්‍රහාරයට ලක්ව මරණයට පත්වූ අරුණ ප්‍රියන්ත හෙවත් “කජ්ජා” නමැති අපරාධකරු පොලිස් වෙසින් මංකොල්ලයක් කිරීමේ සූදානමක් ඇතිව පොලිස් නිලධාරියකුගේ නි‍ෙවසකට ගොස් අත්විලංගු දෙකක් රැගෙන ගමන් කරමින් සිටියදී වෙඩි ප්‍රහාරයට ලක්ව ඇති බව පොලිස් විමර්ශනවලින් අනාවරණය වී තිබේ.
හරක් කටාගේ මත්කුඩු තොගයක් අත්අඩංගුවට ගැනීමට පොලීසියට තොරතුරු දීමක්, ගංජා තොගයක් කොල්ලකෑමක්, බූරු පිටි කොල්ලකෑමක් ඇතුළු අපරාධ ගොන්නක් සම්බන්ධයෙන් මෙන්ම දේශපාලන විරසකකම් මත ජීවිත තර්ජනයට ලක්ව සිටි කජ්ජා කාලයක් තිස්සේ සිට ඇත්තේ ආරක්ෂා සහිතව බව ද විමර්ශනවලින් පෙනී ගොස් ඇත. පසුගිය 18දා ඔහු මාංචු කුට්ටම තමා දන්නා කියන නිලධාරියකුගෙන් ගැනීමට, හය හැවිරිදි දියණිය හා 09 හැවිරිදි පුතාව යතුරුපැදියේ නංවාගෙන ගොස් ඇත්තේ දරුවන් දෙදෙනා සමඟ ගමන් කිරීමේ දී තර්ජනයක් එල්ල නොවනු ඇතැයි විශ්වාස කරමින් විය හැකි යැයි විමර්ශන නිලධාරීහු සැක කරති.
පොලීසියේ මාංචු කුට්ටම ගැන තොරතුරු හෙළිවී ඇත්තේ කජ්ජා ඝාතනය වූ ස්ථානයේ තිබී හමුවූ මාංචු කුට්ටම සම්බන්ධයෙන් කළ විමර්ශනයේදීය. ඊට සම්බන්ධ පොලිස් කොස්තාපල්වරයා පසුගිය 21 වැනිදා මුලින්ම අත්අඩංගුවට ගෙන ඇති පොලීසිය අනතුරුව ඔහුගේ තොරතුරු සහ විමර්ශන තොරතුරු ඔස්සේ යුද හමුදාවෙන් පලාගොස් පසුව නීත්‍යනුකූලව හමුදා සේවයෙන් ඉවත්වූ දෙදෙනෙක් අත්අඩංගුවට ගෙන තිබේ. වලස්මුල්ල සහ වීරකැටියේ පදිංචිකරුවන් වන ඔවුන් දෙදෙනා අත්අඩංගුවට ගෙන ඇත්තේ ද 21 වැනිදාය. වයස අවුරුදු 37ක් වන ප්‍රසාද් කුමාර නමැති සැකකාර හිටපු හමුදා සෙබළා 2017 වසරේදී හමුදාවෙන් පලාවිත් 2023 වසරේදී නීත්‍යනුකූලව ඉවත්ව ඇති බව පොලීසිය කියයි. ඔහු වලස්මුල්ල බෝවල පදිංචිකරුවෙකි. දෙවැන්නා අවුරුදු 39ක් වන තුෂාර හෙවත් “සිඟිති කළුවා” නමැත්තායි. 2010 වසරේදී හමුදා සේවයෙන් පලාවිත් සිටින ඔහු නීත්‍යනුකූලව 2017 වසරේදී හමුදා සේවයෙන් ඉවත්ව ඇති බව ද පොලීසිය සඳහන් කරයි. මෙම සැකකරු වීරකැටිය, හකුරුවෙල පදිංචිකරුවෙකි. මේ හැරුණුකොට පසුගිය 22 වෙනිදා තංගල්ල කොට්ඨාස අපරාධ විමර්ශන කාර්යාංශයේ නිලධාරීන් විසින් මෙම ත්‍රිත්ව ඝාතනය සම්බන්ධයෙන් සැකපිට 29 හැවිරිදි වියේ පසුවන තවත් අයෙක් අත්අඩංගුවට ගෙන තිබේ. ඒ අනුව ඊයේ වනවිට මෙම ත්‍රිත්ව ඝාතනයට සැකපිට පස් දෙනෙක් අත්අඩංගුවට ගෙන තිබුණි. එම සැකකරුවන් වලස්මුල්ල මහේස්ත්‍රාත් අධිකරණයට ඉදිරිපත් කිරීමෙන් පසු පොලිස් නිලධාරියා මාර්තු 03 වැනිදා දක්වා රක්ෂිත බන්ධනාගාරගත කරමින් සෙසු සැකකරුවන් පැය 72ක කාලයක් රඳවාගෙන ප්‍රශ්න කිරීමට අවසර දී තිබේ. ඒ අනුව එම සැකකරුවන්ගෙන් රඳවාගෙන කරනු ලබන විමර්ශනවලින් වැදගත් තොරතුරු රැසක් අනාවරණය වෙමින් ඇති බව පොලිස් තොරතුරු සඳහන් කළේය. මෙම සැකකරුවන් තිදෙනා අද (24) අධිකරණයට ඉදිරිපත් කිරීමට නියමිතය.
ගයාන් කුමාර වීරසිංහ
