2025 පෙබරවාරි 19 දින රැස් වූ අමාත්‍ය මණ්ඩලය විසින් ගනු ලැබූ තීරණ ප්‍රකාශයට පත් කිරීම සඳහා කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස සහ රජයේ ප්‍රවෘත්ති දෙපාර්තමේන්තුවේ අධ්‍යක්ෂ ජනරාල් එච්.එස්.කේ.ජේ. බණ්ඩාර මහත්වරුන් රජයේ ප්‍රවෘත්ති දෙපාර්තමේන්තුවේදී ඊයේ (20) පැවති මාධ්‍ය හමුවට එක් වූයේ මෙලෙසිනි. මේ අවස්ථාවට කම්කරු හා ආර්ථික සංවර්ධන නියෝජ්‍ය ඇමැති ආචාර්ය අනිල් ජයන්ත ප්‍රනාන්දු මහතාද එක්ව සිටියේය.
කොරියානු සරසවියක් සමඟ සාගර විශ්වවිද්‍යාලය ගිවිසුමක
අධ්‍යාපන සහ ඒකාබද්ධ පර්යේෂණ වැඩසටහන් ප්‍රවර්ධනය කිරීම සහ ඒකාබද්ධව වැඩමුළු හා සම්මන්ත්‍රණ සංවිධාන කිරීම අරමුණු කර ගනිමින් කොළඹ විශ්වවිද්‍යාලය සහ කොරියානු ජනරජයේ ජාතික කොරියානු සමුද්‍රීය හා සාගර විශ්වවිද්‍යාලය අතර අවබෝධතා ගිවිසුමකට එළඹීමට සැලසුම් කර ඇත. වසර පහක (05) කාලසීමාවක් සඳහා බලාත්මක වන පරිදි යෝජිත අවබෝධතා ගිවිසුම අත්සන් තැබීමට අධ්‍යාපන, උසස් අධ්‍යාපන සහ වෘත්තීය අධ්‍යාපන ඇමැතිවරයා ලෙස අගමැතිනි, ආචාර්ය හරිනි අමරසූරිය මෙණෙවිය ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
හංගේරියානු ණය රක්ෂණ සමාගම සමඟ ගිවිසුමක්
හංගේරියානු අපනයන ණය රක්ෂණ පුද්ගලික සමාගම සහ ශ්‍රී ලංකා රජය අතර ණය ප්‍රතිව්‍යුහගතකරණය පිළිබඳ ගිවිසුමකට අත්සන් තැබීමට තීරණය කර තිබේ. යෝජිත ගිවිසුම සඳහා නීතිපති විසින් සිය නිෂ්කාශනය ලබා දී ඇති අතර ඒ අනුව එම ගිවිසුමට එළැඹීමට මුදල්, ක්‍රමසම්පාදන සහ ආර්ථික සංවර්ධන ඇමැතිවරයා ලෙස ජනාධිපති අනුර කුමාර දිසානායක මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
‘Clean Sri Lanka’ සම්මාන තරගාවලියක්
වත්මන් රජයේ ‘Clean Sri Lanka’ ජාතික ව්‍යාපෘතියේ අරමුණු සාක්ෂාත් කර ගැනීමේ උපායමාර්ගික මෙවලමක් ලෙස 2025/26 වර්ෂයේ සිට ජාතික ඵලදායිතා සම්මාන තරගාවලිය පාසල්, රාජ්‍ය, නිෂ්පාදන හා සේවා යන ප්‍රධාන ක්ෂේත්‍රයන් යටතේ පැවැත්වීමට කර්මාන්ත සහ ව්‍යවසායකත්ව සංවර්ධන ඇමැති සුනිල් හඳුන්නෙත්ති මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
නුවරඑළියට නව රැකවරණ නිවාසයක්
2025 වර්ෂයේ ජනවාරි මාසයේ සිට නුවරඑළිය දිස්ත්‍රික්කයේ ද නව රැකවරණ නිවාසයක් ස්ථාපිත කර තිබේ. එකී තාවකාලික කාන්තා රැකවරණ නිවාසය ද කාන්තා සහ ළමා කටයුතු අමාත්‍යාංශය සහ රාජ්‍ය නොවන සංවිධාන සමඟ ඒකාබද්ධව පවත්වාගෙන යනු ලබන රැකවරණ නිවාස ජාලයට ඇතුළත් කර ගැනීමට කාන්තා සහ ළමා කටයුතු ඇමැති සරෝජා පෝල්රාජ් මහත්මිය ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
සාම්පූර් සූර්ය බලාගාරය ක්‍රියාත්මක කෙරේ
ත්‍රිකුණාමලයේ සාම්පූර් ඉදිකිරීමට සැලසුම් කර තිබූ ගල්අඟුරු බලාගාර ව්‍යාපෘතිය ක්‍රියාත්මක කිරීම සඳහා ලංකා විදුලිබල මණ්ඩලය සහ ඉන්දියාවේ ජාතික තාප විදුලි සංස්ථාව විසින් හවුල් ව්‍යාපාර සමාගමක් ලෙස ස්ථාපිත කරන ලද Trincomalee Power Company Ltd මඟින් යෝජිත මෙගාවොට් 50ක සූර්ය බලාගාර ව්‍යාපෘතිය ක්‍රියාත්මක කිරීමට තීරණය කර තිබේ. ඒ අනුව, යෝජිත ව්‍යාපෘතිය ක්‍රියාත්මක කිරීම සඳහා අවශ්‍ය ඉදිරි පියවර ගැනීමට බලශක්ති ඇමැති කුමාර ජයකොඩි මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
CIRDAP හි සාමාජිකත්වය අලුත් කෙරේ
ආසියානු හා පැසිපික් කලාපයේ ඒකාබද්ධ ග්‍රාමීය සංවර්ධනය පිළිබඳ මධ්‍යස්ථානය (CIRDAP) කලාපයීය, අන්තර් රාජ්‍ය සහ ස්වාධීන සංවිධානයක් ලෙස ආසියානු හා පැසිපික් කලාපයේ රටවල සහ එක්සත් ජාතීන්ගේ ආහාර හා කෘෂිකර්ම සංවිධානයේ මූලිකත්වයෙන් එක්සත් ජාතීන්ගේ ආයතන කිහිපයක සහ පරිත්‍යාගශීලීන්ගේ සහාය ඇතිව ස්ථාපිත කර ඇත. මේ වන විට කලාපයීය රටවල් 15ක් එහි සාමාජිකත්වය දරනු ලබයි. එම මධ්‍යස්ථානයේ ක්‍රියාකාරි සාමාජිකයකු වශයෙන් තවදුරටත් කටයුතු කිරීමට හැකි වන පරිදි 2022 වර්ෂයේ සිට 2025 වර්ෂය දක්වා වන සාමාජික මුදල් ගෙවීමට කෘෂිකර්ම, පශු සම්පත්, ඉඩම් සහ වාරිමාර්ග ඇමැති කේ.ඩී ලාල්කාන්ත මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
ගාල්ල ජලසම්පාදන යෝජනා
ගාල්ල ජලසම්පාදන යෝජනා ක්‍රමය මඟින් දැනට ජල පාරිභෝගිකයන් 28, 000 කගේ සහ පොරොත්තු ලේඛනයේ සිටින 5400කගේ ජල අවශ්‍යතා සැපයීමට දැනට 45%ක මට්ටමේ පවතින ආදායම් නොලබන ජල පාරිභෝජන මට්ටම 15%ක් දක්වා අඩු කරගෙන, ඒ අනුව ඉතිරි වන ජලය පොරොත්තු ලේඛනයේ සිටින අයදුම්කරුවන්ට ලබා දීමට හැකි වන පරිදි පුද්ගලික අංශයේ සහභාගිත්වය යටතේ කාර්යසාධනය පදනම් කර ගත් කොන්ත්‍රාත්තුවක් හරහා නියමු ව්‍යාපෘතියක් ක්‍රියාත්මක කිරීමට ජල සම්පාදන හා ජලාපවහන මණ්ඩලය යෝජනා කර ඇත. ඒ සඳහා ඇමෙරිකානු ඩොලර් මිලියන 1.28ක ප්‍රදානයක් ලබා දීමට ද කැමැත්ත ප්‍රකාශ කර තිබේ. ඒ අනුව, එම ව්‍යාපෘතිය ක්‍රියාත්මක කිරීමට නාගරික සංවර්ධන, ඉදිකිරීම් සහ නිවාස ඇමැති එන්.ජී අනුර කරුණාතිලක මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
වෙළෙඳපළ ස්ථාවරත්වයට යෝජනා අඛණ්ඩව
පොදු මහජනතාවගේ යහපත සඳහා අත්‍යවශ්‍ය ආහාර ද්‍රව්‍යවල වෙළෙඳපොළ මිල ස්ථාවරව පවත්වාගෙන යාමේ සහ දේශීය ගොවීන් සඳහා පහසුකම් සැලසීමේ රජයේ ප්‍රතිපත්තිමය තීරණ ක්‍රියාත්මක කිරී‌මේ ක්‍රියාවලිය අඛණ්ඩව පවත්වාගෙන යාම සඳහාත්, රාමසාන් උත්සවය වෙනුවෙන් පරිත්‍යාග වශයෙන් මෙරටට ලැබෙන රටඉඳි සඳහා බදු සහනයක් ලබා දීම සඳහාත් 2007 අංක 48 දරන විශේෂ වෙළෙඳ භාණ්ඩ බදු පනතේ විධිවිධාන යටතේ නිකුත් කරනු ලැබ ඇති නියමයන් කිහිපයක් පාර්ලිමේන්තුවේ අනුමැතිය සඳහා ඉදිරිපත් කිරීමට මුදල්, ක්‍රමසම්පාදන සහ ආර්ථික සංවර්ධන ඇමැතිවරයා ලෙස ජනාධිපති අනුර කුමාර දිසානායක මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
ගමනාගමන කොමිෂන් සභා පනත යාවත්කාලීන කෙරේ
1991 අංක 37 දරන ජාතික ගමනාගමන කොමිෂන් සභා පනතේ විධිවිධාන කිහිපයක් වර්තමාන අවශ්‍යතාවලට ගැළපෙන පරිදි යාවත්කාලීන කරමින් සංශෝධනය කිරීම සඳහා අමාත්‍ය මණ්ඩල අනුමැතිය ලබා දී ඇත. ඒ අනුව, නීති කෙටුම්පත් සම්පාදක විසින් සකස් කරනු ලැබ ඇති සංශෝධිත පනත් කෙටුම්පත විධිමත් ක්‍රමවේදය අනුගමනය කරමින් පාර්ලිමේන්තුවේ අනුමැතිය සඳහා ඉදිරිපත් කර තිබූ නමුත් පාර්ලිමේන්තුව විසුරුවා හැරීම හේතුවෙන් ඒ සඳහා පාර්ලිමේන්තුවේ අනුමැතිය ලබා ගැනීමට හැකි වී නොමැත. එකී පනත් කෙටුම්පත නැවත රජයේ ගැසට් පත්‍රයේ පළ කර පාර්ලිමේන්තුවට ඉදිරිපත් කිරීමට ප්‍රවාහන, මහාමාර්ග, වරාය සහ සිවිල් ගුවන් සේවා ඇමැති බිමල් රත්නායක මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
අපරාධ නඩු විධාන සංග්‍රහයේ නියමයන්
2013 අංක 2 දරන අපරාධ නඩු විධාන සංග්‍රහය (විශේෂ විධිවිධාන) පනත මඟින් විමර්ශන පැවැත්වීම පහසු කිරීම සඳහා වරෙන්තුවක් නොමැතිව සිරභාරයට ගනු ලැබූ තැනැත්තන් රඳවා තබා ගැනීමේ කාලසීමාව දීර්ඝ කිරීම සඳහා ද, ඇතැම් නඩුවල දී ලඝු නොවන පරීක්ෂණ පැවැත්වීම බැහැර කිරීම සඳහා ද, පැමිණිල්ලේ සාක්ෂිකරුවන්ගේ දිවුරුම් සාක්ෂි ලබා ගැනීම සඳහා ද, ඊට සම්බන්ධ කාරණා සඳහා ද විධිවිධාන සලසා ඇත. එකී පනතේ විධිවිධාන, පනත ක්‍රියාත්මක වූ දින සිට වසර 02ක කාලයක් සඳහා වලංගු වේ. එම පනතේ 7 වන වගන්තියේ (2) වන උපවගන්තියට අනුව, ගැසට් පත්‍රයේ පළ කරනු ලබන නියමයක් මඟින් අධිකරණ විෂය භාර ඇමැතිවරයා විසින් පනත ක්‍රියාත්මක වීම තවදුරටත් දීර්ඝ කරනු ලැබිය හැක. ඒ අනුව, එකී පනත ක්‍රියාත්මක වීම මේ දක්වා වරින්වර දීර්ඝ කරනු ලැබ තිබේ. අදාළ පනතේ විධිවිධාන ක්‍රියාත්මක වීම 2025-02-02 දින සිට තවත් වසර 02ක කාලයකින් දීර්ඝ කරමින් නිකුත් කළ ගැසට් නිවේදනයේ නියමය පාර්ලිමේන්තුවට ඉදිරිපත් කිරීමට අධිකරණ සහ ජාතික ඒකාබද්ධතා ඇමැති හර්ෂණ නානායක්කාර මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
දේශීය ආදායම් පනත සංශෝධනයට උපදෙස්
2024‑12‑09 දිනැති සහ 2025‑02‑03 දිනැති අමාත්‍ය මණ්ඩල තීරණ මඟින් පිළිවෙළින් 2002 අංක 14 දරන එකතු කළ අගය මත බදු පනත සහ 2017 අංක 24 දරන දේශීය ආදායම් පනත සංශෝධනය කිරීමට පනත් කෙටුම්පත් සකස් කිරීම සඳහා නීති කෙටුම්පත් සම්පාදක වෙත උපදෙස් ලබා දී ඇත. ඒ අනුව, අදාළ සංශෝධන ඇතුළත් කරමින් නීති කෙටුම්පත් සම්පාදක විසින් එකතු කළ අගය මත බදු (සංශෝධන) පනත් කෙටුම්පත සහ දේශීය ආදායම් (සංශෝධන) පනත් කෙටුම්පත සකස් කරනු ලැබ තිබේ. එම පනත් කෙටුම්පත් සඳහා නීතිපතිගේ නිෂ්කාශනයන් ලැබී ඇත. එකී පනත් කෙටුම්පත් රජයේ ගැසට් පත්‍රයේ පළ කිරීමටත්, ඉන් අනතුරුව අනුමැතිය සඳහා පාර්ලිමේන්තුවට ඉදිරිපත් කිරීමටත් මුදල්, ක්‍රමසම්පාදන සහ ආර්ථික සංවර්ධන ඇමැතිවරයා ලෙස ජනාධිපති අනුර කුමාර දිසානායක මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
