ජනතාවගේ ආරක්ෂාව සඳහා පවතින නිල ආයතනවල ඇතැම් පුද්ගලයන් දක්වාම පාතාලය පැතිරී ඇති බව විමර්ශනවලින් හෙළි වන බව ජනාධිපති අනුර කුමාර දිසානායක මහතා ප්‍රකාශ කර ඇත.
ආරක්ෂක අමාත්‍යාංශයීය උපදේශක කාරක සභාවේ පළමු රැස්වීම පාර්ලිමේන්තුවේ ඊයේ ( 20 ) පැවැති අතර එම රැස්වීම අමතමින් ජනාධිපතිවරයා මේ බව ප්‍රකාශ කර ඇත.
ඉදිරි කාලයේදී අනිවාර්යයෙන්ම පාතාලය සහමුලින්ම අවසන් කිරීමට සියලු කටයුතු කරන බව ද ජනාධිපතිවරයා මෙහිදී සඳහන් කර තිබේ.
උතුරු පළාතේ ස්ථාපිත ඇතැම් සිද්ධස්ථාන මුල්කොටගෙන යම් වාර්ගික හා ආගමික බෙදීම් ඇති වීමේ හැකියාවක් ඇති බව මෙහිදී ඇතැම් මන්ත්‍රීවරු ජනාධිපතිවරයාගේ අවධානයට යොමු කර තිබේ.
ඊට ප්‍රතිචාර ලෙස ජනාධිපතිවරයා පවසා ඇත්තේ ආගමිකවාදය සහ ජාතිවාදය දේශපාලනයෙන් සහමුලින්ම ඉවත්විය යුතු බවයි. එම ප්‍රදේශයේ පුරවැසියන්ගේ අවංක උවමනාව මත මෙම සියලු ප්‍රශ්න විසඳාගතහැකි බවත් ඇතැම් පටු දේශපාලන වාසි අපේක්ෂා කරන කණ්ඩායම් මෙවැනි අවස්ථාවන් දේශපාලන ගැටලු බවට පත් කරන බවත් එබැවින් පටු දේශපාලන වාසි තකා ජාතිවාදය සහ ආගම්වාදය ඇතිකිරී‍මට කිසිවෙකුට ඉඩ නොතබන බවත් ජනාධිපතිවරයා ප්‍රකාශ කර තිබේ.
අධිකරණ සංකීර්ණවල ආරක්ෂාව සම්බන්ධව යෝජනාවලියක් සකස් කොට ඇති බවත් ඉදිරියේදී නීතිඥයන් ඇතුළු සියලු පාර්ශ්ව පරීක්ෂාවට ලක්කරමින් නවීන තාක්ෂණය ද භාවිතකොට අධිකරණ සංකීර්ණවල ආරක්ෂාව වැඩිකිරීමට පියවර ගන්නා බවත් මෙම අවස්ථාවට එක්ව සිට ඇති අධිකරණ සහ ජාතික ඒකාබද්ධතා ඇමැති හර්ෂණ නානායක්කාර සඳහන් කර ඇත.
එමෙන්ම උතුරු නැඟෙනහිර පළාත්වල යුධ හමුදා කඳවුරු සහිත ඉඩම් නැවත මුල් අයිතිකරුවන්ට නිදහස් කිරීම පිළිබඳව ද මෙහිදී මන්ත්‍රීවරු කරුණු ඉදිරිපත් කර තිබේ.
මෙහිදී ආරක්ෂක අමාත්‍යාංශයේ ලේකම්වරයා පවසා ඇත්තේ උතුරු නැඟෙනහිර පමණක් නොව සමස්ත දිවයිනේම ත්‍රිවිධ හමුදාව භාවිත කරන ඉඩම් පිළිබඳ නැවත විගණනයක් හෝ ඇගයීමක් සිදුකර ඉඩම් නිදහස් කිරීම සම්බන්ධයෙන් ඉදිරි තීරණයන් ගන්නා බවයි.
