32
කළුතර දකුණ ප්‍රදේශයේ පුද්ගලයකු පසුගියදා කපා කොටා ඝාතනය කිරීමේ සිද්ධියට සම්බන්ධ ප්‍රධාන සැකකරු පෙරේදා (19) ඩයස්වත්ත, ප්‍රදේශයේදී තියුණු ආයුධයක් හා මෙරට නිෂ්පාදිත බෝම්බයක් සමඟ අත්අඩංගුවට ගත් බව කළුතර දකුණ පොලීසිය පැවසීය.
මෙම සැකකරු ‘ඩයස් වත්තේ කොණ්ඩ විරාජ්’ නමැති අන්වර්ථ නාමයෙන් හඳුන්වන 24 හැවිරිදි පුද්ගලයෙකි. කළුතර, නාගොඩ ප්‍රදේශයේ දී පසුගිය 15 වැනිදා ලියනරාලලාගේ අමිත් ප්‍රසන්න සිල්වා නමැති 27 හැවිරිදි පුද්ගලයකු කපා කොටා ඝාතනය කර තිබිණි. අත්අඩංගුවට ගත් සැකකරුගේ ප්‍රකාශ මත එම ඝාතනය සඳහා යොදා ගත් තියුණු ආයුධය සොයා ගත් අතර, සැකකරු සන්තකයේ තිබී මෙරට නිෂ්පාදිත බෝම්බයක් ද පොලීසිය විසින් සොයාගනු ලැබිණි. පොලීසිය පැවසුවේ, ඝාතනය සම්බන්ධයෙන් පුද්ගලයන් තිදෙනකු මීට පෙර අත්අඩංගුවට ගෙන කළුතර අධිකරණය වෙත ඉදිරිපත් කර තිබෙන බවයි.
