තමිල්නාඩු ධීවරයන්ට මෙරට මුහුදු සීමා තරණය නොකරන ලෙස දැනුම් දෙන මෙන් ගෞරවයෙන් ඉල්ලා සිටින බව ධීවර ඇමැති රාමලිංගම් චන්ද්‍රසේකර් මහතා ඉන්දීය පාර්ලිමේන්තු මන්ත්‍රීනී කනිමෝලි වෙත දැනුම් දී තිබේ.
ශ්‍රී ලංකාවේ සමුද්‍රීය ස්වෛරීභාවය සහ දේශීය ධීවරයන් ආරක්ෂා කිරීමේ අවශ්‍යතාව දැඩි ලෙස අවධාරණය කර ඇති ඇමැතිවරයා ශ්‍රී ලංකා නාවික හමුදාව විසින් තමිල්නාඩු ධීවරයන් නැවත නැවත අත්අඩංගුවට ගැනීම ඉන්දීය පාර්ලිමේන්තු මන්ත්‍රීනී කනිමෝලි විසින් හෙළා දැකීමට ප්‍රතිචාර දක්වමින් මේ ප්‍රකාශය කර තිබේ.
මේ වසරේ මේ දක්වා ලංකා මුහුදු සීමාව උල්ලංඝනය කරමින් නීතිවිරෝධි ලෙස ඇතුළුවීම සම්බන්ධයෙන් ශ්‍රී ලංකා නාවික හමුදාව විසින් ඉන්දීය ධීවරයන් 99ක් අත්අඩංගුවට ගෙන ඇත. පසුගිය 19 වැනි දින රාත්‍රී කාලයේදී කළ විශේෂ මෙහෙයුමකදී, ශ්‍රී ලංකා නාවික හමුදාව මන්නාරම සහ ඩෙල්ෆ් දූපත අසල ශ්‍රී ලංකා දේශීය ජල තීරයේ නීතිවිරෝධී ලෙස මසුන් ඇල්ලීම සම්බන්ධයෙන් ඉන්දීය ධීවර බෝට්ටු 3ක් සමඟ ඉන්දීය ධීවරයන් 10ක් අත්අඩංගුවට ගෙන තිබිණි.
ඉන්දීය පාර්ලිමේන්තු මන්ත්‍රීනි කනිමෝලි මහත්මිය ප්‍රකාශ කර ඇත්තේ ‘අපගේ ධීවරයන් කී වතාවක් අත්අඩංගුවට ගෙන තිබේද? ඔවුන් රඳවා තබා ගැනීම පමණක් නොව, ඔවුන්ගේ බෝට්ටු රාජ්‍ය සන්තක කිරීමට ශ්‍රී ලංකාව නීතියක් ද පනවා ඇත. අද වන විට අත්අඩංගුවට ගත් බෝට්ටු 200කට වැඩි ප්‍රමාණයක් ආපසු ලබා දී නැති අතර, මේ වසරේ පමණක් තමිල්නාඩු ධීවරයන් 97ක් අත්අඩංගුවට පත්ව ශ්‍රී ලංකා බන්ධනාගාරවල රැඳී සිටී’ යනුවෙනි.
ඒ සඳහා ධීවර ඇමැති චන්ද්‍රසේකර් මහතා ප්‍රතිචාර දක්වමින් සඳහන් කර ඇත්තේ ඉන්දීය ධීවරයන්ට ශ්‍රී ලංකා මුහුදු සීමා තරණය නොකරන ලෙස දැනුම් දෙන ලෙස මන්ත්‍රිවරියගෙන් ගෞරවයෙන් ඉල්ලා සිටින බවයි. ඔවුන් කේරළ ජලතීරයට නොයන්නේ ඇයි? ආන්ද්‍රාහි ජලතීරයට නොයන්නේ ඇයි? පාකිස්තානයේ ජලතීරයට නොයන්නේ ඇයි? ඉන්දීය ධීවරයන්ගේ පැමිණීම සැමවිටම ශ්‍රී ලංකා ජලතීරය වන්නේ ඇයි?
ඔබගේ ධීවරයන් අපගේ මත්ස්‍ය තොග විනාශ කරනවා පමණක් නොව, අපගේ දැල් කපා, අපගේ බෝට්ටුවලට හානි කරමින්, අපගේ සමුද්‍ර පරිසර පද්ධතිය විනාශ කරමින් සිටිනවා. උතුරේ ශ්‍රී ලංකාවේ ජනගහනයෙන් 20%ක් මසුන් ඇල්ලීම මත යැපෙන අතර, ඔවුන්ගේ ජීවනෝපාය දැඩි ලෙස බලපෑමට ලක්ව තිබෙනවා. ශ්‍රී ලංකාව වසර 30ක කාලයක් යුද්ධයට මුහුණ දුන්නා. එමඟින් අපගේ ජනතාව දැවැන්ත පසුබෑමකට ලක් වූ අතර, දැන් අපි අපගේ ආර්ථිකය නැවත ගොඩනඟන විට, ධීවර අස්වැන්න වැඩිම කාලයේදී ඉන්දියානු ධීවර බෝට්ටු දහස් ගණනක් අපගේ ජල සීමාව ආක්‍රමණය කරමින්, අපගේ සමුද්‍ර සම්පත් සහ අපගේ ධීවරයන්ගේ පැවැත්මට තර්ජනයක් වෙමින් පවතින බවද ඇමැතිවරයා ප්‍රතිචාර දක්වමින් පවසා තිබේ.
ශ්‍රී ලංකා රජය මෙරට සමුද්‍රීය ආරක්ෂාව තහවුරු කිරීමටත්, ධීවර කටයුතුවල තිරසරභාවය සහ ශ්‍රී ලංකා ධීවර ප්‍රජාවන්ගේ ජාතික සම්පත් සහ ජීවනෝපාය ආරක්ෂා කිරීම සහතික කිරීම සඳහාත්, නීති විරෝධී ධීවර පිළිවෙත් මැඬපැවැත්වීම සඳහාත් ඉන්දීය බලධාරීන් සමඟ මේ වන විට සාකච්ඡා පවත්වමින් සිටී.
බුද්ධිකා ඉඹුලාන
