Made in Sri Lanka සන්නාමය සහිත නවෝත්පාදන වැඩි වශයෙන් ගෝලීය වෙළෙඳපොළට නිකුත් කිරීමට සහාය සහ දිරිගැන්වීම ලබා දීම රජයේ අරමුණ බව විද්‍යා හා තාක්ෂණ ඇමැති ක්‍රිෂාන්ත අබේසේන මහතා ප්‍රකාශ කළේය.
මරදානේ පිහිටි VEGA Innovations සමාගමේ පර්යේෂණ හා නිෂ්පාදන කටයුතු නිරීක්ෂණය සඳහා පසුගියදා (20) එක් වෙමින් ඇමැතිවරයා මෙසේ ප්‍රකාශ කළේය.
දීර්ඝ කාලයක සිට නව විද්‍යාත්මක හා තාක්ෂණික පර්යේෂණ සිදු කරමින් පරිසර හිතකාමී නිෂ්පාදන ගණනාවක් දේශීය හා විදේශීය වෙළෙඳපොළට නිකුත් කර දේශීය ආර්ථිකය ශක්තිමත් කිරීමට වෙහෙසෙන ආචාර්ය හර්ෂ සුබසිංහ මහතා ප්‍රමුඛ VEGA Innovations කණ්ඩායමේ සේවය ඇමැතිවරයා අගය කර සිටියේය.
VEGA Innovations සමාගම නිපදවා ඇති ලොව වේගවත්ම විද්‍යුත් මෝටර් රථයක් ලෙස සැලකෙන, VEGA විද්‍යුත් මෝටර් රථය, දේශීයව නිපදවා ඇති පූර්ණ විද්‍යුත් ත්‍රීවීල් රථ හා මෝටර්සයිකල් ඇතුළු සමාගම මඟින් නැනෝ තාක්ෂණය, ජෛව තාක්ෂණය, AI තාක්ෂණය ආදි නව තාක්ෂණයන් යොදා ගනිමින් නිපදවා ඇති අනෙකුත් තාක්ෂණික නිෂ්පාදන ක්‍රිෂාන්ත අබේසේන ඇමැතිවරයා මෙහිදී නිරීක්ෂණය කළේය.
එහිදී වැඩිදුරටත් අදහස් දැක්වූ ඇමැතිවරයා ප්‍රකාශ කළේ, මෙතෙක් දේශීයව සිදු කරන ලද පර්යේෂණ හා නවෝත්පාදන දැන් පවතින තත්ත්වයට වඩා ඉහළට ගෙන යෑමට රාජ්‍ය සහයෝගය ලබා දීම රජයේ අරමුණ බවයි. පර්යේෂකයන් සහ ව්‍යවසායකයන් මුහුණදෙන ගැටලුවලට විසඳුම් දී නිෂ්පාදන ආර්ථීකය වඩාත් ශක්තිමත් කිරීමේ අරමුණ ඇතිව රේඛීය අමාත්‍යාංශ හා ආයතන සමඟ නව සම්බන්ධතා ගොඩනඟා ගැනීමට පරිසරය සකස් කරන බවත් රජයේ ජාතික පර්යේෂණ හා සංවර්ධන ප්‍රතිපත්තිය විද්‍යා හා තාක්ෂණ අමාත්‍යාංශයේ මූලිකත්වයෙන් ක්‍රියාත්මක කිරීමට නායකත්වය දෙන බවත් පැවසීය.
සාම්ප්‍රදායික දේශීය දැනුම සමඟ නව විද්‍යාත්මක පර්යේෂණ ක්‍රම මුසු කරමින් නිෂ්පාදනය කරන ලද දේශීය ඖෂධීය නිෂ්පාදන වැනි නවෝත්පාදන සායනික පරීක්ෂණ සඳහා යොමු කළ යුතු බවත් ඒ සඳහා ඉදිරියේදී සහාය දෙන බවත් පැවසූ ඇමැතිවරයා, එහි සාර්ථකත්වය මත විස්වසනීයත්වයත් සමඟ තරගකාරී ගෝලීය වෙළෙඳපොළට එම නිෂ්පාදන නිකුත් කළ හැකි බව ද කීය.
මෙහිදී අදහස් දැක් වූ ආචාර්ය හර්ෂ සුබසිංහ මහතා දේශීය නිෂ්පාදන ආර්ථිකයක් වෙනුවෙන් කලින් කලට වෙනස් නොවන ජාතික ප්‍රතිපත්ති සම්පාදනයට අවධානය යොමු කරන ලෙස පැවසූ අතර, පර්යේෂණ ආයතන සතු අති නවීන පර්යේෂණ උපකරණ උපරිම කාර්යක්ෂමතාවකින් භාවිත කිරීමට සුදුසු යන්ත්‍රණයක් සකස් කිරීමේ වැදගත්කම පෙන්වා දුන්නේය. නවීන විද්‍යා හා තාක්ෂණික ක්‍රමවේද වර්තමානය වන විට කෘත්‍රිම බුද්ධිය ද සමඟ වේගවත් වර්ධනයක් අත්කරගෙන ඇති බවත් ඉදිරියේදී එය තවත් වේගවත්ව සංවර්ධනය වනු ඇති බවත් ප්‍රකාශ කළේය.
තවමත් හඳුනා නොගත් අති විශාල දැනුමක් විශ්වයේ පවතින බව තමන් විශ්වාස කරන බව පැවසූ හර්ෂ සුබසිංහ මහතා, ආධ්‍යාත්මික ශක්තීන් ඔස්සේ එම දැනුම ගවේෂණය කළ යුතු බව පැවසීය. ඒ වෙනුවෙන් ද තෝරා ගත් තරුණ ප්‍රජාවක් සමඟ සිදුකරන පර්යේෂණ වැඩසටහනක් පිළිබඳව ද ඔහු, ඇමැතිවරයාව දැනුම්වත් කළේය.
මෙම අවස්ථාවට ගම්පහ දිස්ත්‍රික් පාර්ලිමේන්තු මන්ත්‍රී ස්ටෙෆ්නි ප්‍රනාන්දු මහතා ද එක් විය.
උපාලි කරුණාරත්න
