සිය වැටුපෙන් උපයාගත නොහැකි ලක්ෂ 500කට ආසන්න දේපළවල සහ බැංකු ගිණුම්වල හිමිකාරීත්වය දැරීමේ චෝදනාව යටතේ හිටපු බන්ධනාගාර කොමසාරිස්වරයකු වන කේ. කේ. සුමිත් රංජන්ට එරෙහිව අල්ලස් හෝ දූෂණ කොමිසම විසින් පවරන ලද නඩුවේ අධිචෝදනා පත්‍රය ඊයේ (20දා) කොළඹ මහාධිකරණය භාර දෙන ලදි.
විත්තිකරු බන්ධනාගාර අධිකාරිවරයකු ලෙස කටයුතු කළ 2014 – 2016 අතර වසර 2ක කාලය තුළ දී ප්‍රධාන බැංකු 2ක ශාඛාවල ජංගම සහ ස්ථාවර ගිණුම් ලෙස මෙන්ම ස්ථාවර තැන්පතු ලෙස මෙම මුදල් සන්තකයේ තබා ගෙන තිබේ.
මෙයට අමතර විදේශ සංචාර සඳහා ද විශාල මුදලක් වැයකර ඇත.
විත්තිකරු අදාළ කාලය තුළ දී ජීවන වියදම් සඳහා පමණක් ලක්ෂ 34කට වැඩි මුදලක් වැයකර ඇති බව අධිචෝදනා පත්‍රයේ සඳහන් වේ. විත්තිකරුගේ බැංකු ගිණුම් 2ක පමණක් ලක්ෂ 300කට ආසන්න මුදලක් තිබී ඇත.
මහාධිකරණ විනිසුරු සුජීව නිශ්ශංක මහතා ඉදිරියේ නඩුව කැඳවූ අවස්ථාවේ විත්තිකරු වෙනුවෙන් පෙනීසිටි නීතිඥ ගාමිණී අල්විස් මහතා සුදුසු ඇපයක් මත මුදාහරින ලෙස ඉල්ලා සිටින ලදි. අල්ලස් කොමිසම ඒ සම්බන්ධයෙන් විරුද්ධ නොවුණු බැවින් විත්තිකරු ඇප කොන්දේසි සම්පූර්ණ කිරීමෙන් පසු මුදාහැරීමට නියම කළේය. ලක්ෂ 5ක ශරීර ඇප 2ක් මත විත්තිකරු මුදාහැරීමට නියම විය.
මෙයට අමතරව චූදිතගේ ඇඟිලි සටහන් ගැනීමට සහ පෙර වැරදි වාර්තා පරීක්ෂා කිරීමට මහාධිකරණ විනිසුරුවරයා නියම කළේය.
සාක්ෂිකරුවන්ට බලපෑම් නොකරන ලෙස විත්තිකරුට අවවාද කළ විනිසුරුවරයා එසේ සිදුවුවහොත් ඇප අහෝසි කර රිමාන්ඩ් බන්ධනාගාරගත කිරීමට සිදුවන බව දන්වා සිටියේය.
විත්තිකරුට ආගමන විගමන තහනමක් පැනවූ අධිකරණය විදේශ ගමන් බලපත්‍රය අධිකරණය භාරයට ගැනීමට දැන්වීමට සහ ඒ පිළිබඳ ගුවන් තොටුපළ අධිකාරීන්ට දැන්වීමට නියම විය.
නඩුව ලබන මාර්තු 4දා යළි කැඳවීමට නියමිතය.
