රුපියල් තිස් එක් ලක්ෂ විසි දහසක් වටිනා විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන විත්, කටුනායක ගුවන්තොටුපොළෙන් පිට කර ගෙන යමින් සිටි ශ්‍රී ලාංකික ගුවන් මගී කාන්තාවක් ඊයේ (20) අලුයම ගුවන්තොටුපොළ පොලිස් මත්ද්‍රව්‍ය කාර්යාංශයේ නිලධාරීන් පිරිසක් විසින් අත්අඩංගුවට ගෙන තිබේ.
ඇය මාතලේ, නාඋල, කනමුලයාය ප්‍රදේශයේ පදිංචි 31 හැවිරිදි වොලිබෝල් ක්‍රීඩිකාවකි. ඇය ඩුබායිහි කෙටි සංචාරයක නිරත වී පැමිණෙන අතරතුර මෙසේ නීතිවිරෝධී ලෙස මෙම දුම්වැටි තොගය ද රැගෙන විත් තිබිණි. ඇය පෙරේදා (20) අලුයම 01.05ට ඩුබායි සිට ෆ්ලයි ඩුබායි ගුවන් සේවයේ එෆ්. ඉසෙඩ්.- 569 දරන ගුවන් යානයෙන් කටුනායක ගුවන්තොටුපොළ වෙත පැමිණ තිබිණි.
ඇය විසින් රැගෙන ආ ගමන් මලු තුළ විදේශීය නිෂ්පාදිත “ප්ලැටිනම්” වර්ගයේ දුම්වැටි 20,800ක් අඩංගු දුම්වැටි කාටූන් 104ක් සඟවා ගෙන සිටියදී, පොලිස් මත්ද්‍රව්‍ය කාර්යාංශයේ නිලධාරීන් විසින් අත්අඩංගුවට ගෙන තිබේ.
අත්අඩංගුවට පත් කාන්තාව මේ වන විට පොලිස් ඇප මත මුදා හැර ඇති අතර, ලබන 25 වැනි දින ඇය මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතය.
