විදෙස් රටක නිෂ්පාදිත බැරල් දෙකේ ජීව උණ්ඩ යෙදිය හැකි ගිනි අවියක් සමඟ මත්තල දී අත්අඩංගුවට පත් බෙලිඅත්ත ප්‍රාදේශීය සභාවේ හිටපු සභාපතිවරයා රුපියල් ලක්‍ෂ දහය බැගින් වූ ශරීර ඇප දෙකක් මත නිදහස් කරන ලෙස හම්බන්තොට මහේස්ත්‍රාත් හා අතිරේක දිසාවිනිසුරු ඕෂධ මිගාර මහආරච්චි මහතා පෙරේදා (22) නියම කළේය.
හිටපු සභාපතිවරයා වන 62 හැවිරිදි සිරිල් මුණසිංහ නමැති අයකු මෙසේ ඇප මත මුදා හැරිණි.
සැකකාර හිටපු ප්‍රාදේශීය සභා සභාපතිවරයාට අයත් මත්තල පොලිස් වසමේ මත්තල ගම්මිරිස් වගාව පිටුපස ඇති නි‍ෙවසේ සිටියදී ගිනි අවිය සමඟ අත්අඩංගුවට පත්ව තිබේ. සැකකරු සම්බන්ධයෙන් මත්තල පොලිස් ස්ථානාධිපතිවරයාට ලද පෞද්ගලික තොරතුරකට අනුව මෙම වැටලීම සිදු කර තිබේ.
සැකකාර ප්‍රාදේශීය සභාපතිවරයා ශ්‍රී ලංකා පොදු ජන පෙරමුණ නියෝජනය කරමින් දේශපාලනයේ නිරත වූවකු වන අතර මීට පෙර ද බෙලිඅත්ත ප්‍රදේශයේ පානීය ජල යෝජනා ක්‍රමයකට අදාළව රැගෙනවිත් තිබූ ජී.අයි. බට සොරකමක් සම්බන්ධයෙන් ද 2022 වසරේ දෙසැම්බර් 29 වැනි දින පොලිස් අත්අඩංගුවට පත්ව පසුව අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කර තිබේ.
සැකකාර ප්‍රාදේශීය සභාපතිවරයාට එලෙස අත්අඩංගුවට පත් ගිනි අවිය ලැබුණේ කෙසේද? ඔහු කුමක් සඳහා මෙම ගිනි අවිය භාවිත කළේ ද? යන්න සම්බන්ධයෙන් වැඩිදුර පොලිස් පරීක්ෂණ මත්තල පොලීසිය විසින් සිදු කරනු ලබයි.
දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත්, නියෝජ්‍ය පොලිස්පති නිශාන්ත සොයිසා, තංගල්ල කොට්ඨාස භාර ජ්‍යෙෂ්ඨ පොලිස් අධිකාරී උපුල සෙනෙවිරත්න, හම්බන්තොට සහකාර පොලිස් අධිකාරි පෙරේරා යන මහත්වරුන්ගේ උපදෙස් මත මත්තල පොලිස් ස්ථානාධිපති පොලිස් පරීක්ෂක ප්‍රසාද් බණ්ඩාර, පොලිස් සැරයන් (72954) රොෂාන්, පොලිස් කොස්තාපල්වරුන් වන (96113) සෙනෙවිරත්න, (21681) හසන්ත යන නිලධාරින් විසින් වැටලීම සිදුකර සැකකරු අත්අඩංගුවට ගෙන තිබේ.
සූරියවැව – නුවන් ජයසේකර
