බ්ලූමැන්ඩල් දුම්රියපොළ පාර අසලට දුරකතන ඇමතුමක් දී පුද්ගලයකු ගෙන්වාගෙන තියුණු ආයුධවලින් කපා කොටා ඝාතනය කර ඇතැයි කොටහේන පොලීසිය කියයි. මෙලෙස ඝාතනයට ලක්ව ඇත්තේ මට්ටක්කුලිය රොද්‍රිගු ප්‍රදේශයේ පදිංචිව සිටි ජී. අමිල මදුසංක නමැති 22 හැවිරිදි පුද්ගලයෙකි. මරණකරුට පෙරේදා (18) රාත්‍රී බ්ලූමැන්ඩල් දුම්රියපොළ පාර අසලට පැමිණෙන ලෙස පුද්ගලයකු දුරකතන ඇමතුමක් ලබා දී ඇති අතර ඔහු බිරිය සමඟ එම ස්ථානයට පැමිණ රැඳී සිටියදී, පුද්ගලයකු පැමිණ මරණකරුව වෙනත් ස්ථානයකට කැඳවාගෙන ගිය අවස්ථාවේදී යතුරුපැදිවලින් පැමිණි පිරිසක් තියුණු ආයුධවලින් පහරදී මෙම ඝාතනය සිදුකර ඇතැයි පොලීසිය පවසයි.
ඉන්දියාවේ සැඟව සිටින මහා පරිමාණ ජාවාරම්කරුවකු සහ සංවිධානාත්මක අපරාධකරුවකු වන මෝදර ප්‍රදීප් නමැත්තාගේ සමීපතමයකු ඝාතනය කිරීමට ආධාර අනුබල දීමේ සිද්ධියක් සම්බන්ධයෙන් දෙපාර්ශ්වයක් අතර පවතින ගැටුමක ආරවුලක් මෙම ඝාතනයට හේතුවන්නට ඇතැයි පොලීසිය සැක කරයි. සැකකරුවන් අත්අඩංගුවට ගැනීම සඳහා විමර්ශන කණ්ඩායම් කීපයක් යොදවා ඇතැයි උසස් පොලිස් නිලධාරියකු කීය. කොටහේන පොලීසියේ ස්ථානාධිපති, ප්‍ර.පො.ප. කෝසල ලියනාරච්චි මහතාගේ උපදෙස් මත අපරාධ විමර්ශන අංශයේ ස්ථානාධිපති උ.පො.ප. අරවින්ද මහතා ඇතුළු කණ්ඩායමක් පරීක්ෂණ පවත්වයි.
