කළුතර පොලිස් විද්‍යාලයේ නියෝජ්‍ය අධ්‍යක්ෂ ලෙස සේවයේ නිරතව සිටි ජ්‍යෙෂ්ඨ පොලිස් අධිකාරි නීතිඥ ගාමිණි ජයලත් විජේසිංහ මහතා පොලිස් සේවයෙන් ඉවත්ව පැවිදි දිවියට පෙරේදා (22) එක්ව තිබේ. කලටුවාවේ පිහිටි ජේතවනාරාම විහාරස්ථානයේ වසරකට ආසන්න කාලයත් ගිහියෙක් ලෙස බණ භාවනාවේ යෙදී සිටීමෙන් අනතුරුව ගාමිණි ජයලත් විජේසිංහ මහතා පෙරේදා (22) පැවිදි දිවියට පිවිස ඇත්තේ වාද්දූවේ ගෝතම හිමි නමිනි.
පොලිස් සේවයේ වසර 6ක පමණ කාලයක් තවදුරටත් සේවය කිරීමට හැකියාව තිබියදී පොලිස් සේවයෙන් ඉවත්ව ජේතවනාරාම විහාරස්ථානයට ගොස් බණ භාවනාවේ යෙදීමෙන් පසු ගාමිණි ජයලත් විජේසිංහ මහතා පැවිදි දිවියට පිවිසි බව ඔහුගේ පොලිස් මිතුරෙකු වන විශ්‍රාමික ජ්‍යෙෂ්ඨ පොලිස් අධිකාරී ඩී.එස්.වික්‍රමසිංහ මහතා පැවසීය.
උඩවලව ඇත්අතුරු සෙවණේ ප්‍රධාන වෛද්‍යවරයා ලෙස සේවයේ නිරතව සිටි වෛද්‍යවරයා ද, ඉංජිනේරුවරුන්, පරිගණක ඉංජිනේරුවරුන්, විදේශිකයන් ඇතුළු විවිධ තරාතිරම්වල පුද්ගලයන් රැසක් මෙදින පැවිදි දිවියට පිවිසි බව ද වික්‍රමසිංහ මහතා සඳහන් කළේය.
ගයාන් කුමාර වීරසිංහ
