අන්තර් ජාතික සම්මාන, ඇගයීම් ගණනාවකට හිමිකම් කියූ නිලන්ත හපන්වීරගේ කුලුඳුල් චිත්‍රපට අධ්‍යක්ෂණය වන, ‘තේජා’ එළැඹෙන 8දා සිට දිවයින පුරා තිරගත කිරීමට නියමිතය. නීටා ප්‍රනාන්දු, අයිරාංගනී සේරසිංහ, මහේන්ද්‍ර පෙරේරා, අනුරුද්ධිකා පාදුක්කගේ ඇතුළු සම්මානනීය, දක්ෂ නළු නිළි පිරිසක් මෙහි රඟති. නීටා ප්‍රනාන්දු, සුරංග ද අල්විස් මෙහි බරපැන දරති. 
40 වැනි හුස්ටන් සිනමා උලෙළේදී තරගකාරී අංශයේ හොඳම චිත්‍රපටයට හිමි සම්මානය දිනූ මේ චිත්‍රපටය අන්තර්ජාතික ගෝවේ සිනමා උලෙළේදී විශ්ව සම්භාවනාවට පත්වූ චිත්‍රපටයක් වශයෙන් හඳුන්වා දෙමින් තිරගත කරන ලද්දකි. මේ සමඟ අධ්‍යක්ෂවරයා ප්‍රේක්ෂකයාව 80 දශකයට රැගෙන යයි. ඒ, වර්ෂ 1982 – 1985 පොලිටෙක්ස් ඇඟලුම් කම්හල් සමූහයේ සේවක සේවිකාවන් දියත් කළ දීප ව්‍යාප්ත වැඩ වර්ජනය ඇසුරෙන් නිර්මාණය කරන ලද්දකි. එම සිද්ධිය ද එකල අන්තර්ජාතික ප්‍රජාවගේත් අවධානයටත් ලක් වූවකි.
කර්මාන්ත ශාලාවක සේවයේ යේදී සිටියදී අනතුරකට ලක් වන තම සැමියා රංජිත් ගේ වෘත්තීය අයිතිවාසිකම් වෙනුවෙන් සටන් කරන තේජා ,තම පුද්ගලික අභිමතාර්ථයන් පසෙක තබා , ජීවන අරගලය ජය ගැනීම සදහා සේවය කීරීමට ඇගලුම් කර්මාන්ත ශාලාවක සේවයට යයි .එහි සහෝදර කම්කරු කාන්තා වන්ට වන අකටයුතුකම් වෙනුවෙන් පෙනී සිටින තේජා දේශපාලනය හා සබැඳී හාම්පුතුන්ගේ ශ්‍රම සූරාකෑමට මෙන්ම මර්ධනට එරෙහිව ඇය නැගී සිටී .
අනතුරුව සහෝදර කම්කරු සෙවිකාවන්ට නායකත්වය දෙන ඇය අයිරින් නම් වුර්තීය නායිකාවගෙ මග පෙන්වීම ඔස්සේ අරගලය ක් තුලින් නැගී සිටි . එවන් තේජාහි, නීටා ප්‍රනාන්දු ( තේජා), මහේන්ද්‍ර පෙරේරා ( රංජිත්), අයිරාංගනී සේරසිංහ ( අයිරින්), චමිලා පීරිස් ( මැඩම්), සුජානි මේනකා ( නයනා), අනුරුද්ධිකා පාදුක්කගේ ( කමලා), අතුල පතිරණ ( සිසිර), ශ්‍රීමාල් වෙඩිසිංහ ( තිසේරා) චරිත මවමින් තේජා සමඟ රිදී තිරයට පිවිසෙයි.
කැමරාවෙන් කාවින්ද රණවීර ද අංග රචනයෙන් මනෝ සෙල්වරාජ්, හංසක සුචීර ද සංස්කරණයෙන් ස්ටැන්ලි ද අල්විස් ද කලා අධ්‍යක්ෂණයෙන් මංජුල අයගම ද සංගීත අධ්‍යක්ෂණයෙන් නවරත්න ගමගේ ආදිහු මේ සමඟ එක්ව සිටිති.
ඒ, දකුණු ආසියාතික දීර්ඝතම වැඩවැරුම වශයෙනි. ශ්‍රම සූරාකෑම, කම්කරු අයිතීන් කප්පාදුව ඇතුළු යටිපෙළක් මේ පසුපස ඇත. ඒ පිළිබඳ අපි දැන් තේජා අධ්‍යක්ෂණය කළ නිලන්ත හපන්වීරගෙන් අදහස් විමසමු.
‘මම වේදිකා නාට්‍ය කලාවෙන් ඇවිත්, ගුවන්විදුලිය, වෙළෙඳ දැන්වීම් කලාව ආදියේ නිරතවෙමින් නිදහස් රචකයකු, කලාකරුවකු විදිහට රක්ෂාව කරන කෙනෙක්. මෙතෙක් රාජ්‍ය නාට්‍ය උලෙළ ආදියේදී ලැබුණු ඇගයීම් මගේ ගමනට පන්නරයක්. ඒ ඇතුළුව සිනමාවෙන් ඉදිරි ගමනක් යෑමේ අපේක්ෂාවෙන් මගේ මුල්ම චිත්‍රපටය තේජා අධ්‍යක්ෂණය කළේ. මේ, සර්වකාලීන තේමාවක්. මේ වස්තු විෂය වූ සිද්ධිය 80 දශකයට දිව ගියත්, මේ මාතෘකාව සර්වකාලීනයි. අදටත් එදා මෙන්ම කම්කරු ගැටලු, අරගල දැක ගන්න පුළුවන්.
අද වන විට නළු නිළියන් දිහා බලාගෙන ප්‍රේක්ෂකයා චිත්‍රපටි බලන්න යන්නේ නැහැනේ. ඒ වෙනුවට හොඳ නිර්මාණයක් දකින්න එන වාතාවරණයක් තියෙන්නේ. අනෙක, චිත්‍රපටි ශාලාවලදී එකිනෙකට වෙනස් චිත්‍රපටි විවිධ දර්ශන වාරවලදී ප්‍රදර්ශනය කරන්නේ. ඒ පිළිබඳ කලාකරුවන්ගෙන් විවේචන තිබුණත් ප්‍රේක්ෂකයාට ඉන් යහපතක් වෙන්නේ. ඒ වගේම සිනමාව අතිශය විවෘතයි. එළිදකින දිනයේදීම රට රටවල එකම චිත්‍රපටිය ප්‍රදර්ශනයට පහසුකම් අද තියෙනවා. ඒ වෙනුවෙන් පුද්ගලිකව අධ්‍යක්ෂවරුන්, නිෂ්පාදකවරුන් අදාළ රට රටවලට යමින් වෙහෙසිය යුතු නැහැ. සම්මානනීය නීටා ප්‍රනාන්දුගේ කලා ජීවිතයේ 60 වැනි සැමරුම වෙනුවෙන් තේජා පිරිවර එක්ක එළැඹෙන 07දා සවස තරංගනී සිනමා ශාලාවේදී ඇගයීම් උලෙළකුත් පැවැත්වෙනවා. ඊටත් ප්‍රේක්ෂකයාට ආරාධනා කිරීමට මෙය අවස්ථාවක් කර ගන්නවා. චිත්‍රපටි ප්‍රදර්ශනය අතින් වෙනදා පැවති මැසිවිලි, අර්බුද අදටත් නැතුවා නෙවෙයි. හැබැයි, චිත්‍රපටිකරුවන් විදිහට අපි කවුරුත් එකට, සහයෝගයෙන් කටයුතු කරන බවත් කිව යුතුයි. එය පොදුවේ සිනමා ක්ෂේත්‍රයේ ගැටලු නිරාකරණයේදී අවශ්‍ය කරන රාජ්‍ය මැදිහත්වීම හා රාජ්‍ය අනුග්‍රහය මේ කලාවේ උන්නතියට යොදා ගැනීමේදී ඉතා වැදගත් වෙනවා…’
නුවන් මහේෂ් ජයවික්‍රම
