පොලිස් රාජකාරියට බාධා කරමින් පොලිස් නිලධාරීන්ට තර්ජනය කොට අඩන්තේට්ටම් කිරීම සම්බන්ධයෙන් සැකපිට අධිකරණයට ඉදිරිපත් කළ පුද්ගලයකු මේ මස 21 වැනිදා තෙක් රක්ෂිත බන්ධනාගාරගත කරන ලෙස බදුල්ල මහේස්ත්‍රාත්වරයා පෙරේදා (18) නියෝග කළේය.
මෙසේ රක්ෂිත බන්ධනාගාරගත කෙරුණේ දෙමෝදර, උඩුවරවත්ත පහළ කොටසේ පදිංචි 42 හැවිරිදි පුද්ගලයෙකි. හාලිඇළ පොලීසියේ නිලධාරීන් පිරිසක් හා එළදළුව යුද හමුදා කඳවුරේ නිලධාරීන් කණ්ඩායමක් එක්ව ඉකුත් 7 වැනිදා උඩුවරවත්ත ප්‍රදේශයේ මත්පැන්, මත්ද්‍රව්‍ය ඇතුළු වැරදි සම්බන්ධයෙන් සිදු කළ හදිසි වැටලීමක් අවස්ථාවේ අදාළ සැකකරු එම නිලධාරීන්ගේ රාජකාරියට බාධා කරමින් පොලිස් නිලධාරීන්ට මෙසේ තම නිවෙස් සෝදිසි කිරීමට නොහැකි යැයි පවසමින් කලහකාරී ලෙස හැසිරී තිබේ.
එම අවස්ථාවේ උද්ගත වූ තත්ත්වය මත මෙම පුද්ගලයා අත්අඩංගුවට ගැනීමක් සිදු නොවූ අතර, පසුව ඔහු ප්‍රදේශයෙන් පලාගොස් සැඟවී සිට ඇත. එහෙත් සැකකරු ඉකුත් දා යළි නිවෙසට පැමිණ ඇතැයි සැලවීමෙන් පසු හාලිඇළ පොලීසිය ඔහු අත්අඩංගුවට ගෙන අධිකරණයට ඉදිරිපත් කොට තිබිණි.
