පින්නවල අලි අනාථාගාරය 2024 වර්ෂයේ දෙස් විදෙස් සංචාරකයන් හය ලක්ෂ පනස් දහස් හැත්තෑ හතක් (650,077) නරඹා ඇති බවත් මුළු ආදායම මිලියන 956ක් බවත් පින්නවල අලි අනාථාගාරයේ සහකාර අධ්‍යක්ෂ මිහිරාන් මැදවල මහතා ඊයේ (20) පැවසීය.
එහිදී දේශීය සංචාරකයන් හාර ලක්ෂ හැත්තෑ හත්දහස් එකසිය තිස්හතක් ද (477,137) විදේශීය සංචාරකයන් එක් ලක්ෂ හැත්තෑ දෙදහස් නවසිය හතළිහක් ද (172,940) නරඹා ඇති බව සහකාර අධ්‍යක්ෂවරයා පැවසීය.
2024 වර්ෂයේ දෙසැම්බර් මස සංචාරකයන් වැඩි පිරිසක් අලි අනාථාගාරය නරඹා ඇති අතර, වසරේ මුළු ආදායමෙන් මිලියන 107ක් දෙසැම්බර් මස උපයා තිබීම මෙහිදී විශේෂත්වයකි.
විදේශ සංචාරකයෝ වැඩි පිරිසක් අලි පැටවුන්ට කිරි පෙවීමටත් අලි ඇතුන්ට පලතුරු කැවීමටත් මා ඔයේ දිය නාන අලි ඇතුන් නැරඹීමටත් දැඩි උනන්දුවක් දක්වති. කොවිඩ් වසංගතයෙන් පසුව වැඩිම ආදායම උපයා ඇති වර්ෂය ලෙස 2024 වර්ෂය සැලකිය හැකි බව පැවසූ සහකාර අධ්‍යක්ෂවරයා ලංකාවට පැමිණෙන විදේශ සංචාරකයන්ගෙන් 10% වැනි සුළු පිරිසක් පින්නවල අලි අනාථාගාරය නැරඹීමට පැමිණෙන බව ද පැවසීය.
පින්නවල අලි අනාථාගාරයේ වෙසෙන අලි ඇතුන් දිනපතා දිය නාන්නේ අසලින් ගලා බසින මා ඔයෙන්ය. මේ දිනවල අධික පෑවිල්ල හේතුවෙන් මා ඔයේ ජලය ද සිඳී ගල් පෑදී ඇති අයුරු දක්නට ලැබේ. අලින්ට දිය නෑමට ප්‍රමාණවත් ජලය නොමැති අයුරු දක්නට ලැබුණු අතර, විදේශිකයන් අලි ඇතුන් නාවන අයුරු ද දක්නට ලැබුණි.
පින්නවල අලි අනාථාගාරයේ දැනට අලි ඇතුන් 68 දෙනෙක් සෙවණ ලබන අතර, ඉන් පිරිමි සතුන් 20ක් ද ගැහැනු සතුන් 48ක් ද සිටිති.
