වල් අලි රංචු පිටින් ගම්වදින බවත්, අලි එළවීමට වනජීවියෙන් ලබා දෙන්නේ අලි වෙඩි දෙකක් පමණක් බවත්, තව දෙකක් ගැනීමට නම් හම්බන්තොටට යෑමට සිදු වන බවත් හම්බන්තොට ගොවි සංවිධාන නියෝජිතයෝ පවසති.
ඔවුන් පවසන්නේ, එකවර ගොවියකුට අලි වෙඩි පහක්වත් දෙන වැඩපිළිවෙළක් සකස් කළ යුතු බවයි. මේ දිනවල වී අස්වනු නෙළීම ආරම්භ කර තිබෙන හෙයින් ගොයම් සුවඳට වල් අලි කුඹුරුවලට පැමිණෙන බව පෙන්වාදෙන ගොවි නියෝජිතයෝ, එළිවන තෙක් ගිනිමැල ගසාගෙන වල් අලි එළවීම සිදු කරන බවත්, එසේ වී වගාව ආරක්ෂා කර ගැනීමට ලබා දෙන අලි වෙඩි දෙක කිසිසේත්ම ප්‍රමාණවත් නොවන බවද කියා සිටී.
හම්බන්තොට වනජීවී කාර්යාලයේ අඩවි ආරක්ෂක නිලධාරීවරයා මේ සම්බන්ධයෙන් අදහස් දක්වමින් කියා සිටියේ, පසුගිය දිනවල අලි වෙඩි ලබාදීම සිමා කිරීමට සිදු වූයේ ලැබෙන ප්‍රමාණයේ අඩුවීමක් තිබූ නිසා බවයි. මේ වන විට අලි වෙඩි ලැබෙමින් පවතින බැවින් ග්‍රාම නිලධාරීන්ගේ නිර්දේශ යටතේ අලි වෙඩි ලබාදීමට පියවර ගන්නා බවද ඔහු කියා සිටියේය. ඔහු වැඩිදුරටත් පැවසුවේ, සීමාව ඉක්මවා අලි වෙඩි ඉල්ලා සිටියද එය කළ නොහැක්කක් බවයි.
